Kuata Ocimãho Coku Fetika Elilongiso Liembimbiliya

1. Nye ca kongela voku tẽlisa ocikundi Yesu a tukula kelivulu lia Mateo 28:​19, 20?

¹ Yesu wa tu ĩha ocikundi ‘coku tavisa omanu loku va longisa.’ (Mat. 28:​19, 20) Omo liaco, ka tu ka kuati lika ocimãho coku fetika elilongiso Liembimbiliya kesulilo liosemana ya sokiyiwa vokuenda kuosãi. Olonumbi vikuãimo vi pondola oku tu kuatisa.

2. Velie tu sukila oku fetika lavo elilongiso Liembimbiliya?

² Fetika Elilongiso Liembimbiliya: Nda tua lekisa ombili yoku fetika elilongiso Liembimbiliya, tu kuata epuluvi lioku sanga omunu o lekisa onjongole. (Uku. 11:⁠6) Ove hẽ wa setekele ale oku linga ocindekaise cimue ci vetiya omunu oku lilongisa? Ekongelo limue kofeka yo Estados Unidos, lia kuama onjila yaco vokuenda kuosãi yimosi. Hesanjukuolio va kuata omo lioku fetika elilongiso Liembimbiliya leci ci soka 42 komanu! Ku ka sime okuti, omanu vana va lekisa onjongole va kũlĩha okuti, o yongola oku fetika lavo elilongiso Liembimbiliya. Eci o linga epasu, momo lie ku fetikila elilongiso Liembimbiliya? Nda ka va tavele vepuluvi liaco, ku ka sumue. Pole, amamako oku va vetiya. Anga hẽ, wa setekele ale oku pula omanu va kasi posongo yove, epata liove, vana o talavaya lavo kupange woku sanda eteku, kuenda akamba kosikola, nda va yongola oku lilongisa love Embimbiliya? Pulisavo vana va lilongisa love nda va kuete akamba ale epata okuti, va yongola oku lilongisa Embimbiliya.

3. Ovina vipi vi pondola oku tu kuatisa oku fetika elilongiso Lembimbiliya, kuenda vapuluvi api ci lingiwa?

³ Ovina vi tu Kuatisa Oku Fetika Elilongiso Liembimbiliya: O tratadu losapi hati, Ove hẽ o Yongola Oku Kũlĩha Ocili?, yi pondola oku tu kuatisa oku fetika Elilongiso Liembimbiliya. Eca otratadu yaco komanu vana va siata oku tambula alivulu etu, kuenda ku vana ka va siatele oku tambula. Tu pondolavo oku yeca eci tu kundila vocikanjo colomĩlu, volokololo, poku tuma ovikanda, kuenda poku linga apasu. Tu sukilavo oku sia otratadu yaco kolonjo vina ka tua sangele amanu. Momo lie ku via ambatela poku linga ungende, poku enda kocitanda, kuenda kupange woku sanda eteku? Kemẽla lia sulako liotratadu yaco, ku sangiwa olonumbi vi lekisa ndomo tu fetika elilongiso Liembimbiliya, velivulu Embimbiliya li Longisa Nye?

4. Tu fetika ndati elilongiso Liembimbiliya lekuatiso liotratadu losapi hati, Ove hẽ o Yongola Oku Kũlĩha Ocili?

⁴ Noke yoku eca otratadu komunu, lekisa kokuaye apulilo a sangiwa kemẽla liatete kuenda pula ndoco: “Pokati kapulilo ava, lipi oyongola oku konomuisa?” Noke, konomuisa laye atambululo asangiwa votratadu yaco, kuenda lekisa olondaka vi sangiwa kemẽla lia sulako kulombolola ndomo elilongiso Liembimbiliya li lingiwa. O pondola oku u lekisa olonumbi vikuavo vi sangiwa velivulu Embimbiliya li Longisa Nye?, noke eca elivulu liaco kokuaye, kuenda sokiya eteke o tiuka, oco amameko lombangulo yaco.

5. Momo lie tu sukilila oku kuata ocimãho coku fetika elilongiso Liembimbiliya?

⁵ Ocikanjo cetu cikuete handi omanu valua va yongola oku kũlĩha eci Embimbiliya li longisa. Oku kuata ocimãho coku fetika elilongiso Liembimbiliya, ci tu ĩha epuluvi lioku sanjuka poku kuatisa omanu oku endela vonjila yi tuala komuenyo ko pui.​—⁠Mat. 7:​13, 14.