Upange Umue u Nena Esanju Lialua
1. Upange upi woku sakula omanu konepa yespiritu u kasi oku lingiwa koloneke vilo?
1 Kocita catete vana va sakuiwa ovovei avo va kuata esanju lialua. (Luka 5:24-26) Koloneke vilo, tu kuetevo esanju lioku kuatisa kupange woku sakula omanu konepa yespiritu. (Esit. 22:1, 2, 17) Ci sanjuisa calua oku tanga ovolandu a lekisa ndomo Ondaka ya Yehova kuenda espiritu sandu ya siata oku pongolola omuenyo womanu! Ocina ci tu sanjuisa vali, oku panga onepa kupange woku songola alilongiso Embimbiliya.
2. Esanju lipi tu kuata eci tu longisa ocili komunu umue?
2 Onduko ya Suku helie? Momo lie eye a kasilili oku ecelela ohali? Nye Usoma wa Suku u ka lingila omanu? Ka tu sanjukila lika oku eca atambululo aco, pole tu sanjuka vali enene poku limbuka esanju liondonge omo lioku lilongisa ocili. (Olosap. 15:23; Luka 24:32) Osimbu ondonge yi kula kespiritu, yi fetika oku tukula onduko ya Yehova, oku linga apongoloko koku wala, oku liposuisa ciwa, loku siapo ovituwa vĩvi, kuenda oku eca uvangi ku vakuavo. Nda eye wa amamako toke kelitumbiko loku papatisiwa, o linga manjetu kuenda ekamba lietu kupange woku kunda. Ovina viosi tua tukula ndeti, vi tu nenela esanju.—1 Va Tes. 2:19, 20.
3. Nye tu sukila oku linga oco tu fetike oku songola elilongiso Liembimbiliya?
3 O Pondola hẽ Oku Panga Onepa? Nda ove o yongola oku panga onepa kupange owu u nena esanju, pinga ku Yehova oco a ku kuatise oku songola elilongiso limue Liembimbiliya, kuenda likolisilako oku tẽlisa eci wa pinga vohutililo. (1 Yoa. 5:14) Kundila omanu kovitumãlo viosi kuenda kapuluvi osi. Fetika alilongiso Embimbiliya kapuluvi osi ci ku ecelela. (Uku. 11:6) Nda wa sanga omunu o lekisa onjongole, kuenje ove o kũla ombuto yocili condaka ya Suku vutima waye, o sukila oku tiukilako oku yi tapela.—1 Va Kor. 3:6-9.
4. Momo lie tu sukilila oku kuata ocituwa conjanga poku fetika alilongiso Embimbiliya?
4 Omanu valua handi va kasi onjala lenyona liesunga. Helie o pondola oku va kuatisa oku kũlĩha Yehova poku va longisa Embimbiliya? (Mat. 5:3, 6) Tu li eci olumue koku kuatisa kupange woku kunda loku longisa omanu, osimbu oku ungula ka kua pitilile kesulilo.—Isa. 6:8.