O Pondola hẽ Oku Linga Upange Woku Kunda vo Vialumingu?
1. Nye tu lilongisila kueci Paulu lakamba vaye va linga ko Filipoi?
1 Ca kale eteke liesambata eci va Yudea ko Filipoi va puyuka. Vepuluvi liaco, Paulu lakamba vaye va kala oku nyula olupale vokuenda kungende wavo wumisionaliu. Lomue wa va pisa omo lioku puyuka kupange woku kunda keteke liaco. Ovo va kũlĩhile okuti va Yudea va tundile volupale oku ka liongolola oco va likutilile, kuenje va sanda epuluvi lioku kundila omanu vaco. Hesanjukuolio Paulu lakamba vaye va yeva eci Ludia a tava kesapulo liaco kuenje vosi vakuepata liaye va papatisiwa! (Ovil. 16:13-15) Omo okuti omanu valua koloneke vilo va puyuka vo Calumingu, momo lie keteke liaco ku litumbikila koku va kundila?
2. Ovitangi vipi afendeli va Yehova va liyaka lavio oco va kundile vo Vialumingu okuti ka va lambalaliwa vali?
2 Ocitangi Coku Kunda vo Calumingu: Vokuenda kunyamo wo 1927, afendeli va Yehova va vetiyiwa oku pesela olowola vimue kupange woku kunda vo Vialumingu. Eci ca nena elambalalo. Ko Estados Unidos, valua va kapiwile vokayike omo ka va pokuile kovihandeleko vioku puyuka vo Calumingu, loku lundiliwa oku nyõla ombembua ya vakuavo, kuenda oku landisa ndaño ka va kuatele omoko yaco. Pole afendeli va Yehova ka va liwekelepo. Kunyamo wo 1930, va sokiya oku linga upange woku kunda “vovimunga via litepa” oco akundi kakongelo osi va tokeke ocikanjo. Olonjanja vimue eci akundi va kapiwa vokayike, olombiali ka via tẽlele oku tateka upange wa valua pokati kavo. Ove hẽ wa sanjukila alikolisilo vamanji vaco va linga, oco tu kunde vo Vialumingu okuti ka tu lambalaliwa vali?
3. Nye ci lekisa okuti Calumingu eteke limue liwa lioku enda kupange woku kunda?
3 Eteke Limue Liwa Lioku Kunda: Omanu valua vo Calumingu va kala kolonjo viavo. Momo eteke liavo lioku puyuka. Vana va endaenda konembele keteke liaco va sole oku vangula catiamẽla ku Suku. Nda tu kuete ohongele yetu vo Calumingu, tu wala ciwa loku liposuisa ndeci tu endaenda kupange woku kunda, oco hẽ momo lie ka tu kundila osimbu ka tua endele kohongele ale ceci ohongele yipua? Nda citava ambata okakulia kove.
4. Nda tua talavaya olowola vimue kupange woku kunda vo Vialumingu, esanju lipi tu ka kuata?
4 Nda tua talavaya olowola vimue kupange woku kunda vo Vialumingu, tu ka kuata otembo yalua yoku puyuka. Kuenda epuyuko lietu li ka kuamiwa lesanju liyilila koku litumbika kupange u kola. (Olosap. 19:23) Tu ka kuatavo esanju lioku sanga omunu umue nda Ludia!