Apulilo Vatambuluiwa

◼ Nye tu sukila oku sokolola nda tu yongola okuti ovina vimue ale ovokuasi etu osi a eciwa kocisoko ca Yehova noke yolofa vietu?

Omanu eci va fa ka va kuete vali epondolo lioku tata ovokuasi avo. (Uku. 9:5, 6) Omanu valua osimbu ka va file, va soneha ocicapa cuvangi ci lombolola ndomo ovokuasi avo a tepiwa. (2 Olos. 20:1) Ocicapa caco olonjanja vimue ci lekisavo omunu wa nõliwa oku tepisa ovokuasi. Kolofeka vialua, omunu nda ka sile ocicapa caco, olombiali ovio vi nõla omunu o tepisa ovokuasi aco. Omo liaco, nda tu yongola okuti onepa yimue ale ovokuasi etu osi a eciwa kocisoko ca Yehova, tu sukila oku soneha ocicapa cuvangi kuenda oku nõla omunu o kala locikele coku tepisa ovokuasi aco.

Omunu o tepisa ovina viaco o kuete ocikele cinene. Nda omunu o kuete olombongo ale ovikuata vialua, oku liongolola loku tepisa ovokuasi aco, mua kongela ovina vialua kuenda cambata otembo. Ci tava okuti olombiali vi kuete olonumbi vi kuamiwa. Havosiko vekongelo va pondola oku nõliwa oco va tambule ocikele coku tepisa ovina. Omunu tu nõla te una okuti wa koleliwa kuenda o ka likolisilako oku tẽlisa onjongole yetu.—Tala o Despertai! 8 ya Cembanima wo 1998 losapi hati: “Por Que é Bom e Sensato Preparar um Testamento.”

Nda va ku Pinga Oco o Kale Omunu o Tepisa Ovokuasi: Nda va ku pinga oco o tambule ocikele coku tepa ovokuasi omunu umue osimbu ka file, tete kũlĩhĩsa ovina via kongelamo loku likutilila nda o pondola oku tẽlisa ocikele caco. (Luka 14:28-32) Noke yolofa viomunu waco, o sukila oku sapuila vosi va tukuiwa kolonduko oco va piñale ovokuasi. Nda wa tambula omoko yoku ci linga, o kuete ocikele coku tepisa ovokuasi ndomo ci likuata locihandeleko kuenda ndomo ca sonehiwa vocicapa cuvangi. Ocipiñalo caco nda citito nda cinene, o sukila oku kuama eci ca sonehiwa vocicapa cuvangi. Olombanjaile viosi vi eciwa Lolombangi Via Yehova via tiamẽla kocisoko ca Yehova.—Luka 16:10; 21:1-4.