EKALO LIAKRISTÃO

OSEMANA 19-25 YEVAMBI Kuata Esanju Poku Kunda Olondaka Viwa

Wa kuatele ale ocitangi kupange woku kunda? Valua pokati ketu nda va tambulula okuti, oco kepulilo eli. Momo lie? Momo pamue omanu tu sanga vocikanjo cetu ka va lekisa onjongole, va tema ale tu kuete ohele yoku vangula lomanu ka tua kũlĩhĩle. Ocili okuti, ovina viaco vi pondola oku tepulula esanju lietu. Omo okuti, Suku tu vumba ukuesanju, o yongola okuti tu u vumba lesanju. (Osa. 100:2; 1 Tim. 1:11) Asunga api atatu a tu vetiya oku sanjukila upange woku kunda?

Liatete, tu sandeka esapulo lieca elavoko. Ndaño okuti elavoko li kasi oku tepuluka pokati komanu koloneke vilo, tu pondola oku yukisa ovitima viomanu “londaka yiwa yesanju.” (Isa. 52:7) Pole, olondaka viwa Viusoma wa Suku vi tu nenelavo esanju. Omo liaco, osimbu kua endele kupange woku kunda, sokolola asumũlũho Usoma wa Suku u ka nena palo posi.

Liavali, olondaka viwa tu kunda vi kuatisa omanu ketimba kuenda kespiritu. Ovo va lilongisa oku siapo ovilinga vĩvi kuenda oku kuata elavoko liomuenyo ko pui. (Isa. 48:17, 18; Va Rom. 1:16) Tu sokololi ndu okuti tu kasi oku linga upange woku sandiliya kuenda woku yovola omanu. Ndaño okuti omanu vamue ka va yongola oku popeliwa, tu amamako oku sandiliya vana va yongola.—Mat. 10:11-14.

Liatatu halio lia velapo lieli okuti, upange wetu woku kunda weca esivayo ku Yehova. Eye wa kapako calua upange woku kunda tu linga. (Isa. 43:10; Va Hev. 6:10) Handi vali, o tu ĩha espiritu sandu liaye oco tu tẽlise upange waco. Kuenje, pinga ku Yehova, oco a ku ĩhe esanju li panga onepa kespiritu sandu. (Va Gal. 5:22) Lekuatiso liaye, tu pondola oku yula usumba kuenda oku kunda lutõi. (Ovil. 4:31) Omo liaco, ci kale okuti omanu tu sanga vocikanjo cetu va lekisa onjongole ale sio, tu sanjukili ocikele cetu coku kunda.—Esek. 3:3.

Ovituwa via litepa kupange woku kunda—esumuo kuenda esanju — Ocituwa cipi o yongola oku kuata kupange woku kunda? Ndi pondola oku lekisa ndati esanju?

TALA OVIDEO LOSAPI HATI: TUMBULULA ESANJU LIOVE POKU LILONGISA LOKU SOKOLOLA ECI WA TANGA, NOKE TAMBULULA APULILO A KUÃIMO:

Momo lie tu sukilila oku pitisa kovaso ocituwa cetu coku lilongisa, ndaño okuti tua siata ale oku pita otembo yalua kupange woku kunda olosãi viosi?
Vonepa yipi tu setukula Maria?
Vepuluvi lipi o sokiya otembo yoku sokolola Kondaka ya Suku?
Nye ci ku nenela esanju eci o kunda olondaka viwa?