Tenda Esulilo Lioluali Lulo Lekolelo

Ndopo muẽle epandi lia Yehova loluali lulo li pitĩla kesulilo. Etavo liesanda li ka nyõliwa, ocimunga cimue colofeka ci ka ñualilapo afendeli va Yehova Suku kuenda eye o ka kundula olongangala kuyaki wo Harmagedo. Akristão vocili, va kasi oku lavoka oku tẽlisiwa kuovolandu aco.

Ocili okuti, ka tua kũlĩhĩle ovina viosi via kongela vohali ya piãla. Ndeci, ka tua kũlĩhĩle ciwa eteke ohali ya piãla yi ka fetika. Ka tua kũlĩhĩlevo asunga olombiali vi ka lekisa oco vi ka liteyuile kenyõleho liavo liatavo. Ka tua kũlĩhĩle otembo yi ka tumãla ale ceci ca kongelamo eci olofeka vi ka ñualilapo afendeli va Yehova. Handi vali, ka tua kũlĩhĩle ciwa eci Yehova a ka linga oco a kundule olongangala vuyaki wo Harmagedo.

Embimbiliya li tu ihã olonumbi tu sukila oku kuama oco tu ka tẽle oku liyaka lovina viokovaso yoloneke lekolelo kuenda utõi. Ndeci, tua kũlĩha okuti tu kasi kesulilo “lioloneke via sulako.” (2Ti 3:1) Tua kũlĩha okuti oloneke vioku ñualilapo atavo, “oloneke viaco vi tepuluiwa” oco efendelo liocili ka li ka nyõliwe. (Mat 24:22) Yehova o ka popela afendeli vaye. (2Pe 2:9) Tua kũlĩha okuti, Una Yehova a nõla oco a ka kundule olondingãivi loku tu teyuila kohali ya piãla pocakati cuyaki wo Harmagedo, ukuesunga kuenda ukuonene.—Esi 19:11, 15, 16.

Ovina vi ka pita kovaso yoloneke, vi ka kokela omanu oku “ambuka omo liusumba.” Omo liaco, oku sokolola ndomo Yehova a teyuila afendeli vaye kosimbu kuenda eci a siata oku tu situluila catiamẽla kovaso yonoleke, ci tu kuatisa oku ‘talama ngõ kuenda oku kuata utõi,’ loku kolela okuti epopelo lietu li kasi ocipepi.—Luk 21:26, 28.