Apulilo a Lingiwa la Vakuakutanga
Olondaka viokuti “ove o ka va lava,” vi sangiwa Kosamo 12:7, vi tiamisiwila hẽ “kolosuke vi talisiwa ohali” via tukuiwa kocinimbu 5, ale ‘kolondaka via Yehova’ via tukuiwa kocinimbu 6?
Ulandu waco wosi u lekisa okuti, ocinimbu eci ci tiamisiwila komanu.
Kosamo 12:1-4, tu tangako ndoco: “Vana va koleliwa ka va kasi vali pokati komanu.” Kaliye kũlĩhĩsa Osamo 12:5-7, kuna ku popia hati:
“Omo okuti olosuke vi talisiwa ohali,
Omo lioku leña leña kuohukũi,
Ame ndi ka votoka” oco Yehova a popia.
“Ndi ka va popela komunu wosi o va pembula.”
Olondaka via Yehova via lipua;
Ovio vi kasi ndopalata ya kanguiwa vofolono yotuma okuti, ya yelisiwa olonjanja epanduvali
A Yehova, ove o ka va lava;
O ka teyuila omunu lomunu pokati kavo kocitumbulukila eci, otembo ka yi pui.”
Ocinimbu 5 ku lombolola okuti Suku o ka popela olosuke.
Ocinimbu 6 ci popia hati: “olondaka via Yehova via lipua,” ‘ovio vi kasi ndopalata ya kanguiwa.’ Eci ci situlula ciwa ndomo vosi yetu tua siata oku liyeva catiamẽla kondaka ya Suku.—Osa. 18:30; 119:140.
Kaliye kũlĩhĩsa eci ci popia ocinimbu 7, oco hati: “A Yehova, ove o ka va lava; o ka teyuila omunu lomunu pokati kavo kocitumbulukila eci, otembo ka yi pui.” Ondaka “omunu lomunu pokati kavo” yi tiamisiwila ku velie?
Omo okuti ocinimbu 7 ciya noke liocinimbu ku lombolola catiamẽla ‘kolondaka via Yehova,’ pamue omanu vamue va pondola oku sima okuti ondaka “o ka va lava” yi tiamisiwila kondaka ya Suku. Ocili okuti, Suku wa teyuila Ondaka yaye Embimbiliya, ndaño okuti ovanyãli vaye va seteka oku limũla ale oku tateka okuti olio ka li sandekiwa.—Isa. 40:8; 1 Pet. 1:25.
Olondaka via popiwavo kocinimbu 5 viocili. Yehoha olonjanja viosi wa kuatisa loku popela “olosuke” kuenda ‘olohukũi,’ kuenje o kamamako oku ci linga.—Yovi 36:15; Osa. 6:4; 31:1, 2; 54:7; 145:20.
Oco hẽ ondaka “omunu lomunu pokati kavo” yi sangiwa vocinimbu 7 yi tiamisiwila ku velie?
Poku konomuisa Osamo 12, tu limbuka okuti ondaka “omunu lomunu” yi tiamisiwila komanu.
Kefetikilo Liosamo 12, Daviti o lombolola eci catiamẽla ku “vana va koleliwa” la Yehova okuti, va yapuisiwa lomanu ka va sungulukile. Kocinimbu 2 tu tangako okuti Yehova o ka yambula vana va popia uhembi. Tua kolela okuti Yehova o ka ci linga momo kocinimbu 6 hati, olondaka via Yehova via lipua.
Pole, ocinimbu 7 ci popia hati Yehova, o ka va lava loku teyuila “omunu lomunu” kolondingaĩvi.
Kocinimbu 7 ondaka “omunu lomunu,” ya tukuiwa voviña vialua via koleliwa Viovisonehua vio Heveru. Kepongoluilo liatete liocinimbu eci kelimi lio Helasi, kua kuamiwa ondaka “etu” olonjanja vivali, ci lekisa okuti ocinimbu eci, ci tiamisiwila kafendeli vakuekolelo va Suku vana va siata oku talisiwa ohali. Oku sulako ocinimbu 7 ci popia hati “omunu lomunu” ale vakuekolelo, va ka teyuiwa “kocitumbulukila” comanu va sandeka evĩho. (Osa. 12:7, 8) Epongoluilo limue Liocisonehua co Heveru kelimi lio Aramaiku ocinimbu 7 citi: “Ove A ÑALA, o ka teyuila vakuesunga. O ka va lava pokati kocitumbulukila colondingaĩvi otembo ka yi pui.” Eci ci eca uvangi wokuti, olondaka Viosamo 12:7 ka vi tiamisiwila kolondaka via Suku.
Pole, Osamo eyi yi tu ĩha elavoko liokuti Yehova, o ka teyuila “vana va koleliwa.