Epulilo Limue Lia Leluka, li Pondola Oku Nena Onima Yiwa

Manji Mary kuenda ulume waye John,a va kasi kofeka yimue okuti va pondola oku kundila olondaka viwa komanu valua va tunda ko Filipina okuti va iluka, loku talavaya kofeka yaco. Vokuenda kuefengi lio KOVD-19, manji Mary wa tẽla oku fetika a lilongiso Embimbiliya vofeka muna eye a kasi kuenda kolonepa vikuavo viluali. Manji Mary wa siata oku ci linga ndati?

Manji Mary wa enda oku pulisa kolondonge viaye Viembimbiliya hati: “Ove hẽ wa kũlĩha vali umue o yongola oku lilongisa Embimbiliya?” Nda eye wa tambulula okuti oco, manji Mary wa enda oku pinga kukuavo oco alisange lavo. Oku linga epulilo liaco lia leluka ca siata oku nena onima yiwa. Momo lie? Momo omunu wosi o sole oku lilongisa Embimbiliya, olonjanja vialua o sanjukila oku sapuilako epata liaye kuenda akamba ovina a kasi oku lilongisa. Nye olondonge Viembimbiliya via manji Mary via linga eci eye a linga epulilo eli?

Jasmim okuti ondonge yimue Yembimbiliya ya manji Mary, wa lekisa kokuaye omanu vakuãla va yonguile oku lilongisavo Embimbiliya. Umue pokati kavo o tukiwa Kristine, wa sola calua elilongiso liaco kuenje wa pinga ku manji Mary oku lilongisa laye luvali vosemana. Eci manji Mary o pulisa nda eye wa kũlĩhĩle vali umue o yongola oku lilongisa Embimbiliya, Kristine wa tambulula hati: “Oco, ndu ku lekisa akamba vange.” Volosemana vitito Kristine wa lekisa ku manji Mary akamba vaye vakuãla va yonguile oku lilongisa. Noke Kristine wa lekisa ku manji Mary akamba vaye kuenje vamue pokati kavo va ecavo olonduko viomanu vakuavo va yonguile oku lilongisa Embimbiliya.

Kristine wa yonguilevo okuti epata liaye li kasi ko Filipina li li longisavo Embimbiliya. Kuenje eye wa sapuilako omõlaye Andrea. Kefetikilo Andrea wa sokolola ndoco: ‘Olombangi Via Yehova etavo limue ka lia lombolokele haivo ka va tava ku Yesu kuenda va kuama lika Otestamento Yale.’ Pole, noke lioku lilongisa onjanja yimosi, eye wa limbuka okuti ovina a kala oku sima viatiamẽla Kolombangi Via Yehova haviociliko. Olonjanja viosi eci a lilongisa ocina cimue cokaliye Vembimbiliya, eye wa enda oku popia hati: “Eci ci kasi Vembimbiliya, puãi ocili!”

Noke liotembo yimue, Andrea wa lekisa ku manji Mary akamba vaye vavali kuenda ekula liaye liupange kuenje va fetika oku lilongisa Embimbiliya. Handi vali, manji Mary ka kũlĩhĩle okuti sohãi ya Andrea okuti omeke wa kalavo oku yevelela elilongiso liaye. Angela wa solaile calua ovina a kala oku lilongisa. Vokuenda kuosãi yimosi wa patekela ovisonehua vialua kuenda wa yonguile oku lilongisa olonjanja vikuãla vosemana! Lekuatiso lia Andrea, Angela olonjanja viosi wa enda oku yevelela olohongele pocakati co videokonferensia.

Eci manji Mary a limbuka okuti ulume wa Kristine, Joshua olonjanja viosi wa enda oku yevelela elilongiso Liembimbiliya, manji Mary wo pula nda eye o yongolavo oku lilongisa Embimbiliya. Joshua wa tambulula hati: “Ndi yevelela ño, pole, ku ka ndinge apulilo, nda wa ndi linga apulilo ame ngenda.” Kakukutu atãlo atete elilongiso, eye wa linga apulilo alua okuti Kristine ci sule kuenje eye wa yonguilevo oku lilongisa Embimbiliya.

Epulilo lia leluka manji Mary a linga, lia vetiya omanu valua oku fetika oku lilongisa Embimbiliya. Kuenje eye wa sokiya okuti, vamanji vakuavo va lilongisa lavo. Vocosi, manji Mary wa fetika oku longisa Embimbiliya kueci ci soka 28 komanu vo kolofeka vikuãla via litepa.

Jasmin, okuti ondonge yatete ya tukuiwa vulandu ulo, wa papatisiwa kosãi ya Kupupu yunyamo wo 2021. Kristine wa papatisiwa kosãi ya Kupemba wo 2022 kuenda wa tiukila ko Filipina oco a ka kale lepata liaye. Olondonge vivali eye a lekisile ku manji Mary via papatisiwavo. Noke liolosãi vimue, Angela wa papatisiwavo kuenje cilo o kasi oku talavaya ndukundi wotembo yosi. Ulume wa Kristine Joshua kuenda omõlavo ukãi Andrea, oku kongelamo olondonge vikuavo Viembimbiliya, va kasi oku amamako oku lilongisa Embimbiliya loku pamisa ukamba wavo la Yehova.

Kocita catete omanu valua va enda oku sapuilako kapata avo kuenda kakamba vavo ovina va kala oku lilongisa viatiamẽla ku Yesu. (Ovil. 10:​24, 27, 48; 16:​25-33) Momo lie ku pulisila kolondonge viove Viembimbiliya kuenda ku vana va lekisa onjongole, “Nda ovo va kũlĩha umue o yongola oku lilongisa Embimbiliya?” Nda wa linga epulilo liaco lia leluka, citava okuti ove o ka sangavo omanu valua va yongula oku lilongisa Embimbiliya.