Ukanda Wosungu Yolombangi Via Yehova
A vamanji wa Soliwi:
Tu kuete esanju lioku ku soneheli omo lioku fetika unyamo ulo wovolandu a komõhisa! Vokuenda kunyamo wo 2014, Yesu o ka tẽlisa ocita canyamo tunde eci a fetika oku viala pokati kovanyali vaye.—Osa. 110:1, 2.
Osimbu tu lavoka unyamo waco, ohongele ya siata oku lingiwa unyamo lunyamo lo Sociedade Torre de Vigia de Bíblias e Tratados da Pensilvânia, Ocisoko Cembimbiliya Tradução do Novo Mundo ca sandeka Embimbiliya liokaliye lia lingiwa apongoloko kelimi liongelesi oco ku malusuiwe oku pongolola Embimbiliya loku lieca komanu vosi. Yehova wa tuma omãla vaye va kuatisiwa lespiritu sandu oco kueciwe o Tradução do Novo Mundo. (Va Rom. 8:15, 16) Ove hẽ, ku tava kondaka yokuti Embimbiliya liaco lia litepa?
Vokuenda kuanyamo alua, Osungu Yasonehi Yolombangi Via Yehova, ya siata oku ecelela okuti upange woku pongolola Embimbiliya wa amamako. Koloneke vilo, o Tradução do Novo Mundo ya sandekiwa kueci ci soka 121 kalimi. Omo liaco, tu vetiya vosi oku limbuka ndomo Yehova a siata oku ku kuatisa oco o sanjukile Embimbiliya ove o kuete. Tanga Embimbiliya liaco oloneke viosi kuenda sokolola lutate kovina o tanga. Nda wa cilinga, o ka kuata ukamba la Yehova Suku okuti eye Usovoli walio.—Tia. 4:8.
Tu kuete esanju lialua eci tu yeva okuti vamanji va siata oku yula ovitangi viosi. Citava okuti omo liovitangi va kasi oku liyaka lavio pamue ka ci leluka oku lianja la vamanji. Epata limue li kasi kofeka yo Asia, lia liyaka lovitangi vialua tunde eci ina yavo a kuatiwa luvei u nyõla etimba liosi okuti ka kuata vali ongusu yoku linga cimue. Baffled onoño yimue ukuakusakula olombei, ka tẽlele oku tetulula ocitangi caye. Omo liaco, wa sumuile calua! Ulume waye o kasi oku likolisilako oku tata ukãi waye. Omõlaye ulume kumue lomãla vaye vakãi vavali, va siata oku eca ongangu yiwa poku kuatisa olonjali viavo. Ongangu yiwa epata liaco li lekisa kumue la vamanji vakuavo va siata oku liyaka lovitangi va pondola oku kuatisiwa poku sokolola esanju li tunda koku amamako oku pamisa ekolelo liavo. (Tia. 1:2-4) Yehova wa likuminya oku kuatisa olombuavekua viaye kumue lolomeme vikuavo okuti nda tua amamako oku kuata esanju poku liyaka lovitangi, tu ka kuata esumuluho lioku tambula omuenyo kopui!—Tia. 1:12.
Ocipito conjivaluko yolofa via Yesu ca lingiwa kunyamo wa pita, kua kala eci ci soka 19. 241.252 komanu. Poku mola ndomo omanu valua va kasi oku sivaya Yehova kumue la Yesu Kristu poku enda kohongele yavelapo yafendeli va Yehova Suku, ci tu vetiya calua! Vokuenda kuocipito caco conjivaluko yolofa via Yesu, vamanji valua va talavaya kupange wakundi vasokamo vokuenda kosãi Yelombo kuenda ya Kupupu. Upange waco wa vetiya calua vamanji! Anga hẽ o pondolavo oku linga esokiyo lioku kala ukundi wasokamo eci manji ukuakunyula akongelo a nyula ekongelo liene oco o kale kohongele yi lingiwa lakundi votembo yosi? Vamanji vana okuti va loñoloha konepa yespiritu, va velisapo upange woku kunda kuenda oku tẽlisa ovikele vikuavo. Oku pesila otembo yalua kupange woku kunda, ci tu kuatisa oku amamako oku pandikisa kuenda oku yula ayonjo Eliapu, momo o seteka oku tepulula ekolelo lietu loku nyõla ukamba wetu la Yehova.—1 Va Kor. 15:58.
Tu kuete esanju lialua momo tunde unyamo wupange wapita, ci soka 277.344 komanu, va papatisiwa kuenda va kasi oku likolisilako oku endela vonjila yi tuala komuenyo kopui kumue lavamanji va kuavo voluali luosi! (Mat. 7:13, 14) Vamanji vaco, va sukila ekuatiso lietu oco ‘va pamise ekolelo liavo.’ (Va Kol. 2:7)Tu amamiko oku lipamisa pokati oco tu pandikisi toke kesulilo. (Mat. 24:13) Embimbiliya li lombolola okuti “Kuatisi ava ka va kuete ongusu. Pandikisi la vosi.” (1 Va Tes. 5:14) Omo liaco, vosi yetu tu “kali locituwa coku likutilila”, loku popia hati: “Usoma wove wiye.”—1 Va Tes. 5:17; Mat. 6:10.
Sanjukili o Anuário yilo kuenda ivaluki okuti tu u kueteli ocisola vosi yene u sole Yehova!
Va manjene,
Kosungu Yolombangi Via Yehova