4 Oku Ecela

CI LOMBOLOKA NYE?

Oku ecela ci lomboloka oku ivalako ocina cimue cĩvi umue a popia ale a lingila ukuavo loku siapo ocikumbiti. Oku ecela ka ku lomboloka oku lekisa ombambe ndu okuti, ka kua pitile cimue, ale ocina omunu a linga hacĩviko.

CECI EMBIMBILIYA LI POPIA: “Amamiko oku likapako omunu lukuavo, oku liecela pokati lutima wosi, ndaño umue o kuete esunga lioku kuatela ondaka ukuavo.”—Va Kolosai 3:13.

“Nda o sole omunu umue, ku tiamisila utima kakulueya aye, pole, o likolisilako oku luluvalela kalikolisilo a kasi oku linga.”—Aaron.

MOMO LIE CI KUETELE ESILIVILO?

Oku kuata ocikumbiti ci pondola oku ku kokela uvei vetimba kuenda vowoño. Handi vali, ci nyõlavo olohuela viove.

“Eteke limue, ulume wange wa minga ongecelo omo a linga ocina cimue ca ndi sumuisa calua. Ca tĩlile calua oku wecela. Ocili okuti, ndo wecela, pole, ndi livela omo sia ci lingile lonjanga. Ka tua kuatele esunga lioku litatamisa.”—Julia.

NYE O PONDOLA OKU LINGA?

TALAMA KUENDA SOKOLOLA

Onjanja yikuavo ulume ale ukãi wove a ku lueyela, lipula ndoco:

• ‘Anga hẽ nda tatama calua?’

• ‘Ocitangi caco cinene calua okuti ndi sukila muẽle ongecelo, ale hĩse oku ivalako?’

SAPELI POKATI

• Olonjanja vialua, tua siata oku kala otembo yiñami oco tu liecele?

• Nye tu sukila oku linga oco tu liecele lonjanga?

OLONUMBI

• Eci o sumuisiwa, ku ka sime okuti, ohueli yove ya kuatele ale ocisimĩlo yoku ci linga.

• Seteka oku ecela ohueli yove loku ivaluluka okuti, “vosi yetu tuakuakulueya olonjanja vialua.”—Tiago 3:2.

“Ca leluka oku liecela nda vosi wa lueyi, pole, ca tĩla calua oku ecela nda umosi lika wa lueya. Vepuluvi liaco, oku tava epingilo liongecelo kuenda oku ecela, ci sukila umbombe walua.”—Kimberly.

CECI EMBIMBILIYA LI POPIA: “Tetulula lonjanga ovitangi.”—Mateo 5:25.