ANGA HẼ ONGONGO YI KA PULUKA?
OFELA TU FUIMA
NDAÑO okuti tu sukila ofela, ka tu yi sukila lika oco tu fuime. Oviyepelo viofela, vi teyuila ongongo yetu kolosongo viekumbi vi koka ohele. Nda ka kua kaile ofela, voluali luosi nda mua tokota calua.
Oku Vĩhisiwa Kuofela ku Koka Ohele
Oku vĩhisiwa kuofela ku koka ohele koviluvo vi kasi lomuenyo palo posi. Ndomo ca lekisiwa Locisoko Cuhayele Voluali, etendelo limue litito liomanu vongongo, olio lika li fuima ofela ya yela.
Ofela ya vĩha ya siata oku koka ovovei ka a ecelela oku fuima ciwa uvei wapuvi kuenda ovovei wutima. Oku vĩhisiwa kuofela kua siata oku lingisa okuti, ci soka 7.000.000 komanu va fa selo unyamo lunyamo.
Ongongo Yetu—ya Pangiwa Oco Yamameko
Ongongo yetu ya lulikiwa lonjila yimue okuti yeca ofela ya yela koviluvo viosi vi kasi kilu lieve. Pole, ci tẽliwa lika nda omanu va kuata utate konjila ndomo va vĩhisa ofela. Kũlĩhĩsa ovolandu amue.
Uloño wovisenge woku seleka o dióxido de carbono yofela, wa kũlĩhĩwa ciwa. Pole, oviti via kũlĩhĩsa ciwa ndeci olo mangais vina vi kulila vovisave vi kasi ocipepi lohulo yokalunga, vi pondola oku linga upange wa velapo. Oviti viaco vi kuatisa vali calua koku imũla ofela ya vĩha okuti, ovisenge vi sule.
Akonomuiso a lingiwa ndopo a lekisa okuti, ovikũla vimue vinene vio vokalunga vi upa o dióxido de carbono vesanjavalo kuenda oku yi imũla. Amẽla ovikũla viaco a kuete otulonjeke tueyuka ofela yi va ecelela oku telela kilu liovava ovinãla vialua. Eci amẽla aco a kala ocipãla lohulo yokalunga, otulonjeke tuaco tu tuika kuenje o dióxido de carbono yenda kosi yokalunga. Kuenje oyo yamamako oku kala kosi yokalunga lonjila ya kolapo vokuenda kuanyamo alua.
Uloño woku litumbulula kuesanjavalo lietu kovina vi vĩhisa, wa lekisiwa vokuenda kuefengi lio COVID-19. Kunyamo 2020, eci olonjo vioku panga ovina kuenda oviendelo voluali luosi ka via kalele oku talavaya, ekalo liwa liofela lia mioñoloha lonjanga yalua. Ndomo ca lekisiwa “Lulandu Woluali Watiamẽla Kelalo Liofela wunyamo 2020,” onepa yalua yolofeka va konomuisa, via kuata ofela ya yela calua noke lioku tumbikiwa kuocihandeleko cokuti ka citava oku tunda konjo.
Ceci ci Kasi Oku Lingiwa
Oku enda kupange woku sanda eteku, ale kosikola losikaleta, ci kuatisa oku tepulula oku vĩhisiwa kuofela
Olombiali vi kasi oku amamako ku sapuila vakualonjo vinene vioku pangela ovina oco va tepulule oku vĩhisa ofela. Handi vali, olonoño vi kasi oku amamako oku sanda olonjila viokaliye vioku tepulula oku vĩhisa ofela. Ndeci, kuli onjila yimue yoku talavaya lovipuka vi pongolola inenu okuti vi kala ovina ka vi vĩhisa. Handi vali, olonoño vi vetiya omanu oku endela posi ale kosikaleta okuti ka va endisa oviendelo vi tunda owisi, loku yuvula oku talavaya calua locinyi volonjo.
Olombiali vimue vi kasi oku eca ovitelekelo viokaliye komanu oco ku tepuluiwe oku vĩhisiwa kuofela. Pole, valua handi ka va vi kuete
Pole, ku sukiliwa ovina vialua ndomo ca lekisiwa vulandu umue wunyamo 2022 wa sonehiwa lovisoko violofeka, oku kongelamo Ocisoko Cuhayele Voluali Luosi kuenda Ombango Yoluali Luosi.
Ulandu waco u lekisa okuti kunyamo 2020 onepa yalua yomanu voluali luosi, yi talavaya lovina vi vĩhisa ofela poku teleka. Kolonepa vialua, etendelo litito liomanu ka va kuete epondolo lioku landa ovitelekelo viokaliye, ale olonjila vikuavo vioku telekela.
Esunga Lieci tu Kuatela Elavoko—Ceci Embimbiliya li Popia
“Ca popia Suku yocili, Yehova, Ululiki wovailu kuenda . . . Una wa lulika ongongo lovikũla viaco, Una eca ofela yomuenyo komanu va kasimo.”—Isaya 42:5.
Omo okuti Suku wa lulika ofela tu fuima kuenda oku ñuala ñuala kuovina vi yelisa ofela yaco, o kuete unene kuenda o lekisavo ocisola ka ci pui komanu. Omo liaco, ca sunguluka oku kolela okuti, eye o ka malako ovina vi vĩhisa ofela. Tala ocipama “Suku wa Likuminya Okuti Ongongo Yetu yi ka Puluka.”