Tunde Ketande Toke Koku Yovuiwa Kegito

Omanu va supuluka Ketande va kala lika ecelãla. Pole, vokuenda kuotembo, etendelo liomanu lieya oku livokiya calua. Eci papita 352 kanyamo noke Lietande, kilu lieve kueya oku citiwa ulume umue. Onduko yaye Avirahama. Yehova wa likuminyile okuti Avirahama oka cita omõla ulume o tukuiwa hati, Isake. Ohuminyo yaco yeya oku tẽlisiwa muẽle. Pokati komãla vavali va Isake, Suku wa nõlelepo Yakoba.

Yakoba wa kuata eci ci soka 12 komãla valume kuenda omãla vakãi. Omãla 10 va Yakoba, va kuatela manjavo Yosefe ukuse kuenje vo landisa ndupika Kegito. Noke Fareo weya oku lingisa Yosefe osoma yinene Kegito. Eci vofeka mueya onjala yalua, Yosefe wa seteka vamanjaye oco a kũlĩhĩse ovitima viavo nda via pongoloka. Vokuenda kuoloneke, epata liosi lia Yosefe okuti va Isareli, lieya oku ilukila Kegito. Ovina evi via pita noke yeci ci soka 290 kanyamo okupisa kotembo Avirahama a citiwa.

Vokuenda kuanyamo a soka 215 ana eya oku kuamamo, va Isareli va kala kofeka Yegito. Eci Yosefe a fa va Isareli va linga apika kofeka yaco. Vokuenda kuotembo kueya oku citiwa Mose kuenje Yehova wo nõla oco a yovole va Isareli kupika waco. Ci soka 857 kanyamo atiamẽla kesapulo liaco, lia lomboluiwa vonepa YAVALI.