Epata Lia Yakoba

KŨLĨHISA epata eli linene ndeti. Epata eli omãla ekũi la vavali va Yakoba. Yakoba wa kuatavo omãla vakãi. Ove hẽ wa kũlĩha onduko ya umue pokati kavo? Tu konomuisi ulandu wavo.

Lea wa cita Ruvene, Simeone, Lewi kuenda Yuda. Eci Rahele a limbuka okuti ka kasi oku cita omãla, wa sumuile calua. Kuenje wa eca ufeko waye Biliha ku Yakoba kuenje Biliha wa citila Yakoba omãla vavali valume. Omãla vaco, Dani kuenda Nafitali. Noke Lea wa ecavo ufeko waye Silipa ku Yakoba kuenje Silipa wa citila Yakoba omãla vavali valume okuti Gadi kuenda Asiere. Eci papita otembo yalua Lea wa cita vali omãla vavali valume okuti Yisakare kuenda Sevulono.

Noke Rahele weya oku cita omõla ulume kuenje wo luka Yosefe. Noke tu ka konomuisa vali ovina vialua viatiamẽla ku Yosefe. Momo Yosefe weya oku linga omunu umue wa velapo. Ava ovo omãla ekũi la mosi Yakoba a cita eci a kala ku Lavane isia ya Rahele.

Yakoba wa kuatelevo omãla vakãi, pole Embimbiliya lia tukula lika onduko yomõla umosi pokati kavo. Onduko yaye eye Dina.

Eci Yakoba a tunda konjo ya Lavane oku tiukila ko Kanana, wongolola epata liaye liosi. Wongololavo oviunda viaye violomeme levi violongombe kuenje wa katuka oku linga ungende.

Osimbu va kala vungende woku enda ko Kanana, Rahele wa cita omõla ukuavo ulume. Poku cita omõla waco, Rahele wa tala ohali yalua kuenje wa fa. Pole omõla waco ka file kuenje Yakoba woluka onduko ya Benjamini.

Etu tu sukila oku ivaluka olonduko viomãla va Yakoba momo kepata liaco oko kua tunda ofeka ya Isareli. Apata ekũi la vavali a Isareli a tukuiwa eci Yakoba a cita omãla ekũi kuenda omãla vavali va Yosefe. Noke lioku citiwa kuomãla vaco, Isake wa kala vali lomuenyo anyamo alua kuenje wa kuata esanju lioku mola olonekulu viaye. Pole tu konomuisi eci ca pita lonekulu yaye yukãi Dina.