Yosefe wa Seteka Vamanjaye

YOSEFE wa yonguile oku kũlĩha nda vamanjaye ekũi va pongoloka kovilinga viavo vĩvi. Omo liaco, wa popia lavo hati: ‘Ene vulondavululi. Weyilili oku vanja usuke wofeka yetu.’

Ovo vo kumbulula vati: ‘Sio hacoko. Etu tuakuacili. Vosi yetu tu vamanji. Tua kala ekũi la vavali. Kuasula wa siala la tate, pole ukuavo keko.’

Yosefe wa lilekisa kokuavo ndu okuti ka va kolelele kuenje wa kuata Simeone wo kapa vokayike. Vakuavo wa va tiuwiya oco va ka tuale okulia kimbo liavo. Wa va sapuila hati: ‘Eci vu tiuka neneli manjene kuasula.’

Eci va tiukila ko Kanana va sapuila isiavo Yakoba ovina viosi va pita lavio. Yakoba weya oku sumua calua kuenje wa fetika oku lila loku popia hati: ‘Yosefe keko, Simione layevo wa siala. Omõlange Benjamini ka endi lene.’ Pole eci okulia kuavo kuapua, Yakoba wa tava okuti Benjamini enda lavo Kegito oku kopa okulia.

Eci va pitila Kegito Yosefe wa mola vamanjaye va kala loku iya. Eye wa sanjuka calua poku mola Benjamini. Pole pokati kavo lomue wa limbuka Yosefe momo eye wa kala omunu wa velapo vofeka. Noke Yosefe wa seteka vamanjaye ekũi.

Yosefe wa sapuila ukuenje waye oco a yukise okulia volonjeke via vamanjaye. Pole ovo ka va kũlĩhile okuti vonjeke yamanjavo Benjamini va kapamo okopo yopalata ya Yosefe. Eci va tunda vofeka Yosefe wa tuma akuanje vaye oco va va landule. Eci akuenje va va sanga va pula hati: ‘Nye wa nyaneli okopo yopalata ya cime cetu?’

Ovo va kumbulula hati: ‘Etu ka tua nyanele okopo. Nda umue pokati ketu wa sangiwa lokopo yaco a fe.’

Noke akuenje va fetika oku sandiliya volonjeke viavo kuenje okopo yaco va yi sanga vonjeke ya Benjamini. Akuenje va popia lavo hati: ‘Vosi yene ci tava oku enda pole Benjamini enda letu.’ Nye ovo va linga?

Vosi yavo va tiukila ku Yosefe Kegito la Benjamini. Yosefe wa sapuila vamanjaye hati: ‘Ene tiukili kimbo pole Benjamini o siala lame kuenje o linga upika wange.’

Yuda wa fetika oku popia hati: ‘Ame nda ndi tiukila ku tate pole manjange o siala, isia yange oka fa momo eye u sole calua. Citava okuti ame ndi kala upika wove kuenje manjange o tiukila kimbo.’

Yosefe wa limbuka okuti vamanjaye va pongoloka kovituwa viavo vĩvi. Kaliye tu konomuisi eci Yosefe a linga..