Onepa ya 5

Ocikomo Cocali Coku-linõlela

1, 2. Ongavelo yipi yi komohisa yilinga onepa yoku tungiwa kuetu?

OCO ci tu lomboloke momo nye Suku asiatela oku ecelela ohali kuenda nye a ka panga yapa, tukuete oku limbuka ndamupi eye a tu lulika. Suku wa panga vali okuti oku tuiha lika etimba haicoko kuenda owoño. Wa tuavelavo akalo ovisimilo kuenda olonjongole vikisa.

² Umue cisoko cekunamelo lioku tungiwa kuetu kuovisimilo lolonjongole oku-linõlela. Oco, Suku wa silamẽla vokuetu ocituwa celisanjo liokunõla. Cakala muele ongavelo yikomohisa konepa yaye.

Ndomo Tua Pangiwa

3-5. Tu solele nye oku-linõlela?

³ Tutali ndomo oku-linõlela kulinala lelinga ndomo Suku aecelela ohali. Oku fetika, sokolola ndomo: Ove oyongola oku kuata elisanjo liokunõla eci oka linga ale okupopia, eci oka lia ale okuwala, upange upi oka linga, kuendavo pi loku ka kala ndati? Ale wa yonguile okuti umue wiñi oku tukuila ndaka la ndaka ale elinga kalivala osi omuenyo wove?

⁴ Layumue omunu oñuai osukila okuti elilongiso liomuenyo waye likotuiwa ale liupiwa liosi. Momo nye sio? Mekonda lionjila ndomo Suku a tu panga. Embimbiliya lia tu lomboluila okuti Suku wa lulika omunu ‘lesetahalo liaye,’ kuenda vimue ovituwa via Suku elisanjo liokunõla. (Efetikilo 1:26; Esinumuĩlo 7:6) Eci a lulika omanu, eye wa vaiha ocituwa cimuamue ci komohisa — ongavelo yoku-linõlela. Eli olio limue pasanju momo nye tu sanga okuhongua oku kapiwa vupika lolombiali viukasa.

⁵ Handi, onjongole yelisanjo hacina cimueko ño, omo Suku eye umue Suku yelisanjo. Embimbiliya liti: “Kuenje oku kuli Espiritu lia Ñala haiko ku tavela oku linga omãla vamãle.” (2 Va Korindo 3:17) Okuamisako, Suku wa tuiha oku-linõlela ndonepa yoku tungiwa kuetu. Oku mõla okuti eye wa kũlihile ndomo ovisimilo vietu kuenda olonjongole nda vi talavaya, wa kũlĩhilevo okuti, loku-linõlela, nda tuakala vali lesanju.

6. Lonjila ye Suku a lulika owoño oco tu linge kumuamue loku-linõlela kuetu?

⁶ Kumuamue longavelo yoku-linõlela, Suku wa tuiha oku-linõlela kuoku sokolola, loku pakisa ovina, oku likapelako kuenda okulimbuka cĩvi kueci ciwa. (Va Heveru 5:14) Ndomo, oku-linõlela kukuete ociseveto koku nola kumue kuolondunge. Ka tua pangiwile nda vimue via luvikiyiwa vina ka vi sokolola, lonjongole lakamue. Kuenda ka tua lulikilue oku vangula lovisimĩlo sio, ndeci ovinyama. Koñoño yaco, ocikomo cetu cowoño ca liangiliyiwa oco ci talavaye kumuamue lelisanjo lietu liokunola.

Efetiko Liavelapo

7, 8. Efetiko lipi lia posoka Suku aeca kuvaisia yetu vatete?

⁷ Oku lekisa ndeci Suku akalale locikembe, okupitahãla ongavelo yoku-linõlela, vaisia yetu vatete, Adama la Heva, va tambula cosi umue asukilile lesunga. Vakapiwa vocumbo cimue ca tanda ca setahãla ocitaka. Kipako va kuatele viñi viñi. Vakuatele ovisimilo latimba vialipua, lonjila eyi okuti ka va sukilile oku kuka, okuvela ale oku fa — nda vakala muele hũ. Nda vakuata omãla valipua vana nda vakuatavo elavoko liesanju hailio ka li pui. Kuenda owiñi poku lua nda vakuata upange wusanjuisa noke oku sulako wupongolola ongongo yolungunge vongongo yokaliye. — Efetikilo 1:26-30; 2:15.

⁸ Citiamela kueci ca vaihiwa, Embimbiliya li tondongola: “Suku yu wa ci mõla okuti ovina viosi a lulika via posoka.” (Efetikilo 1:31) Embimbiliya liapopiavo konepa ya Suku: “Lupange waye wa lipua.” (Esinumuĩlo 32:4) Oco, Ululiki waeca kepata liomanu limue efetikilo lialipua. Nda ka liakaile lialipua. Eye wa li situlula oku kala Suku okuete muele ocikembe!

Elisanjo Vokati Kolongave

9, 10. Momo nye oku-linõlela ku sukila oku taliyiwa?

⁹ Puãi, Suku wa yonguile okuti oku-linõlela kukala lolongave sio? Sokolola olupale lumue muñualawa okuti ka muli lacimue ocihandeleko cosipayu, vosi nda valoña kuosiño kuenda olupesi vaseya. Wayonguile okuloña vakalo aco? Sio, momo eci nda cakala ombuanja kuenda ocili muele nda kua supuluka aponda alua.

¹⁰ Cimuamue haico cilieca longavelo ya Suku yoku-linõlela. Elisanjo lioku liamula nda calomboloka ombuanja volupale. Cisukila okuti kukala ovihandeleko viviala ovopange omanu. Ondaka ya Suku yapopia: “Kali ndomãla vamãle, haimo lumue, umãmãle wene ka u ko wihi omoko yoku linga akandu.” (1 Petulu 2:16) Suku o yongola okuti oku-linõlela ku tetuluiwila uwa wavosi. Eye wa loñisa kokuetu helisanjoko liosi, pole elisanjo limue lisule, oku pokola kolonjila viovihandeleko.

Ovihandeleko Vielie?

11. Tua lulikiwila oco tu pokole kovihandeleko vielie?

¹¹ Tua pangiwila oco tu pokole kovihandeleko vielie? Onepa yikuavo yocinimbu ko 1 Petulu 2:16 lilombolola: “Lingi ndakuenje va Suku.” Eci ka ci lomboloka upika wukasa, pole, handi, tua pangiwila oco tukuate esanju liasokapo nda tu pokola kovihandeleko via Suku. (Mateo 22:35-40) Ovihandeleko viaye, okuti viosi via tumbikiwa lomanu visule, vieca olonumbi viavelapo. “Ame ndi Yehova Suku yove, hu longisa eci cu ku kuatisa, hu songuila vonjila ya ku sungulukila.” — Isaya 48:17.

12. Elisanjo lipi liokunola tukuete vokati kolongave viovihandeleko via Suku?

¹² Kuendavo, ovihandeleko via Suku viecelela elisanjo lioku nola vokati kolongave. Eci ci supuluka okuti epata liomanu likala lusima. Sokolola kovilia vialitepa, uwalo, isikilo, ovoloño kuenda ovitumalo koluali luosi. Ocili muele tu yongola okunola kuetu kovolandu aco hambi yomunu wiñi oku tu nolelako.

13. Ovihandeleko vipi vietimba tu sukila oku pokola kuwa wetu muele?

¹³ Lonjila eyi okuti tua lulikiwila oco tu kuate esanju lialua eci tu pokola kovihandeleko via Suku citiamela kovika viomanu. Calisoka lepokolo kovihandeleko via Suku. Ndeci, nda tu pañula ovihandeleko vioku kokela eci cilema posi kuenda nda tua tẽhela kuna kua lepa, tulipunyula ale tu fa. Nda tua pañula ovihandeleko viovetimba lietu kuenda tua liwekapo oku lia, lokunyua, ale oku fuima, tu fa.

14. Tua kũliha ndati okuti omanu ka va lulikiwile oku li tepa la Suku?

¹⁴ Ndeci ocili muele tunde eci tua lulikiwa lolonjongole vioku pokola kovihandeleko vietimba via Suku, tua lulikiwavo lonjongole yoku pokola kovihandeleko viovowoño kuenda vialikongela levi via Suku. (Mateo 4:4) Omanu ka va lulikiwile oco valitepe Lululiki wavo kuenda, handi lopo, okukuata esukiyo. Uprofeto Yeremiya hati: “Okuenda kuomunu ka ku kasi povaka aye muele. Omunu enda ka tẽla eye muẽle oku suñamisa okuenda kuaye. A Yehova, njambule.” (Yeremiya 10:23, 24) Kovaso yaco, kolonjila viosi, omanu va lulikiwila oco va kale vuviali wa Suku, hakowavoko.

15. Ovihandeleko via Suku viakala ocilemo ku Adama la Heva?

¹⁵ Epokolo kovihandeleko via Suku nda hacilemoko kuvaisia yetu vatete. Hambi yaco, nda caeca ekalo liavo liwa kuenda epata liosi liomanu. Nda olohuela viatete vialavele vokati kolongave viovihandeleko via Suku, cosi nda ca kala ciwa. Vocili, cilo nda tukasi voluali lumue lukomohisa luepuiti ndepata liomanu liocisola ca likongela! Nda ka kuakale ndaño evĩho, ndaño ohali, ndaño oku fa.

[Elitalatu kemẽla 11]

Ululiki waeca efetiko lialipua komanu

[Elitalatu kemẽla 12]

Wa yonguile okuendisa ekãlu nda ka kua kale ocihandeleko cosipayu?