Okupa Esilivilo Kovina vi Letiwe

MOMO LIE o kuetele oku lekisa ovina vi letiwe koku longisa kuove? Momo oku ci linga, ci lingisa okuti elilongiso liove li kala limue okuti kupiwa vali esilivilo. Yehova Suku la Yesu Kristu va lekisa ovina vi muiwa lovaso, kuenje etu tu pondola oku lilongisila kokuavo. Eci ovina vi letiwe vi tokekisiwa londaka yi popiwa, ovina vi lomboluiwa vi tambuiwila volonepa vivali vietimba lietu, vovatũi lo vovaso. Eci ci kuatisa oku vetiyila ovisimĩlo violonjeveleli viove kueci ci kasi loku lomboluiwa kuenda ceca ongusu kocisimĩlo ca lekisiwa. Ndamupi hẽ o pondola oku kongela ovina vi muiwa lovaso vupange wove woku kunda olondaka viwa? Ndamupi hẽ o pondola oku kolela okuti o kasi loku vi lekisa ciwa?

Ndomo Alongisi va Velapo va Lekasaile Ovina vi Letiwe. Poku longisa ovina vi kuete esilivilo linene, Yehova wa lekisa ovina vi letiwe okuti ca tĩla oku vi ivala. Vuteke umue Yehova wa sapuila Avirahama oco a tundile posamua kuenje wa popia laye hati: “Vanja handi kilu, tenda olombungululu nda o ci tẽla oku vi tenda. Kuenje wo sapuila hati, haico ci kala ombuto yove.” (Efet. 15:5) Ndaño okuti ohuminyo yaco ya molẽhele soketi ka yi tẽlisiwa vocisimĩlo comunu, Avirahama wa vetiyiwa oku kolela ku Yehova. Kepuluvi limue likuavo, Yehova wa tumĩle Yeremiya oku enda konjo yutungi wolombia oco aka tale ndomo eye a tunga olombia poku pengulula ciwa otuma. Helongisokuolio liatiamẽla kunene Ululiki a kuetele omanu! (Yer. 18:1-6) Kuenda ndamupi hẽ Yona nda a tẽla oku ivala elongiso liohenda Yehova o longisila volungu? (Yona 4:6-11) Yehova toke muẽle wa sapuila ovaprofeto vaye oco va linge ocindekaise cimue ci lekisa olondaka viovitumasuku poku ci lekisila kovikuata vimue via sunguluka. (1 Olos. 11:29-32; Yer. 27:1-8; Esek. 4:1-17) Ovina viatiamẽla ko tavernakulu kuenda konembele, ovina vimue okuti vi tu kuatisa oku kuata elomboloko liovina viokilu. (Va Hev. 9:9, 23, 24) Suku wa lekasailevo ovinjoinjoi poku sapula ovina vi kuete esilivilo linene.​—Esek. 1:4-28; 8:2-18; Ovil. 10:9-16; 16:9, 10; Esit. 1:1.

Ndamupi Yesu a lekisa ovina vi muiwa lovaso? Eci va Fariseo kumue locisoko ca Herode va seteka oku u yonja oco a popie cimue cu pisa, Yesu wa pinga oco vo nenele ocingangu cimue colombongo, kuenje wa va lekisa ociluvialuvia ca Kaisare ca kala vocingangu caco. Noke wa popia lavo hati, evi via Kaisare vi eci ku Kaisare, pole evi via Suku vi eci ku Suku. (Mat. 22:19-21) Poku tu longisa oku vumba Suku la cosi tu kuete, Yesu wa lekisa ukãi umue ocimbumba osuke vonembele, okuti ocilumba caye ca kala ño alusendu avali, okuti ovio lika a kala lavio. (Luka 21:1-4) Kepuluvi limue likuavo, eye wa lekisa okamõla kamue katito ndongangu yoku omboka kuenda yoku liketisa. (Mat. 18:2-6) Eye muẽle wa lekisavo ongangu yoku liketisa poku sukula olomãhi violondonge viaye.​—Yoa. 13:14.

Oku Lekisa Ovina vi Letiwe. Etu ka tu tẽla oku sapula ovina vimue lovinjoinjoi ndeci Yehova a linga. Pole, valivulu Olombangi via Yehova mu sangiwa oviluvialuvia vivetiya ovisimĩlo. Oviluvialuvia viaco via kapiwilamo oco vi kuatise omanu vakuanjongole oku tala ndomo Ofeka Yelau ya likuminyiwa Vondaka ya Suku yika kala. Kelilongiso Liembimbiliya ci tava okuti ove o tiamisila ocisimĩlo condonge kociluvialuvia cimue ci likuata leci ci kasi loku longisiwa kuenda oku u pula oco a lombolole eci eye a lete. Ocili okuti eci ovinjoinjoi vimue via lekisiwa kuprofeto Amosi, Yehova wa pula hati: “Amosi o lete nye?” (Amosi 7:7, 8; 8:1, 2) Ove ci tava okuti o lingavo apulilo a soka nda-a poku tiamisila ovisimĩlo viomanu koviluvialuvia vi sangiwa velivulu, via kapiwilamo ndekuatiso kelilongiso.

Nda wa soneha olokonda vimue, ale wa taya ulala umue u lekisa otembo ovina vimue vi silivila via pita, ci kuatisa omanu oku kuata lonjanga elomboloko liovitumasuku vimue, ndeci “olotembo epanduvali” via tukuiwa kelivulu lia Daniele 4:16 kuenda “akũi epanduvali kolosemana” via tukuiwa kelivulu lia Daniele 9:24. Ovina viaco evi, via siata oku molẽha calua valivulu etu elilongiso.

Kelilongiso liepata, poku lombolola ovina ndeci otavernakulu, onembele yo ko Yerusalãi, kuenda ocinjoinjoi conembele Esekiele a mõla, ci leluka vali oku kuata elomboloko liaco nda wa lekisa ociluvialuvia cimue ale o mapa. Evi vi sangiwa velivulu Estudo Perspicaz das Escrituras, lo vo apêndice yi sangiwa Vembimbiliya Tradução do Novo Mundo das Escrituras Sagradas com Referências kuenda vatendelo añi añi Utala Wondavululi.

Poku tanga Embimbiliya lepata liove, upa ekuatiso liwa kolo mapa. Kũlĩhĩsa ungende Avirahama a linga oku tunda ko Uri oku enda ko Harane yu a enda toke ko Betele. Konomuisa onjila va Isareli va pita oku tunda ke Egito oku enda Kofeka Yohuminyo. Sandiliya onepa epata lepata pokati ka va Isareli va tambula ndocipiñalo cavo. Konomuisa oku tanda kuofeka Salomone a vialele. Kũlĩhĩsa onjila Eliya a pita poku tila ko Yesirele oku pita ko Beresieva toke vekalasoko eci Isevele o saluisamo. (1 Olos. 18:46–19:4) Sandiliya ovambo lalupale Yesu a kundila. Kuama ovongende vupostolo Paulu ndomo ca sonehiwa kelivulu Liovilinga.

Ovina vi muiwa lovaso viwa koku kuatisa olondonge Viembimbiliya oku kũlĩha ndomo ekongelo li talavaya. Ove ci tava okuti o lekisa kondonge yove ulandu wovipama viohongele yimbo ale viohongele yofeka kuenda oku u sapuila eci ca siata oku lomboluiwa kolohongele viaco. Valua va siata oku komõha eci va nyula Onjango Yusoma, ale ceci va nyula yimue o filiale Yolombangi via Yehova. Eyi yi pondola oku kala onjila yimue yiwa yokupa vutima womanu ocisimĩlo cĩvi kueci catiamẽla kupange wetu kuenda kocipango cawo. Poku lekisa komanu Onjango Yusoma, lekisa ndomo oyo ya litepa lovitumãlo vikuavo viefendelo. Lombolola okuti oyo ocitumãlo cimue comboka okuti ciwa oku lilongisilamo. Lekisa ovina viatiamẽla vali kupange wetu woku kunda, ndeci ocitumãlo coku kapa alivulu, olo mapa viocikanjo, kuenda ovikasia vioku kapa olombongo (okuti via litepa lalonga ana a siata oku pitisiwa oco pa kapiwe ovilumba).

Kocitumãlo o kasi nda kuli olo video vina via siata oku pongiyiwa lonumbi Yosungu Yolombangi via Yehova, vi lekisa oco o kuatise omanu oku kolela Kembimbiliya, loku kuatisa olondonge oku kũlĩha ovopange Olombangi via Yehova, kuenda oku vetiya ava va vi tala oku kapako olonumbi Viembimbiliya vomuenyo wavo.

Oku Lekisa Ovina vi Letiwe Komanu Valua. Nda via pongiyiwa ciwa kuenda via lekisiwa ciwa, ovina vi muiwa lovaso vi pondola oku kala ekuatiso limue linene koku longisa ocimunga cinene comanu. Ovina vi muiwa lovaso via siata oku pongiyiwa muiñi muiñi locimunga cukuenje wa kolelua haeye wa lunguka.

Vocipama celilongiso Vutala Wondavululi mua siata oku kongeliwa ovina vi muiwa lovaso ndeci oviluvialuvia ale olofoto. Usongui ci tava okuti o vi tukula poku ivaluisa etosi limue lia velapo. Cimuamue haico catiamẽla kelivulu lia siata oku kuamiwa Velilongiso Lielivulu Vekongelo.

Olohundo vimue viowiñi, vi kisika oku lekisa ovina vimue vi muiwa lovaso poku lombolola atosi amue a sangiwamo. Pole, ku tẽlisiwa vali uwa wa velapo nda wa tiamisila ovisimĩlo viomanu Vembimbiliya, momo valua pokati kolonjeveleli vaka kuata Embimbiliya liavo peka. Nda kepuluvi limue wa limbuka okuti ci sukila oku lekisa ociluvialuvia cimue ale okapapelo kamue ka sonehiwa oco o pitiye etosi limue, ale atosi amue a velapo a sangiwa vohundo, konomuisa ciwa tete, oco o kolele okuti ovina viaco vika pondola oku muiwa ciwa (ale oku tangiwa ciwa) lomanu va sangiwa kulala wa sulako wocitumãlo cohongele. Ovina viaco evi te via kuamiwa ño loku pita pokati.

Ocimãho cetu koku lekisa ovina vi letiwe poku vangula kuenda poku longisa, hakutalulako omanu. Ovina vi muiwa lovaso eci vi lekisiwa, vi kuete oku eca ongusu kovisimĩlo vi sesamẽla evetiyo lia velapo. Akuatiso aco a tẽlisa ocimãho cimue ciwa eci a kuatisa oku situlula ciwa ondaka ya popiwa, okuti ci leluka vali oku kuata elomboloko liayo, ale ceci akuatiso aco a eca uvangi wesilivilo lieci ca popiwa. Nda via sunguluka kuenda via lekisiwa ciwa, ovina vi letiwe vi pondola oku vetiya cocili olonjeveleli okuti vi patekela ovina viaco via lekisiwa kuenda ondaka yelongiso yatiamẽlako vokuenda kuanyamo alua.

Ovatũi kuenda ovaso, a kuete esilivilo liocili koku lilongisa. Ivaluka ndomo Alongisi va velapo va vetiya omanu oku yeva lovatũi avo kuenda oku vanja lovaso avo ovina ovo va lekisa, kuenje likolisilako oku va setukula kelikolisilo liove lioku vetiya omanu.