Ocipama 17

Lekisa Ovituwa Vitaviwa la Suku Konjo

1. Oku kapako olonumbi vi sangiwa Vondaka ya Suku, ndamupi ca siata oku kuatisa olohuela vialua?

YEHOVA eye Usovoli wolohuela, omo liaco Ondaka yaye yeca olonumbi viwa viatiamẽla kepata. Omo lioku kapako olonumbi Viembimbiliya omanu valua va siata oku pamisa ciwa olohuela viavo. Eci ci sanjuisa vali ceci okuti, valua va kala ale pamosi pole ka va tokekisile olohuela, va siata oku vetiyiwa oku kuela okuti ci kũlĩhĩwa muẽle lombonge. Vakuavo va siata oku siapo aluvale. Alume vana okuti kosimbu va temẽle calua lakãi vavo kuenda lomãla vavo, va siata oku lilongisa oku omboka.

2. Vomuenyo wepata Wukristão mua kongela nye?

² Vomuenyo wepata Wukristão mua kongela ovina vialua ndeci, ndomo tu tenda oku amamako kuolohuela, eci tu sesamẽla oku linga koku tẽlisa ovikele vietu vepata kuenda oku linala ciwa la vakuetu vepata. (Va Efeso 5:33–6:⁠4) Ndaño okuti tua kũlĩha eci Embimbiliya li popia catiamẽla komuenyo wepata, oku kapako alungulo Embimbiliya ocina cimue cikuavo. Lomue pokati ketu o yongola oku kala nda vana Yesu a pisa omo lioku likala oku kapako ovihandeleko via Suku. Ovo, luhembi walua, va popaile okuti oku vumba lika Suku ci tẽla. (Mateo 15:​4-9) Etu ka tu yongola lika oku vumba Suku pole ka tu ci kapiko vepata lietu muẽle. Puãi, tu yongola oku lekisa okuti tu kasi muẽle ocili oku vumba Suku, okuti oyo “onganyu ya piãla.”​​—⁠1 Timoteo 5:4; 6:6; 2 Timoteo 3:⁠5.

Olohuela hẽ Vika Amamako Vokuenda Kuotembo Yiñami?

3. (a) Nye ca siata loku lipita lolohuela vialua, pole nye tu kuete oku nolapo oku linga? (b) Lembimbiliya liove tambulula apulilo a kuaĩmo.

³ Eteke olio eteke, olohuela via siata oku lekisiwa okuti via hongua vali enene. Olohueli vimue okuti vi kasi ale pamosi vanyamo alua, via siata oku nõlapo oku litepa, loku kuela omunu ukuavo. Ca siatavo oku yeva okuti amalẽhe va likuela ndopo va litepa vokuenda kuotembo yimue yitito. Kokuetu eci vakuetu va linga hacimueko, pole tu yongola lika oku sanjuisa Yehova. Tu kũlĩhĩsi apulilo amue kuenda Ovisonehua vi kuaĩmo. Tu kũlĩhĩsivo eci Ondaka ya Suku yi popia catiamẽla kotembo yiñami olohuela vi kuete oku tumãla.

Eci ulume lukãi va likuela, va kuete oku lavoka oku kala pamosi vokuenda kuotembo yiñami? (Marko 10:​6-9; Va Roma 7:​2, 3)

Esunga lipi ci tava oku litepa loku kuela omunu ukuavo, okuti li taviwa kovaso a Suku? (Mateo 5:​31, 32; 19:​3-9)

Cipi ocisimĩlo ca Yehova catiamẽla koku litepa kuna okuti ka ku taviwa Londaka yaye? (Malakiya 2:​13-16)

Embimbiliya hẽ li lombolola okuti oku litepa okuo onjila yoku tetulula ovitangi violohuela? (1 Va Korindo 7:​10-13)

Ovitangi vipi viecelela oku litepa volohuela? (Osamo 11:5; Luka 4:8; 1 Timoteo 5:⁠8)

4. Momo lie olohuela vimue vi kalela otembo yalua?

⁴ Olohuela vimue vi kasi loku litunda ciwa kuenda vi kasi loku amamako. Momo lie? Ocina cimue ca velapo, oku sinjapo toke eci kavali kavo va kula. Pole, oku sanga ukuanjo umue okuti olonjongole viene vimuamue, haeye o pondola oku tetulula laye ovitangi locili, ci kuete vali esilivilo lialua. Ocina ca velapo vali oku sanga omunu o sole Yehova haeye wa sumba Ondaka yaye ndono yoku tetulula ovitangi. (Osamo 119:​97, 104; 2 Timoteo 3:​16, 17) Omunu waco kaka kuata ovisimĩlo viokuti nda olohuela ka vi kasi okuenda ciwa oka sima oku litepa. Eye kaka tenda oku lueya kukuanjo yaye ndesunga limue lioku tila oku tẽlisa ovikele viaye. Pole oka liyaka lovitangi, kuenda oka sanga olonjila viwa vioku vi tetulula.

5. (a) Epokolo ku Yehova lia kongeliwa ndati volohuela? (b) Ndaño ceci kuiya oku kuamawa, oku kakatela kolonumbi via Yehova kuiyilila ovowa api?

⁵ Satana o sima okuti eci tu tala ohali tu siapo olonjila via Yehova. (Yovi 2:​4, 5; Olosapo 27:11) Pole, Olombangi vialua via Yehova via siata oku talisiwa ohali omo lioku kuamawa lavakuanjo yavo, ka va siatele oku siapo ovikele viavo violohuela. Ovo va siata oku amamako lekolelo liavo ku Yehova kuenda oku pokola kovihandeleko viaye. (Mateo 5:37) Vamue okuti vamamako loku pandikisa va kuata esanju lialua poku mõla okuti vakuanjo yavo va likongela kokuavo, koku fendela Yehova noke yoku kuamawa vokuenda kuanyamo alua. (1 Petulu 3:​1, 2) Konepa Yakristão vana okuti vakuanjo yavo ka va lekisile okuti va yongola oku pongoloka, ale va va siapo omo lioku fendela Yehova, ovo va kũlĩhavo okuti va sumũlũisiwa omo lioku kapako ovituwa vi taviwa la Suku konjo​​—⁠Osamo 55:22; 145:⁠16.

Omunu Lomunu a Tẽlise Ocikele Caye

6. Oco olohuela viende ciwa, aliangiliyo api a kuete oku sumbiwa?

⁶ Ocili okuti oku kuata olohuela vimue vienda ciwa, ku sukiliwa vali ovina vimue okuti oku kala lika pamosi ci sule. Ocina cimue ci sukiliwa kolohueli, esumbilo kocikele coku tumĩla ndomo ca tumbikiwa la Yehova. Eci cinena eliangiliyo liwa kuenda oku kolapo vepata. Kelivulu lia 1 Va Korindo 11:​3, tu tangako hati: “Utue wulume Kristu; utue wukãi ulume waye; utue wa Kristu Suku.”

7. Oku songola epata te kuendisiwa ndati?

⁷ Wa limbuka ocina catete ca tukuiwa vocinimbu eci? Ocina catete ca tukuiwa ceci okuti ulume o kuete Utue waye, okuti Kristu una eye a kuete oku pokola. Eci ci lomboloka okuti ulume o kuete oku songola ciwa poku lekisa ovituwa via Yesu. Kristu o pokola ku Yehova, loku lekisa ocisola kekongelo kuenda otata ekongelo liaco. (1 Timoteo 3:15) Eye toke muẽle “wa li liecela.” Yesu hukuacipululuko okuti vakuavo ka va kapeleko, pole ‘wonjuka haeye wa liketisa vutima’ kuenda ava vosi va kasi loku songuiwa laye ‘va sanga ekavuluko vovitima viavo.’ Eci ulume a tata lonjila eyi epata liaye, o lekisa okuti wa pokola koku tumĩla kua Kristu. Ukãi Ukristão o pondola oku sanga esilivilo kuenda ekavuluko poku litavatava loku pokola kulume waye.​​—⁠ Va Efeso 5:​25-33; Mateo 11:​28, 29; Olosapo 31:​10, 28.

8. (a) Momo lie volonjo vimue olonjila Viakristão vioku tetulula ovitangi vi molẽhela soketi ka vi kuete esilivilo? (b) Nye tu kuete oku linga eci tu lipita locitangi caco?

⁸ Ocili okuti, ku keya ovitangi. Pamue omunu o kala locikumbiti omo lioku lunguiwa la vakuavo osimbu handi umue ukuepata ka fetikile oku kapako olonumbi Viembimbiliya. Kovituwa viwa viocili pamue ka ku molẽha okuti kuiyilila ovowa. Tua kũlĩha okuti Embimbiliya li tu kisika oku siapo “ocikumbiti lonyeño lekaka kuenda onjuela.” (Va Efeso 4:31) Nda okuti vamue vakuepata ocina cimue ka ca va lombolokele ciwa, nye ci kuete oku lingiwa? Yesu ka setukuile vana vo saluisa loku u sepula, pole wa talamẽla Isiaye. (1 Petulu 2:​22, 23) Omo liaco, eci vonjo muiya ovitangi, lekisa ovituwa via Suku poku likutilila kokuaye loku pinga ekuatiso, okuti ku kuama olonjila vĩvi violuali.​​—⁠Olosapo 3:​5-7

9. Omo okuti oku sanda ño akulueya hacoko, alume vamue Akristão va lilongisa oku linga nye?

⁹ Apongoloko ka a lingiwa lonjanga. Pole alungulo Embimbiliya a kuete esilivilo nda a kapiwako lepandi kuenda lolondunge. Alume valua va siata oku limbuka okuti olohuela viavo vi fetika oku mioñoloha, eci va fetika oku sola ndomo Kristu a tata ekongelo. Vekongelo ka muli omanu va lipua. Pole, Yesu o sole ekongelo, kuenda wa eca ongangu yiwa, kuenda otukula Ovisonehua oco vi kuatise koku mioñoloha. Toke muẽle wa eca omuenyo waye omo liekongelo. (1 Petulu 2:21) Ongangu yaye ya siata oku vetiya alume valua Akristão oku songola ciwa epata liavo loku eca ekuatiso liocisola oco vepata liavo mu kale uwa. Kuenje kuiyilila ovina viwa, okuti ekambo lioku livanguisa pokati loku lipisa hacoko.

10. (a) Ndamupi ulume ale ukãi ndaño va popia hati Akristão va tĩlisa omuenyo wa vakuavo vonjo? (b) Oco ku mioñoluiwe ekalo liaco nye ci kuete oku lingiwa?

¹⁰ Ci kala hẽ ndati nda ulume ka kapiko ovina vi sukiliwa viepata liaye ale ka sokiya oku sapela lepata liaye catiamẽla Kembimbiliya lovopange akuavo? Ale ci kala hẽ ndati nda ukãi ka kuatisa kuenda ka lekisa ovituwa via Suku? Vamue va sanga ovowa eyilila koku sapela locili kuenda lesumbilo eci catiamẽla kovitangi viepata. (Efetikilo 21:​10-12; Olosapo 15:22) Ndaño okuti ovina viyililako havioko via lavokawale, pole vosi yetu omunu lomunu o pondola oku kuatisa oco vonjo mu kale ekalo liwa, poku lekaisa apako Espiritu lia Suku vomuenyo wetu, loku kapako locisola vakuavo vepata. (Va Galatia 5:​22, 23) Tuka amamako nda ka tua lavokaile okuti vakuetu va linga ocina cimue. Pole, etu muẽle tu kuete oku likolisilako oku panga onepa yetu, poku lekisa okuti tua kapako ovituwa via Suku.​​—⁠Va Kolosai 3:​18-21.

Koku Kusangiwa Atambululo

11, 12. Aliangiliyo api Yehova a linga voku tu kuatisa oco omuenyo wepata wende ciwa?

¹¹ Omanu va siata oku lupukila kolono vialua oco va kuate elungulo liatiamẽla kovitangi viavo viepata. Pole tua kũlĩha okuti Vondaka ya Suku muli alungulo a velapo. Tu lekisa olopandu vietu omo okuti vonduko yocisoko caye ca palo posi, Suku o tu kuatisa oco tu kapeko olonumbi viaco vomuenyo wetu. Ove hẽ o kasi okupa esilivilo lia velapo kekuatiso eli?​​—⁠Osamo 119:​129, 130; Mika 4:⁠2.

¹² Anga hẽ wa siata oku sokiya otembo olonjanja viosi oco o linge elilongiso liepata okuti hakuendaendako lika kolohongele viekongelo? Apata vana va ci lingainga va siata oku likuata vali omunga vefendelo. Omuenyo wavo vepata u kala vali ciwa eci va kuama ovihandeleko Viondaka ya Suku.​​—⁠ Esinumuĩlo 11:​18-21.

13. (a) Nda okuti tu kuete apulilo atiamẽla kovitangi viepata, kupi tu kuete okupa ekuatiso li sukiliwa? (b) Kovina viosi tu nõla oku linga tu kuete oku lekisa nye?

¹³ Ci tava okuti o votola apulilo atiamẽla komuenyo wepata. Ndeci: Cipopiwa hẽ ndati catiamẽla koku sandiliya ovihemba vi tateka oku cita? Anga hẽ oku pulumula olonjanja viosi ku kuete esunga? Nda okuti omõla umue ka lekisa ombili kovina viespiritu, toke petosi lipi ci kuete oku kisikiwa okuti o panga onepa lepata vefendelo? Alua pokati kapulilo ava a siata oku kũlĩhĩsiwa valivulu a sandekiwa Lolombangi via Yehova. Lilongisa oku konomuisa alivulu a kuatisa kelilongiso Liembimbiliya, oku kongelamo olo Índices, oco o sange atambululo. Nda okuti ku kuete alivulu a ilikiwa vo Índice kũlĩhĩsa vociseleko calivulu Vonjango Yusoma. Ale ci tava okuti o kuata alivulu aco vo computador yove. Kuenda pamue o sapela la umue Ukristão waloñoloha cikale ulume cikale ukãi catiamẽla kapulilo ove. Pole, ku ka lavoke olonjanja viosi etambululo limue li ku sapuila muẽle eci o kuete oku linga, leci o kuete oku yuvula. Olonjanja vialua eci ci nõliwapo oku lingiwa, ci kasi vocikele cove kumue lukuanjo yove. Omo liaco nõla ovina vi lekisa okuti wa kapako ovituwa viwa via Suku okuti hakowiñiko lika pole lokonjovo le.​​—⁠Va Roma 14:19; Va Efeso 5:⁠10

Apulilo Voku Pitulula

• Ndamupi epokolo ku Yehova lia kongeliwa koku tẽlisa ovikele violohueli?

• Eci tu liyaka lovitangi viepata nye cika tu kuatisa oco tu linge eci ci sanjuisa Suku?

• Ndaño okuti vamue vepata va lueya, nye tu kuete oku linga oco tu mioñolole ekalo?

[Elitalatu kemẽla 155]

Oku tumĩla kulume te ku lekisa ovituwa via Yesu

[Elitalatu kemẽla 157]

Oku kuata elilongiso liepata olonjanja viosi ci kuatisa koku likuata omunga