Part 7
Helie Okuãi Etavo Liocili?
1. Nye tu sukila oku linga oco tu sanjuise Suku ?
OCO tu kuate ukamba wocisola la Suku, ka ci tava okuti tu panga onepa ketavo liesanda. Tu kuete oku kapako etavo liocili. Koloneke vilo olohuluwa violohuluwa viomanu voluali va kasi loku ci linga.
2. Olombangi via Yehova vi sangiwa pi, kuenda upange upi va kasi loku linga?
2 Ndomo Embimbiliya lia ci popia afendeli vocili okuti “owiñi wakahandangala,” va tunda ‘kolofeka viosi kuenda vakuapata omanu vakualimi osi.’ (Esituluilo 7:9) Kueci ci soka 235 kolofeka, olohuluwa Violombangi via Yehova vi kasi loku kuatisa vakuavo oku lilongisa olonjila viocisola ca Yehova kuenda olonumbi viaye.
Oku Limbuka Afendeli Vocili
3. Olombangi via Yehova vi kasi oku fendela elie, kuenda efendelo lipi ovo va yuvula?
3 Olombangi via Yehova via kũlĩha okuti Yehova eye lika o sesamẽla oku fendeliwa. Ovo va likala oku fendela oviteka ale oviluvialuvia viatavo esanda. (1 Yoano 5:21) Ka va fendela ava vafa, ale oku panga onepa kovipito vikuavo violuali vi kokiwa letavo liesanda kuenda “ovilongua vieliapu.” (1 Timoteo 4:1) Omo liaco, ovo va eca elembeleko kuava va fisa poku va lomboluila ohuminyo ya Suku yokuti Vofeka yelau kuka kala epinduko liava vafa.—Yoano 5:28, 29; Ovilinga 24:15.
4. Ekalo lipi liomanu va Suku kueci catiamẽla kumbanda?
4 Olombangi via Yehova ka vi kuete lacimue catiamẽla kumbanda ale oviteka, momo via kũlĩha okuti ovina evi via tunda Keliapu. Ka va kolela kumbanda ndeteyuilo, pole ovo va kolela lika ku Yehova. —Olosapo 18:10.
5. Kovina vipi Olombangi via Yehova “ka vi pangi onepa yoluali”?
5 Yesu wa sapuila olondonge viaye “okuti havakualualiko.” (Yoano 17:16) Yesu koloneke viaye wa likala oku panga onepa kopulitika. (Yoano 6:15) Cimuamue haico, Olombangi via Yehova ka vi pangi onepa kopulitika yofeka kuenda kovisoko viuyaki woluali lulo. Pole, ovo va feta elisimu kuenda va sumbila ovihandeleko viofeka omu ovo va tunga. —Yoano 15:19; Va Roma 13:1, 7.
6. Olonumbi vipi omanu va Suku vakuãi viatiamẽla kolohuela kuenda koku litepa?
6 Omo lioku pokola kocihandeleko combiali, Olombangi via Yehova viecelela okuti olohuela viavo vi tokekisiwa lombiali. (Tito 3:1) Poku pokola kolonumbi via Suku ovo va yuvula oku kuela oluvale. (1 Timoteo 3:2) Omo okuti va kapako olonumbi Viembimbiliya komuenyo wavo, olohuela viomanu va Suku ka vi kala kohele yoku litepa.
7. Ndamupi Olombangi via Yehova vi lekisa ocisola komunu lokuavo?
7 Olombangi via Yehova vi lekisa ocisola komunu lokuavo. Ocisola eci, locisola cavo ku Suku, ci va kapa vomunga yimosi yu manji ndaño okuti ha vakuepata limosiko ale ofeka. Eci ku molẽha cimue ocitangi ale otembo yesukila, Olombangi via Yehova vi yayulako koku eca ekuatiso ku vamanjavo. Ovo, va li lekisila ocisola pokati ndomo ovo va kasi.—Yoano 13:35.
8. Ovina vipi vĩvi omanu va Suku va yuvula oku linga?
8 Omanu va Suku va likolisilako oku kala vakuacili kuenda oku sunguluka. Va yuvula oku nyana, uhembi, ukahonga, luholua kuenda ovituwa ka via sungulukile vioku nyanela vondando. Alume vakuele ka va veta vali akãi vavo. Eci handi ka va lingile Olombangi via Yehova, vamue va lingaile ovina evi, pole lekuatiso lia Yehova va liwekapo. Ovo “va sukuiwa” kovaso a Suku.—1 Va Korindo 6:9-11.
Linga Ocipango ca Suku
9. Nye elivulu limue lia popia catiamẽla katavo okespiritu vo Afrika?
9 Atavo alua va siata oku sima okuti vakuãi ocili. Olonjanja vimue va lekisa ovopange a komohĩsa oco ci kuatise kolohuminyo viavo. Ndeci, catiamẽla kueci va tukula hati atavo o kespiritu vo Afrika, elivulu limue lia popia hati: “Upange ukuombanda ale womunu ukuakusakula, olonjanja vialua wa siata oku piñanyiwa [ lovimunga viokaliye via Kristão]. . . Ovo va eca elungulo kuenda va linga ovina vi komohĩsa. Ovaprofeto voliavo va lota ovinjoi kuenda va eca elomboluilo liolonjoi viaco. Ovo va siata oku linga upange waco owu lovava a sumũlũisiwa locitunda, [água benta] lulela ukola, letiko, lovela, kuenda isensu vioku sakula loku tateka uveyi.”
10, 11. Momo lie koloneke vilo oku linga ovikomo ka ci lekisa okuti etavo liaco litunda ku Suku?
10 Asongui vatavo ava va sima okuti ovikomo viavo vi lekisa okuti etavo liavo lia sumũlũisiwa la Suku. Pole, ovikomo viaco ka vi lekisa okuti etavo liaco lia taviwa la Yehova. Satana weca unene kafendeli vesanda oco va kuate ‘unene woku linga ovilimbu.’ (2 Va Tessalonike 2:9) Pole, Embimbiliya lia popia hati ongavelo yoku linga ovonene yi tunda ku Suku, ndeci awanji ovaprofeto, oku vangula alimi kuenda oku kuata ukũlĩhĩso wa velapo, ‘okuti aka imuha.’—1 Va Korindo 13:8.
11 Yesu wa lungula okuti: “Havosiko va popia lame vati, A Ñala, a Ñala va iñila vusoma wokilu, te u o linga ocipango ca Tate o kasi kilu. Keteke liaco va lua va popia lame vati, A Ñala, a Ñala, ka tua imbaile hẽ owanji wondaka vonduko yove? Oco mopia lavo siti, Sia lo kũlĩhi. Nundi, alondingaĩvi.”—Mateo 7:21-23.
12. Helie oka iñila Vusoma wokilu?
12 Oco hẽ, velie vaka iñila Vusoma wokilu? Vo vana va linga ocipango ca Yehova.
Kunda Usoma wa Suku
13. Koloneke vilo upange upi Suku a eca komanu vaye, kuenda velie va kasi loku ci linga?
13 Cipi hẽ ocipango ca Suku lomanu vaye koloneke vilo? Yesu wa popia hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” (Mateo 24:14) Owu owo upange Olombangi via Yehova va kasi loku linga lombili yalua.
14. Usoma wa Suku hẽ nye, kuenda helie oka viala Vusoma waco?
14 Olombangi via Yehova vi kasi loku kunda Usoma wa Suku, okuti owu Usoma uka viala oluali luosi lesunga. Ovo va kasi oku longisa okuti Yehova wa nõla Yesu Kristu oco a kale Osoma Yusoma wa Suku kumue lo 144.000, va nõliwa pokati kapata omanu.—Daniele 7:14, 18; Esituluilo 14:1, 4.
15. Usoma wa Suku uka nyõlako nye ?
15 Poku kuama Embimbiliya Olombangi via Yehova vi lekisa komanu okuti Usoma wa Suku uka nyõla oluali lũvi lua Satana. Etavo liesanda lika kunduiwa, kumue lalongiso aco ka a sumbila Suku ana a sivaya ño Eliapu! (Esituluilo. 18:8) Ovoviali omanu ana a suvuka uviali wa Suku aka nyõliwavo!—Daniele 2:44.
16. Velie vaka kala vakapiñala ka Yesu Kristu, kuenda pi vaka kala?
16 Handi vali, Olombangi via Yehova vi sapula komanu okuti Yesu Kristu oka nena asumũlũho a komohĩsa ku vosi va linga eci Suku a yongola. Ovo vaka piñala ofeka. Embimbiliya li likuminya okuti: “Eye oka popela osuke eci yi vilikiya, ndaño ohukui lu ka kuete onũatisi. O popela ovimuenyo violosuke.”—Osamo 72:12, 13.
17. Velie okuti ovo lika va kasi loku kunda Usoma wa Suku?
17 Ka kuli lacimue ocimunga cikuavo comanu ci kasi oku linga ocipango ca Suku poku kunda olondaka viwa Viosoma. Te lika Olombangi via Yehova ovo va kasi loku sapula komanu Usoma wa Suku koluali luosi.
[Elitalatu kemẽla 23]
Olombangi via Yehova koluali luosi va kasi vongongela yelitokeko limuamue liumanji