Yesu Kristu Eye Mesiya wa Likuminyiwile

OCO TU kuatisiwe oku limbuka Mesiya, Yehova Suku wa vetiya ovaprofeto va soneha Embimbiliya oku eca alomboluilo atiamẽla koku citiwa, kupange kuenda kokufa Kuonjovoli ya likuminyiwile. Ovitumasuku viaco viosi via tẽlisiwa vu Yesu Kristu. Ovina viosi via sonehiwilemo via tẽlisiwa muẽle. Tu kũlĩhĩsi ovitumasuku via sapuile oku citiwa kua Mesiya kuenda utila waye.

Uprofeto Isaya wa sapuile okuti Mesiya o linga ukuacikoti ca Soma Daviti. (Isaya 9:7) Yesu wa citiwila muẽle kocikoti ca Soma Daviti.—Mateo 1:1, 6-17.

Mika, uprofeto ukuavo wa Suku, wa sapuilevo okuti omõlaco o linga osoma kuenda o citiwila ko “Beteleme Efarata.” (Mika 5:2) Kotembo Yesu a citiwa, kua kala ovaimbo avali londuko ya Beteleme. Limue lia kala konano ocipepi lo Nasara, likuavo lia kala ocipepi lo Yerusalãi ko Yudea. O Beteleme ya kala ocipepi lo Yerusalãi ya tukuiwile hati Efarata. Yesu wa citiwila muẽle vimbo liaco, ndomo ca popiwile.—Mateo 2:1.

Ocitumasuku cikuavo Cembimbiliya ca popele okuti Omõla a Suku o vilikiyiwa oku tunda “ke Egito.” Eci Yesu a kala omõla wa vilikiyiwile muẽle oku tunda ke Egito, pana okuti Herode wa fa ale, oco ku tẽlisiwe ocitumasuku.—Hosea 11:1; Mateo 2:15.

Vomapa yi sangiwa kemẽla 200, ovisonehua vi sangiwa vemẽhi liosapi ya linga hati, “Ocitumasuku” mu sangiwa alomboluilo atiamẽla ku Mesiya. Sokisa ovisonehua evi lovisonehua vi sangiwa vemẽhi liosapi ya linga hati “Oku Tẽlisiwa.” Oku ci linga cika pamisa ekolelo liove koku tẽlisiwa Kuondaka ya Suku.

Poku konomuisa ovisonehua evi, ivaluka okuti vimue pokati kavio via sonehiwa eci handi Yesu ka citiwile. Yesu wa popele hati: “Ovina viosi via sonehelua ame Vovihandeleko via Mose lovaprofeto lolosamo vi lingiwa.” (Luka 24:44) Ndomo wa ci mõla Vembimbiliya liove, ovitumasuku viaco viosi via tẽlisiwa muẽle.