Ndomo Embimbiliya li Tenda Oku Linyala Kuenda Oku Litepa

Yehova o yongola okuti olohueli vi amamako lohuminyo yavo. Poku tokekisa ulume watete lukãi, Yehova wa popia hati: “Ulume o . . . litokeka lukãi waye, kuenje va linga etimba limuamue.” Noke Yesu Kristu wa vokiyako kolondaka viaco hati: “Eci ca tokekisa Suku omunu ka ka ci tepise.” (Efetikilo 2:24; Mateo 19:3-6) Omo liaco, Yehova la Yesu va tenda olohuela ndohuminyo yamamako otembo yosi okuti yi sulila lika nda umue pokati kolohueli wa fa. (1 Va Korindo 7:39) Omo okuti olohuela vi kola, oku linyala ka ku ka tendiwe ndocina cimue ka ci silivila. Yehova ka sanjukila omanu va linyala nda ka pali onumbi Yovisonehua yecelela oku ci linga.​—Malakiya 2:15, 16.

Onumbi yipi Yovisonehua yeca esunga lioku linyala? Yehova o nyale ukahokolo kuenda evĩho liukahonga. (Efetikilo 39:9; 2 Samuele 11:26, 27; Osamo 51:4) Eye o tenda evĩho liukahonga ndumbondo kuenda ecelela okuti omanu va linyala nda umue o kuete esunga liaco. (Ovina via kongeliwa vevĩho liukahonga via lomboluiwa Kocipama 9, kocinimbu 7.) Yehova eca kohueli va lueyela omoko yoku nõla nda o kala lohueli ya lueya ale u tundisa. (Mateo 19:9) Nda ohueli va lueyela yi nõlapo oku linyala, Yehova ka ci suvuka. Pole, vamanji vekongelo ka va vetiya omunu oku linyala. Ohueli va lueyela, citava okuti yamamako oku kala lomunu wa lueya nda eye wa likekembela. Handi vali, ndaño Ovisonehua vi lekisa esunga lioku linyala, omunu lomunu o sukila oku kũlĩhĩsa ovitangi vi iyilila koku ci linga.​—Va Galatia 6:5.

Olonjanja vimue, Akristão vamue va siata oku litepa ale oku linyala lolohueli viavo ndaño umue pokati kavo ka lingile evĩho liukahonga. Embimbiliya li lekisa okuti omunu waco, “ka ka kuele, te oku linala la veyaye.” (1 Va Korindo 7:11) Ukristão waco ka kuete omoko yoku kuela lomunu ukuavo. (Mateo 5:32) Kaliye, kũlĩhĩsa ovina omanu vamue va siata oku tenda ndesunga lioku li tepa.

Oku likala oku tekula epata. Epata limue pamue li kambela eteku kuenda ovina vikuavo vi sukiliwa, omo ulume ka tekula epata ndaño o kuete epondolo liaco. Embimbiliya li popia hati: “Umue nda ka kuatisa . . . vakuanjo yaye, ca lomboloka okuti wa likala etavo liaye, kuenje u ka tavele wo velapo.” (1 Timoteo 5:8) Nda ulume ka pongolola ocituwa caye, ukãi o pondola oku nõla nda o kala lomãla kuenda o litepa lulume waco. Nda Ukristão umue epata liaye li liyeya okuti ka kasi oku va tekula, akulu Vekongelo va sukila oku kũlĩhĩsa ondaka yaco lutate. Omunu wosi o likala oku tekula epata liaye, te o tundisiwa vekongelo.

Oku vetiwa. Ohueli ya tema calua haiyo yi veta ño, yi kapa kohele ekalo kuenda uhayele wohueli yaye. Nda ohueli Ukristão yi talisa ohali ukuavo, akulu vekongelo va sukila oku kũlĩhĩsa ocitangi caco. Omunu wosi ukuacinyeñousa haeye o veta ño calua, te o tundisiwa vekongelo.​—Va Galatia 5:19-21.

Oku tateka ovina viespiritu. Olohueli vimue, via siata oku tateka alume ale akãi vavo oku linga ovina viespiritu, ale vi siapo oku kuama olonumbi via Suku. Vocitangi caco, ohueli yi kasi oku tatekiwa oyo yi nõla nda yi litepa omo lioku “pokola ku Suku, [okuti] komanu hakoko.”​—Ovilinga 5:29.

Ndaño latosi a-a tua konomuisa ndeti, eci ku mõleha ovitangi lomue o kuete omoko yoku vetiya ukuavo oku litepa ale oku kala lohueli yaye. Handi vali, akulu vekongelo kuenda omanu vakuavo va pama kespiritu, ndaño va kuete omoko yoku eca ekuatiso lolonumbi Viembimbiliya, va yuvula oku kũlĩhĩsa ovina viosi via siata oku pita pokati kukãi lulume waye. Yehova eye lika o lete ovina viosi. Nda ukãi ale ulume Ukristão o luluviya ovitangi oco a kuate esunga lioku litepa lohueli yaye, eye ka lekisa esumbilo keliangiliyo liolohuela. Yehova o kuete unene woku kũlĩha esunga lieci tu yonguila oku litepa ndaño tua limbika esunga liaco. “Ku Suku ka kuli ociluvo ca salamisua, puãi viosi vi situluiwa, kuenje vi moleha kovaso ona o laika oku tu tetuluila.” (Va Heveru 4:13) Pole, nda ohueli yimue ya siata ño oku tala ohali otembo yosi, lomue o kuete omoko yoku u tateka nda yi nõlapo oku litepa. Oku sulako, kũlĩhĩsa okuti, “etu vosi tu [ka] talama vekanga lia Suku.”​—Va Roma 14:10-12.