Yosiya wa Kuatele Akamba Vawa

Ove hẽ, o sima okuti ka ca lelukile oku linga ovina via sunguluka?— Omanu valua va sima okuti, ka ca lelukile. Embimbiliya li tu sapuila okuti, ka ca lelukile umalẽhe Yosiya oku linga eci ca sunguluka. Pole, wa kuatele akamba vawa vo kuatisa. Tu konomuisi ulandu watiamẽla ku Yosiya, kuenda kakamba vaye.

Isia ya Yosiya wa kala Amoni, osoma yo ko Yuda. Amoni wa kala lovituwa vivĩ kuenda wa enda oku fendela oviteka. Eci isia ya Yosiya a fa, eye, wa linga osoma yo ko Yuda. Pole, wa kuata lika anyamo ecelãla. Ove hẽ, osima okuti Yosiya wa kuatavo ovituwa vĩvĩ?— Sio, ka kuatele!

Yosiya osimbu a kala handi umalẽhe, wa yonguile oku pokola ku Yehova. Eye, wa linga ukamba lomanu vana okuti va solele Yehova. Ovo va kuatisa Yosiya oku linga ovina via sunguluka. Velie va kala akamba va Yosiya?

Umue pokati kakamba vaye, Sofoniya, una wa kala uprofeto wa sapuila va Yudea ovina vĩvi via laikele oku iya kokuavo, nda va fendela oviteka. Yosiya wa tava kelungulo lia Sofoniya kuenda wa fendela Yehova, pole, ka fendelele oviteka.

Ekamba likuavo lia Yosiya, Yeremiya. Eye wa kuata anyamo amuamue la Yosiya, kuenda va kala valupale a lisungue osimbu va kala oku kula. Ovo va kala akamba vawa. Momo, eci Yosiya a fa, Yeremiya wa soneha ocisungo cimue ca lekisa ongeva a kuatelele Yosiya. Yeremiya la Yosiya, va li kuatisile pokati, kuenje, va linga ovina via sunguluka, kuenda va pokola ku Yehova.

Nye o pondola oku lilongisa kongangu ya Yosiya?— Ndaño okuti Yosiya wa kala umalẽhe, pole, wa yonguile oku linga ovina via sunguluka. Eye wa kũlĩhĩle okuti, o sukila oku kuata ukamba lomanu va sole Yehova. Omo liaco, nõla akamba vana va sole Yehova okuti, va pondola oku ku kuatisa oku linga eci ca sunguluka!