Usoma Umue u ka Viala Oluali Luosi

O pondola hẽ, oku limbuka Usoma tu kasi oku vangula?— Ocili, Usoma wa Suku, Una u ka pongolola oluali oco lu kale ofeka yelau. Ove hẽ, o yongola oku lilongisa catiamẽla Kusoma waco?—

Uviali wosi u kuete osoma. Kuenje osoma yaco yi viala omanu va kasi vofeka yaye. Ove hẽ, wa kũlĩha Osoma Yusoma wa Suku?— Osoma yaco Yesu Kristu. Eye o kasi kilu. Ndopo o ka linga Osoma yomanu vosi palo posi! Ove hẽ, o sima okuti tu ka kuata esanju eci Yesu a ka linga Osoma yoluali luosi?—

Tu ka kuata esanju lialua! Vofeka Yelau omanu ka va ka linga vali uyaki. Omanu vosi va ka li sola pokati. Lomue o ka vela vali ale oku fa. Ovaso olomeke a ka patuluka, ovisitatuĩ vi ka yeva, kuenda ovilema vi ka lupuka loku somboka. Omanu vosi va ka kuata okulia kualua. Ovinyama ka vi ka li yaka vali, kuenda pokati kavio lomanu pa ka kala ombembua. Omanu va fa va ka pinduiwa. Alume valua kuenda akãi wa lilongisa vombrochura yilo, ndeci: Rebeka, Rahava, Daviti kuenda Eliya, va ka pinduiwavo! Ove hẽ, o yongola oku li sanga lavo eci va ka pinduiwa?—

Yehova o ku sole kuenda o yongola okuti o kuata esanju. Nda wa amamako oku lilongisa catiamẽla ku Yehova kuenda oku pokola kokuaye, o ka kuata omuenyo ko pui vofeka yelau! Anga hẽ, eci oco o yongola?—