Ku Citiwa Una O Pongiya Onjila

Otembo ya Elisavete yoku citata oñaña yi kasi ocipepi. Ngandiaye Maria o kasi laye ci soka olosãi vitatu. Pole cilo, Maria u usika kuenje o linga ungende woku tiukila konjo yaye ko Nasara. Ku kamba lika olosãi epandu oco eye a citevo oñaña.

Eci Maria a tiukila, Elisavete oco a cita. Ocili okuti, ya kala otembo yimue yesanju! Elisavete kumue loñaña yaco va kasi luhayele. Eci Elisavete a lekisa oñaña komanu va lisunguile laye kuenda kepata, vosi yavo va yolela lesanju.

Ocihandeleko Suku a ecele ku va Isareli ca popele okuti, noke yoloneke ecelãlã, oñaña yulume ya citiwa, yi sukila oku seviwa evamba kuenda oku lukiwa onduko. (Ovisila 12:2, 3) Omanu vamue va kasi oku sima okuti, oñaña yi sukila oku lukiwa onduko ya isiaye Sakariya. Pole, Elisavete o popia hati: “Sio! eye o tukuiwa Yoano.” (Luka 1:60) Ivaluka okuti ungelo Gabriele wa popele hati, onduko yoñaña yi tukuiwa Yoano.

Omanu va lisunguile laye kuenda vakuepata liaye ka va tava kuenje va popia vati: “Vangandiene lomue o tukuiwa londuko eyi.” (Luka 1:61) Ovo va pula Sakariya lelimi lioku ilaika, oco a tukule onduko a yongola oku luka omõla waye. Kuenje Sakariya o pinga evaya kuenda o sonehamo hati: “Onduko yaye Yoano.”—Luka 1:63.

Noke Sakariya locikomo o fetika vali oku vangula. Ivaluka okuti, Sakariya wa linga ocitende eci a patãla olondaka viungelo viokuti, Elisavete wa laikele oku cita omõla. Eci Sakariya a fetika oku vangula, omanu va lisungue laye va fetika oku li pula ndoco: “Okamõla aka ka ka kala ndati?” (Luka 1:66) Ovo va limbuka unene wa Suku ndomo Yoano a lukiwa onduko.

Omo okuti Sakariya wa yukisua lespiritu sandu, o vetiyiwa oku popia hati: “Yehova Suku ya Isareli, a sivayiwe, momo wa lekisa ohenda komanu vaye kuenda wa va yovola. Eye wa tu katuila ombinga yeyovo konjo ya Daviti ukuenje waye.” (Luka 1:68, 69) “Ombinga yeyovo,” yi lomboloka Nãla Yesu wa laikele oku citiwa. Sakariya wa popia hati, pocakati ca Yesu, Suku o ka tu “popela peka liovanyãli vetu, o tu ĩha esumũlũho lioku linga upange waye u kola lutõi, locili kuenda esunga kovaso aye oloneke viosi viomuenyo wetu.”—Luka 1:74, 75.

Sakariya o lombolola eci catiamẽla komõlaye hati: “Ove akamõla, o ka tukuiwa uprofeto wa Tõlo, momo o pita kovaso ya Yehova oco o pongiye onjila yaye, loku eca komanu vaye ukũlĩhĩso wepopelo poku ecela akandu avo, omo liohenda ya Suku yetu. Lohenda yaco tu mola ocinyi ci tunda kilu ndongula yomẽle, okuti ci tuila vana va tumãla vowelema kuenda vulembo woku fa loku songuila olomãhi vietu vonjila yombembua.” (Luka 1:76-79) Ocitumasuku eci ci tu pamisa calua!

Kotembo yaco, Maria okuti handi ka kuelele, o pitĩla konjo yaye ko Nasara. Nye ci ka pita laye eci omanu vakuavo va ka limbuka okuti, we mina?