Vakuakukũli̇̃hi̇̃sa Olombungululu Va Nyula Yesu

Alume vamue va kasi oku tundilila Kutundilo. Ovo vakuakukũlĩhĩsa olombungululu okuti, omanu va lilongisa ekalo liolombungululu. Poku ci linga va sima okuti, va pondolavo oku situlula elomboloko liovina vimue vi pita komuenyo womanu. (Isaya 47:13) Osimbu va kala kimbo liavo Kutundilo, va mola “olumbungululu” lumue lua va songuila ocipãla, okuti ka ca kaile ko Beteleme pole, ko Yerusalãi.

Eci vakuakukũlĩhĩsa olombungululu va pitĩla vo Yerusalãi va pula vati: “Osoma ya va Yudea ya citiwa, yi kasi pi? Eci tua kala Kutundilo tua mola olumbungululu luaye kuenje tueya oku u kekamẽla.”—Mateo 2:1, 2.

Soma Herode wo ko Yerusalãi, eci a yeva ovina evi, o sakalala calua. Noke o vilikiya ovitunda via velapo viosi lasongui vetavo lia va Yudea kuenje o va pulisa oku Kristu a laikele oku citiwa. Ovo va tiamisila etambululo liavo Kovisonehua poku popia vati: “Ko Beteleme.” (Mateo 2:5; Mika 5:2) Noke Herode o tuma oku vilikiya vakuakukũlĩhĩsa olombungululu vuyombeki kuenje o va sapuila hati: “Kuendi ka sandiliyi oñaña yaco kuenje eci vu yi sanga, sapuiliko oco ndi yi kekamẽlevo.” (Mateo 2:8) Pole, Herode o yongola oku sanga oñaña yaco oco a yi ponde!

Eci vakuakukũlĩhĩsa olombungululu va tunda, ku pita cimue ci komõhisa. Olumbungululu luna va mola eci va kala Kutundilo, lua pita kovaso yavo. Ocili okuti, oluo ka lua kaile olumbungululu luaño, pole, lua tumiwa oco lu va songuile. Vakuakukũlĩhĩsa olombungululu va lu kuama toke eci lu talama konjo ku kasi Yosefe la Maria kuenda okamõla kavo.

Vakuakukũlĩhĩsa olombungululu eci va iñila vonjo, va sanga Maria kumue lomõlaye Yesu. Kuenje vo kekamela kuenda va eca olombanjaile viulu longuendu kuenda o mura. Noke Suku o va lunguila vonjoi oco ka va ka tiukile ku Herode. Kuenje vakuakukũlĩhĩsa olombungululu va pita konjila yikuavo oku tiukila kimbo liavo.

Helie ove o sima okuti, eye wa kapa “olumbungululu” lua songuila vakuakukũlĩhĩsa olombungululu? Ivaluka okuti, olumbungululu ka lua va songuilile ku Yesu vo Beteleme, pole, oluo lua va songuila ko Yerusalãi, kuna va sapela la Soma Herode wa yonguile oku ponda Yesu. Nda Suku ka teyuilile Yesu loku sapuila vakuakukũlĩhĩsa olombungululu oco ka va ka tukule oku Yesu a kala, Herode nda wo ponda. Ocili okuti Satana unyãli wa Suku, wa yonguile okuti Yesu o pondiwa, oco a tẽlise ocimãho caye.