Yoano O Yongola Okuti Yesu U Sapuila Nda Eye Mesiya

Pa pita ale ci panda unyamo umosi tunde eci Yoano Upapatisi a kapiwa vokayike. Pole, lopo o yeva ovopange a komõhisa Yesu a linga. Tu pondola oku sokolola ndomo Yoano a liyevite eci a yeva kolondonge viaye okuti, Yesu wa pindula omõla ulume wacimbumba wo ko Naini. Pole, Yoano o yongola okuti Yesu eye muẽle u sapuila elomboloko liovina viosi a kasi oku linga. Omo liaco, Yoano o tuma oku vilikiya olondonge viaye vivali oco vi pule Yesu okuti: “Ove Una o laika oku iya, ale tu lavoka ukuavo?”—Luka 7:19.

Yoano wa pitisile kovaso upange wa Suku, omo liaco, ci komõhisa eye oku linga epulilo eli. Eci Yesu a papatisiwa okuti, pa pita ale anyamo avali, Yoano wa mõla espiritu lia Suku okuti lia lokila ku Yesu kuenda wa yeva ondaka ya Suku eci a popia okuti, u omõlange nda sanjukila. Ka ca sungulukile oku sima okuti ekolelo lia Yoano li kasi oku hongua. Nda Yoano ka kuatele ekolelo lia pama, Yesu nda ka popele ovina viwa viatiamẽla ku Yoano ndeci a kasi oku linga. Pole, nda Yoano ka kuete atatãhai momo lie a tumila oku linga epulilo eli ku Yesu?

Citava okuti, Yoano o yongola oco Yesu a li sitululele eye muẽle okuti, Mesiya. Eci nda ca pamisa ekolelo lia Yoano, momo wa sumuĩle omo lioku kala vokayike. Epulilo lia Yoano, citava okuti lia kuatavo elomboloko likuavo. Eye wa kũlĩhĩle ovitumasuku Viembimbiliya vi popia okuti, Ombuavekua ya Suku yi ka kala osoma kuenda onjovoli. Pa pita ale olosãi vimue tunde eci Yesu a papatisiwa, pole, toke cilo Yoano o kasi vokayike. Omo liaco, Yoano o lipula nda kua laikele oku iya omunu ukuavo oco a kale kapiñala ka Yesu okuti, o tẽlisa ovitumasuku viosi viatiamẽla kovina Mesiya a laikele oku linga.

Yesu ka sapuilile lika olondonge via Yoano okuti, ‘Ame Una o laika oku iya,’ pole, o lekisavo uvangi wokuti o kasi oku kuatisiwa la Suku poku sakula omanu valua va vela ovovei añi añi. Omo liaco, Yesu o sapuila olondonge via Yoano hati: “Kuendi, ka sapuili Yoano eci wa yevi leci wa moli okuti: Olomeke cilo vi kasi oku vanja, ovilema vi kasi oku enda, vakuavilundu va yelisua, ovisitatũi vi kasi oku yeva, vana va fa va pinduiwa kuenda olondaka viwa vi kasi oku kundiwila kolohukũi.”—Mateo 11:4, 5.

Epulilo lia Yoano li lekisa okuti eye o lavoka okuti, Yesu ka lingi lika ovina a kala oku linga, pole, u yovolavo vokayike. Pole, Yesu o yongola oku popia okuti Yoano ka sukila oku lavoka okuti ku lingiwa vali ovikomo vikuavo.

Eci olondonge via Yoano via enda, Yesu o sapuila owiñi okuti, ocikele ca Yoano ca velapo cuprofeto. Eye “omunga” ya Yehova, ndomo ci sangiwa vocitumasuku ca Malakiya 3:1. Handi vali, eye uprofeto Eliya, ndomo ci sangiwa vocitumasuku ca Malakiya 4:5, 6. Yesu o lombolola hati: “Ocili, ndu sapuili siti, pokati ka vana va citiwa lakãi, ka kua la kala umue wa velapo Yoano Upapatisi, pole, u o sule Vusoma wo Kilu, wo velapo.”—Mateo 11:11.

Yesu poku popia hati u o sule Vusoma wo kilu wa velapo Yoano, o kasi oku lekisa okuti Yoano ka ka kala Vusoma wo Kilu. Ndaño okuti eye wa pongiyila onjila Yesu, pole, eye wa fa osimbu handi Kristu ka yikuile onjila yoku enda kilu. (Va Heveru 10:19, 20) Omo liaco, Yoano, uprofeto umue wa Suku okuti ukuekolelo kuenda o kuete elavoko lioku ka kala Vusoma wa Suku palo posi.