Kohulo Yokalunga Ko Galilea

Vuteke wa sulako Yesu a kala lovapostolo vaye, o va sapuila hati: “Eci ndi pinduiwa, ho livangeli ko Galilea.” (Mateo 26:32; 28:7, 10) Cilo, valua pokati kolondonge viaye va linga ungende waco, pole, nye va ka lingako?

Vepuluvi limue, Petulu o sapuila ovapostolo epandu hati: “Ndi ka pipa.” Ovapostolo epandu va tambulula vati: “Tu enda love.” (Yoano 21:3) Ovo ka va tẽla oku pipa lacimue uteke wosi. Poku ca, Yesu o molẽha kokalunga, pole, ovo ka vo limbuka. Yesu o kaluka hati: “Ene amãla, ka vu kuete cimue cokulia?” Ovo va tambulula vati: “Sio!” Yesu o va sapuila hati: “Imbi owanda konele yondio yowato kuenje vu kuata olõsi.” (Yoano 21:5, 6) Ovo va kuata olõsi vialua okuti ka va tẽla oku koka owanda.

Yoano o sapuila Petulu hati: “U Ñala!” (Yoano 21:7) Lonjanga yalua Petulu o wala, momo wa kala ño ndoto osimbu va kala oku pipa. Eye o limba vokalunga kuenda o liteva eci ci soka 90 kolometulu toke kohulo. Vakuavo vo kuama levando lowato, loku koka owanda weyuka olõsi.

Eci va pitĩla kohulo, ovo va mola “akala vondalu okuti kilu liako kua kala olõsi lombolo.” Yesu o popia hati: “Neni olõsi vimue wa kuati.” Petulu o koka owanda weyuka olõsi vinene okuti vi soka 153. Yesu o va kovonga hati: “Enjui, ndo li.” Lomue pokati kavo o kuete utõi woku pula okuti ove helie, momo va limbuka okuti Yesu. (Yoano 21:9-12) Eyi onjanja yatatu eye a molẽha kocimunga colondonge viaye.

Yesu eca komunu lomunu olũsi lombolo oco va lie. Kuenje citava okuti poku vanja kolõsi va kuata, eye o pula hati: “A Simono amõla a Yoano, o ndi sole vali okuti evi vi sule?” Nye ca velapo ku Petulu: Upange waye woku pipa ale ocikele Yesu o wĩha? Petulu o tambulula hati: “Oco, a Ñala, o cĩ okuti hu kuetele ocisola cocili.” Omo liaco, Yesu u pinga hati: “Lisa olomeme viange.”—Yoano 21:15.

Yesu o pula vali hati: “A Simono amõla a Yoano, o ndi sole?” Petulu ndaño lesakalalo o tambulula lutõi hati: “Oco, a Ñala, o cĩ okuti hu kuetele ocisola cocili.” Yesu eca etambululo limuamue hati: “Lava otulomeme tuange.”—Yoano 21:16.

Onjanja yatatu, Yesu o pula hati: “A Simono, amõla a Yoano, o ñuetele ocisola cocili?” Citava okuti Petulu o kasi oku lipula nda okuti Yesu wo tatãla ekolelo liaye. Petulu amisako hati: “A Ñala, ove wa kũlĩha ovina viosi; wa kũlĩha okuti hu kuetele ocisola cocili.” Yesu o pitulula vali eci Petulu a sukila oku linga poku popia hati: “Lisa otulomeme tuange.” (Yoano 21:17) Ocili okuti, vana va kuete ocikele coku songola va sukila oku tata vana va kokiwa vocunda ca Suku.

Yesu wa kutiwa kuenda wa pondiwa omo lioku tẽlisa upange Suku o wĩha. Yesu cilo o situlula okuti cimuamue haico ci ka pita la Petulu poku popia hati: “Eci wa kala umalẽhe wa enda oku wala lika liove loku enda oku wa panga. Pole, eci o kuka, o nyanyumula ovoko ove kuenje omunu ukuavo o ku walisa, loku ku ambata oku ku yongola oku enda.” Ndaño ndoco, Yesu u vetiya hati: “Amamako oku ñuama.”—Yoano 21:18, 19.

Petulu o mola upostolo Yoano kuenje o pula hati: “A Ñala, ulume u o linga nye?” Nye ci ka pita lupostolo una Yesu a sole calua? Yesu o popia hati: “Nda nda panga okuti eye o kala toke eci niuka, o sakalalela nye?” (Yoano 21:21-23) Petulu o sukila oku kuama Yesu okuti, ka sakalala leci vakuavo va ka linga. Pole, Yesu o lekisa okuti, Yoano o ka kala otembo yalua komuenyo okuti, ovapostolo vakuavo ci sule kuenda o ka tambula ocinjonde coku iya kua Yesu vunene Wusoma.

Ocili okuti, Yesu wa linga ovina vialua okuti, nda ka via tẽliwile oku vi soneha viosi voviña vialua.