Va Fariseo Va Pula Ulume Wa Kala Omeke

Va Fariseo ka va tava okuti Yesu wa sakula ulume una wa citiwa omeke kuenje va vilikiya olonjali viulume waco. Olonjali viaye via kũlĩha okuti vi kasi kohele yoku “tundisiwa vosunangonga.” (Yoano 9:22) Ovio nda ka via ponduile oku kuata vali ukamba la va Yudea vakuavo kuenda nda ca va kokelavo ekambo liolombongo loku pumba esumbilo liepata.

Va Fariseo va linga apulilo avali vati: “U omõlene wa popi hoti, wa citiwa omeke? Ndamupi okuti cilo o lete?” Olonjali vi tambulula viti: “Tua kũlĩha okuti u omõletu kuenda wa citiwa omeke. Pole, ka tua kũlĩhĩle ndomo eye a kasi oku leta; pamue omunu . . . wo patulula ovaso.” Ndaño okuti omõla omeke wa sapuila kolonjali viaye ovina via pita, pole, olonjali vi lekisa utate poku eca etambululo ku va Fariseo viti: “U pulisi. Eye ukulu. A vangule eye muẽle.”—Yoano 9:19-21.

Omo liaco, va Fariseo va vilikiya vali ulume wa kala omeke kuenje vo saluisa poku u sapuila okuti va kuete uvangi woku pisa Yesu. Ovo vo kisika vati: “Sivaya Suku; tua kũlĩha okuti ulume u ukuakandu.” Oco a yuvule ovisimĩlo viavo vioku pisa Yesu, ulume wa kala omeke o popia hati: “Nda eye ukuakandu sia ci kũlĩhĩle. Eci nda kũlĩha ceci okuti nda kala omeke, pole, cilo ndi lete.”—Yoano 9:24, 25.

Omo okuti va Fariseo ka va sanjukilile etambululo liaco, va popia vati: “Nye eye a ku linga? Wa patulula ndati ovaso ove?” Ulume lutõi o tambulula hati: “Nda ku sapuili ale, lopo ka vu yevi. Nye vu yonguila oku ci yeva vali? Ene anga vu yongolavo oku kala olondonge viaye?” Va Fariseo va tema poku yeva olondaka evi kuenje va pisa ulume wa kala omeke vati: “Ove vundonge yulume waco, pole etu tulondonge via Mose. Tua kũlĩha okuti Suku o vanguila vonduko ya Mose, puãi ulume u, oku a tunda ka tua kũlĩhĩleko.”—Yoano 9:26-29.

Ulume ukuakupinga osimola o komõha kuenje o popia hati: “Eci ci komõhisa okuti ka wa kũlĩhĩli oku eye a tunda, pole wa patulula ovaso ange.” Omo liaco, ulume o popia olondaka vi vetiya oku sokolola catiamẽla komunu Suku a yevelela kuenda a tava hati: “Tua kũlĩha okuti Suku ka yevi vakuakandu, pole nda umue o sumbila Suku kuenda o linga ocipango caye, eye u yeva. Tunde osimbu ka kua la yevala umue wa patulula ovaso omunu wa citiwa omeke.” Omo liaco, o malusula lolondaka viokuti: “Omunu u, nda ka tundile ku Suku, nda ka tẽlele oku linga cimue.”—Yoano 9:30-33.

Va Fariseo ka va tẽla vali oku patãla ulume omeke kuenje va fetika oku u popia lãvi vati: “Ove wa citiwilavo vekandu, cilo o tu longisa?” Kuenje vo tundisila posamua.—Yoano 9:34.

Eci Yesu a yeva ovina via pita, o sandiliya ulume wa kala omeke kuenje u pula hati: “Ove hẽ wa kolela Mõlomunu?” Ulume wo tambulula hati: “A ñala, eye elie okuti ndi kolela kokuaye?” Oco ulume ka ka kuate atatahãi, Yesu u sapuila hati: “Ove [wo mola] kuenda u o kasi oku vangula love, eye.”—Yoano 9:35-37.

Ulume o tambulula hati: “A Ñala, ndo kolela.” Ulume poku lekisa ekolelo kuenda esumbilo, o kekamẽla Yesu una o popia hati: “Ndeya voluali oku tetulula okuti, vana ka va lete, va leta kuenda vana va lete va linga olomeke.”—Yoano 9:38, 39.

Va fariseo va kũlĩha okuti halomekeko. Pole, nye ci popiwa catiamẽla kocikele cavo coku kala alongisi? Oco va lisandele esunga va Fariseo va pula ndoco: “Anga etu tulomekevo?” Yesu o popia hati: “Nda wa kaili olomeke, nda ka vu kuete [eko]. Puãi cilo [omo] vu popia hoti, ‘Tu lete.’ Ekandu liene ka li ka ecelua.” (Yoano 9:40, 41) Nda ovo ka va kaile alongisi ko Isareli nda ca kuata esunga oku likala Yesu okuti Mesiya. Pole, omo okuti ovo va kuete ukũlĩhĩso Wocihandeleko, oku likala Yesu ekandu limue linene.