Momo Lie Ku Kasilili Ohali Yalua?

1, 2. Nye omanu valua va siata oku pula?

EHUNGUHUNGU liofela lia nyõla imbo limue. Ulume umue wa iñila luta vonembele yimue, kuenje wa ponda omanu valua va kalamo. Uvei wo kanser wa ponda onjali yimue yukãi okuti ya sia omãla vatãlo.

² Eci ku pita ovilunga vimue ndevi via tukuiwa ndeti, omanu valua va siata oku lipula ndoco: “Momo lie?” Omanu valua va siata oku pula esunga lieci voluali mue yukila onya kuenda ohali. Ove hẽ wa lipulile ale eci catiamẽla kovina viaco?

3, 4. (a) Apulilo api Havakuki a linga? (b) Yehova wo tambulula ndati?

³ Vembimbiliya tua lilongisa okuti, ulume umue wa kuatele ekolelo lialua ku Suku, wa lingavo apulilo aco. Ovolandu a lekisa okuti, uprofeto Havakuki wa pula ku Yehova hati: “O ndekisila nye evĩho? O mbanjisila nye ahuku? Momo ndete okunyõla lokupunda. Ema lia wenguka. Okuyaka kua katuka.”​—Havakuki 1:3.

⁴ Kelivulu lia Havakuki 2:2, 3, tu tangako atambululo Suku a ecele kapulilo Havakuki a lingile, kuenda ohuminyo yoku malako ovitangi viaco. Yehova o sole calua omanu. Embimbiliya li popia hati: “Eye o vu tati.” (1 Petulu 5:7) Ndeci etu ka tu sole oku mola omanu va tala ohali, ca piãla enene Suku okuti ka sole ovina viaco. (Isaya 55:8, 9) Omo liaco, tu konomuisi epulilo liokuti: Momo lie voluali mue yukila ohali yalua?

MOMO LIE KU KASILILI OHALI YALUA?

5. Nye alongisi valua vatavo va siata oku longisa catiamẽla kohali? Nye Embimbiliya li longisa?

⁵ Omanu vamue ndeci: Angombo, ovitunda, kuenda alongisi vatavo amue va siata oku popia vati, Suku o yongola okuti omanu va tala ohali. Omanu vakuavo va siata oku popia vati, ovina viosi omunu a liyaka lavio oku kongelamo ovilunga, via sokiyiwa ale la Suku, kuenda ka tu pondola oku kuata elomboloko liesunga liaco. Vakuavo pamue va popia vati, omanu oku kongelamo omãla vatito, va siata oku fa oco va ka kale la Suku kilu. Pole, alongiso aco uhembi. Momo, Yehova lalimue eteke a kokele ovina vĩvi. Embimbiliya li popia hati: “Ci kale kupãla la Suku oku linga evĩho. Cikale kupãla la Tõlo oku limba kakandu.”​—Yovi 34:10.

6. Momo lie omanu valua va siatela oku lundila Suku omo liohali va siata oku liyaka layo?

⁶ Omanu valua va siata oku lundila Suku omo liohali yalua yi kasi voluali, momo va sima okuti Suku eye o kasi oku viala oluali. Pole, ndomo tua lilongisa kocipama 3 celivulu lilo, Satana Eliapu eye ombiali yoluali lulo.

7, 8. Momo lie voluali mue yukila ohali yalua?

⁷ Embimbiliya li tu sapuila hati, “oluali luosi lu kasi povaka ondingaĩvi.” (1 Yoano 5:19) Omo okuti Satana eye ombiali yoluali lulo, o kuete ovituwa vĩvi, kuenda ongangala. Eye wa siata “oku yapuisa oluali luosi.” (Esituluilo 12:9) Omanu valua va siata oku kuama ongangu yaye. Eli olio esunga lieci voluali mue yukila ovohembi, onya, kuenda ungangala.

⁸ Kuli esunga likuavo lieci voluali mue yukila ohali yalua. Eci Adama la Heva va lekisa esino, ekandu liavo lia sambukila komãla vavo. Omo liekandu, omanu va siata oku kokela ohali omanu vakuavo. Kuenje, va yongola oku livelisapo okuti vakuavo ci sule. Ovo va siata oku liyaka pokati, va enda kovoyaki, kuenda va linga ovina vĩvi komanu vakuavo. (Ukundi 4:1; 8:9) Olonjanja vimue omanu valua va siata oku tala ohali, momo “cosi ciya ño ci veta ño.” (Ukundi 9:11) Omanu va siata oku pita lovitangi viaco omo lioku kala pocitumãlo cimue ka ca sungulukile, vepuluvi ka lia sungulukile.

9. Momo lie tu kuetele ekolelo liokuti Yehova o kuete esunga lieci a kasilili oku ecelela okuti ohali yamamako?

⁹ Yehova lalimue eteke a kokelele ohali komanu. Eye ka kuete eko liovoyaki, ungangala, kuenda ohali. Handi vali, hayeko wa siata oku koka ovilunga ndeci: Ovilemawe, ahunguhungu ofela, kuenda andunde ovava. Pole, ove pamue o lipula ndoco: ‘Nda Yehova o kuete unene wa velapo voluali luosi, momo lie ka tatekela ovina vĩvi via siata oku pita?’ Tua kũlĩha okuti Yehova wa tu kapako, kuenda o kuete esunga lieci a kasilili oku ecelela okuti ohali yamamako.—1 Yoano 4:8.

ESUNGA LIECI SUKU A KASILILI OKU ECELELA OHALI

10. Satana wa lingila ndati usuanji Yehova?

¹⁰ Vocumbo Cedene Satana Eliapu wa kemba Adama la Heva. Eye wa lundila Suku hati, ombiali yimue yĩvi. Wa popiavo hati, Suku wa kala oku limbika ovina vimue viwa ku Adama la Heva. Satana wa yonguile okuti, ovo va tava kuhembi wokuti eye wa laikele oku kala ombiali ya velapo okuti Yehova o sule, kuenda ka vo sukila.—Efetikilo 3:2-5; tala Etosi 27 kesulilo lielivulu lilo.

11. Epulilo lipi tu sukila oku tambulula?

¹¹ Adama la Heva ka va pokuile ku Yehova, kuenje va lekisa esino. Ovo va simĩle okuti va kuatele omoko yoku li nõlela eci va yongola oku linga catiamẽla koku tepisa pokati keci ciwa leci cĩvi. Yehova wa laikele oku lekisa ndati okuti vakuesino va lueya, kuenda eye lika wa kũlĩha ovina viwa kokuetu?

12, 13. (a) Momo lie Yehova ka kunduilile Adama la Heva vonjanja yaco eci va lekisa esino? (b) Momo lie Yehova a siatela oku ecelela okuti Satana o viala oluali lulo, kuenda omanu va liviala ovo muẽle?

¹² Yehova ka kunduile Adama la Heva vonjanja yaco. Pole, wa ecelela okuti va cita omãla. Noke, Yehova wa linga eliangiliyo liokuti, omãla va Adama la Heva va nõla ombiali va yongola okuti oyo yi va viala. Ocipango ca Yehova ceci cokuti, oluali lu yuka lomanu va lipua, ndaño okuti Eliapu li seteka oku tateka eliangiliyo liaco.—Efetikilo 1:28; Isaya 55:10, 11.

¹³ Satana wa lingila usuanji Yehova kovaso yovangelo valua. (Yovi 38:7; Daniele 7:10) Omo liaco, Yehova wa eca ku Satana otembo yoku lekisa nda alundi a linga ocili. Handi vali, wa eca komanu otembo yokuti, va tumbika olombiali viavo vemẽhi liuviali wa Satana, oco va lekise nda va pondola oku kuata ekalo liwa okuti, ka va sukila ekuatiso lia Suku.

14. Nye ca siata oku situluiwa vokuenda kuotembo?

¹⁴ Ndaño okuti omanu va siata oku seteka oku li viala ovo muẽle vokuenda kuanyamo alua, pole ka va kuete onima yiwa. Ovolandu a lekisa okuti Satana ohembi. Omanu va sukila ekuatiso lia Suku. Uprofeto Yeremiya wa vangula ocili eci a popia hati: “A Yehova, ndi ci okuti okuenda kuomunu ka ku kasi povaka aye muẽle. Omunu enda ka tẽla eye muẽle oku suñamisa okuenda kuaye.”—Yeremiya 10:23.

MOMO LIE YEHOVA A KASILILI OKU TALAMẼLA VOKUENDA KUOTEMBO YALUA?

15, 16. (a) Momo lie Yehova a siatela oku ecelela ohali vokuenda kuotembo yalua? (b) Momo lie Yehova ka siatelele oku tateka ovitangi via kokiwa la Satana?

¹⁵ Momo lie Yehova a siatela oku ecelela okuti ohali yamamako vokuenda kuotembo yalua? Momo lie ka tatekela ovina vĩvi? Ca sukila otembo oco ku kale uvangi wokuti, uviali wa Satana ka u kasi oku kuatisa omanu. Momo, omanu va siata oku seteka oku vialiwa lovoviali a litepa, pole ka va lete onima yaco. Ndaño okuti ovoloño a livokiya calua, pole kuli ekambo liesunga, uhukũi, ungangala, kuenda ovoyaki okuti kosimbu ci sule. Nda ka tu kuatisiwa la Suku, ka tu kuata onima yiwa. Nda tua liviala etu muẽle okuti ka tu kuatisiwa la Suku, ka tu kuata onima yiwa.

¹⁶ Pole, Yehova Suku ka tatekele ovitangi Satana a siata oku koka. Momo nda wa ci lingile, nda ca lekisa okuti, o kasi oku kuatisa uviali wa Satana. Pole, Yehova lalimue eteke a ka ci linga. Handi vali, nda ca vetiyavo omanu oku tava kocisimĩlo cokuti, va pondola oku li viala ciwa ovo muẽle. Pole, ovina viaco viuhembi, kuenda Yehova ka kuatisa kuhembi waco. Eye lalimue eteke a kembele.​—Va Heveru 6:18.

17, 18. Nye Yehova a ka linga lovina vĩvi Satana a siata oku koka?

¹⁷ Anga hẽ Yehova o pondola oku malako ovitangi viosi via kokiwa lesino lia Satana kumue lomanu? O pondola oku ci linga. Ku Yehova Suku ovina viosi vi tẽliwa. Momo, Yehova wa kũlĩha otembo a ka tambulula atatahãi osi a votuiwa la Satana. Noke, o ka ecelela okuti ongongo yosi yi pongoluiwa oco yi linge yokaliye, ndeci a yonguile kefetikilo. Omanu vosi va kasi “vayambo” va ka pinduiwa. (Yoano 5:28, 29) Omanu ka va ka vela vali ale oku fa. Yesu o ka malako ovina viosi vĩvi Satana a siata oku koka. Kuenje, Yehova o ka tuma Yesu “oco a nyõle ovilinga Vieliapu.” (1 Yoano 3:8) Tu eca olopandu ku Yehova omo a siata oku lekisa epandi kokuetu, momo tu pondola oku u kũlĩha, kuenda oku nõla okuti o linga Ombiali yetu. (Tanga 2 Petulu 3:9, 10.) Ndaño tua siata oku tala ohali, pole, o tu kuatisa oku pandikisa kovitangi viosi tu liyaka lavio.—Yoano 4:23; tanga 1 Va Korindo 10:13.

¹⁸ Yehova ka tu kisika okuti, eye tu nõla oco a linge Ombiali yetu. Eye wa eca komanu ombanjaile yelianjo lioku li nõlela eci va yongola oku linga. Omo liaco, tu konomuisi eci ombanjaile yaco yi lomboloka kokuetu.

O KUATISIWA NDATI LOMBANJAILE YOKU LI NÕLELA?

19. Ombanjaile yipi yi komõhisa Yehova a tu ĩha? Momo lie tu sukilila oku eca olopandu omo liombanjaile yaco?

¹⁹ Ombanjaile yi komõhisa Yehova a tu ĩha yoku li nõlela eci tu yongola oku linga, oyo yi tu tepisa lovinyama. Momo, ovinyama vi linga ovina okuti ka vi sokolola, pole etu tu pondola oku nõla ekalo liomuenyo tu yongola oku kuata, kuenda oku nõla onjila tu kuama oco tu sanjuise Yehova. (Olosapo 30:24) Handi vali, ka tu sokisiwa lolomakina okuti, vi linga lika ovina via sokiyiwila. Tu kuete elianjo lioku li nõlela ekalo tu yongola oku kuata, akamba tu yongola oku kuata, kuenda eci tu yongola oku linga lomuenyo wetu. Yehova o yongola okuti tu kuata esanju komuenyo.

20, 21. Onjila yipi ya velapo o pondola oku nõla cilo?

²⁰ Yehova o yongola okuti tu lekisa ocisola kokuaye. (Mateo 22:37, 38) Eye o sokisiwa la isia umue o kuata esanju eci a yeva omõlaye u sapuila hati: “Ndu ku sole.” Momo, olondaka viaco vi tunda kutima waye, kuenda ka kisikiwa oku ci linga. Yehova wa tu ĩha elianjo lioku nõla nda tu yongola oku u vumba ale sio. Satana la Adama kumue la Heva, va nõlapo oku likala Yehova. O kuatisiwa ndati lelianjo liove lioku li nõlela eci o yongola oku linga?

²¹ Kuatisiwa lelianjo liove lioku nõla eci o yongola oku linga, oco o vumbe Yehova. Kuli omanu valua va siata oku sanjuisa Suku okuti, va nõlapo oku likala Satana. (Olosapo 27:11) Nye o sukila oku linga cilo, oco o ka kale voluali luokaliye lua Suku, eci a ka malako ohali yosi? Ocipama ci kuãimo ci ka tambulula epulilo eli.