EPULILO 7

Nye Ndi Sukila Oku Linga Nda Ndi Kasi Oku Vetiyiwa Oku Linga Ukahonga?

ESUNGA LIECI OKU SOKOLOLA EPULILO ELI CI KUETELE ESILIVILO

Nda ove wa nõlapo oku linga ukahonga, o kuata ovitangi vialua. Pole, nda wa yuvula ukahonga, o ka kuata asumũlũho alua kovaso yoloneke.

NYE O SUKILA OKU LINGA?

Sokolola ulandu u kuãimo ndoco: Tunde eci Carol a fetika oku namulãla la Felipe, ka pa pitile olosãi vivali. Pole, va kasi ndu okuti, pa pita anyamo alua tunde eci va li kũlĩha. Momo, va siata oku litumisa asapulo votelefone olonjanja vialua vokuenda kueteke, kuenda va sapela olowola vialua votelefone. Nda va kasi oku sapela, osimbu umue pokati kavo kamalele ombangulo yaye, ukuavo wa kũlĩha ale ovina a yongola oku popia! Pole, Felipe o yongola okuti, vombangulo yavo va kongelamo ovina viatiamẽla koku lipekela.

Eci Carol a fetika oku namulãla la Felipe, va enda oku likuata lika peka, kuenda oku lisipula. Ndaño okuti Carol ka yongola oku lipekela la Felipe, pole, ka yongolavo okuti, va litepa. Momo, Felipe eye lika wa siata oku linga ovina viu nenela esanju lialua, kuenda wo kapako calua. Omo liaco, Carol wa siata oku sokolola ndoco: ‘Tu lisole calua. . . . ’

Nda ove o kuete utunga woku fetika oku namulãla, kuenda wa kalele nda Carol, nye nda wa linga?

SOKOLOLA LUTATE!

Uwalo umue wokaliye va kasi oku sukula lawo posi — Yehova wa eca lika ombanjaile yoku lipekela komanu vana va kuele. Omanu vana va siata oku lipekela osimbu ka va kuelele va lekisa okuti, ka va sumbilile ombanjaile yaco. Oku ci linga, ci sokisiwa lombanjaile yimue yuwalo wa posoka wa tambula okuti, noke u kala ocinyaña coku sukula posi

Nda kua pokuile kocihandeleko ci kuatisa omanu kuenda ovina vikuavo oco ka vi ka kupuke, o pondola oku liyaka lovitangi. Cimuamue haico ci pondola oku pita love, nda kua pokuile kocihandeleko ca Yehova catiamẽla koku lipekela. Embimbiliya li popia hati: ‘Yuvula ukahonga.’—1 Va Tesalonike 4:3.

Nye omunu a pondola oku pita laco nda ka pokola kocihandeleko eci? Embimbiliya li popia hati: ‘Omunu o linga ukahonga o vĩhĩsa etimba liaye.’ (1 Va Korindo 6:18) Momo lie?

Akonomuiso a lingiwa a lekisa okuti, amalẽhe valua va linga ukahonga osimbu handi ka va kuelele, noke va liyaka lovitangi vialua, ndomo ovolandu a kuãimo a ci lekisa.

ESUMUO. Amalẽhe valua va linga ukahonga osimbu handi ka va kuelele, noke va livela.
EKAMBO LIOKU KOLELA KOMUNU WA LINGA LAYE UKAHONGA. Omanu valua va siata oku linga ukahonga noke va lipula nda omunu va lipekela laye wa lipekelelevo lomunu ukuavo.
DISILLUSIONMENT. Oku tepa ukamba. Afeko valua va siata oku nõlapo oku namulãla lakuenje vana okuti, va pondola oku va teyuila. Pole, ka va yongola oku namulãla la vana okuti, noke yoku lipekela lavo va litepa. Kuli akuenje valua okuti, noke yoku lipekela lufeko umue, va liwekapo oku namulãla laye.
Ceci tu lilongisa kulandu waco: Nda wa linga ukahonga osimbu kua kuelele, o nyõla ekalo liove liwa, kuenje ku sumbila vali etimba liove. (Va Roma 1:24) Ivaluka okuti, etimba liove li kuete esilivilo lia velapo. Omo liaco, ku ka ecelele okuti, o linga ukahonga osimbu kua kuelele!

Lekisa okuti, o kuete utõi woku ‘yuvula ukahonga.’ (1 Va Tesalonike 4:3) Nda wa ci linga, noke yoku kuela o pondola oku lipekala lonjila yimue okuti, ku sakalala omo liovitangi via siata oku pita lomanu vana va lipekela osimbu ka va kuelele.—Olosapo 7:22, 23; 1 Va Korindo 7:3.

SOKOLOLA APULILO A KUÃIMO NDOCO:

Nda omunu umue oku kuetele ocisola cocili o kapa hẽ kohele ekalo liove liwa?
Nda omunu umue o ku kuetele ocisola o kapa hẽ kohele ukamba wove la Yehova Suku?—Va Heveru 13:4.