Yesu Kuenda Ukãi u Samaria

Eci papita otembo yimue noke yo Paskoa, Yesu kumue lolondonge viaye va linga ungende poku pita ko Samaria okuti, onjila yavo yoku tiukila ko Galilea. Ocipepi lolupale luo Sukare, Yesu wa talama pocitumãlo cimue ci tukuiwa hati, ocisimo ca Yakoba. Osimbu a kala oku puyuka pocisimo caco, olondonge viaye via enda volupale oku landa okulia.

Ukãi umue weya pocisimo oku tapa ovava. Yesu wo sapuila hati: “Nyĩheko ovava oku nyua.” Ukãi wa tambulula hati: ‘Momo lie o vanguila lame? Ame ndukãi u Samaria. Va Yudea ka va kuatele ukamba la va Samaria.’ Yesu wo sapuila hati: ‘Nda wa ndi kũlĩhĩle, nda wa ndi pinga kuenje ame nda nda ku ĩha ovava omuenyo.’ Ukãi wo pula hati: ‘Eci ci lomboloka nye? Ove ku kuete ociyenjo cimue.’ Yesu wa popia hati: ‘Wosi o nyua kovava ndu wĩha lalimue eteke a yeva vali enyona.’ Ukãi wa popia hati: “A Ñala nyĩhe ovava aco.”

Yesu wo sapuila hati: ‘Ka kovonge veyove, oco eye palo pocisimo.’ Ukãi wa popia hati: ‘Si kuete veyange.’ Yesu wa popia hati: ‘O kasi oku popia ocili. Ove wa kuelele olonjanja vitãlo kuenje cilo o kasi lulume umue okuti hahueliyoveko.’ Ukãi wa popia hati: ‘Nda limbuka okuti ove vuprofeto. Omanu vo kofeka yange va tava okuti tu pondola oku fendela Suku komunda eyi, pole, va Yudea va popia hati tu sukila oku fendela lika vo Yerusalãi. Ame ndi tava okuti eci Mesiya eya, o ka tu longisa ndomo tu fendela.’ Kuenje Yesu wa popia ocina cimue okuti lalimue eteke a ci vanguile komunu umue poku popia hati: ‘Ame Mesiya.’

Ukãi wa yayulako oku enda volupale kuenje wa sapuila va Samaria hati: ‘Ame ndi sima okuti nda sanga Mesiya. Eye wa kũlĩha ovina viosi viatiamẽla kokuange. Enjui, ndo tali!’ Ovo vo kuama toke pocisimo kuenje va yevelela ovina Yesu a longisa.

Va Samaria va laleka Yesu oco a kale volupale luavo. Vokuenda kuoloneke vivali, eye wa longisa vo Samaria kuenje omanu valua va lekisa ekolelo kokuaye. Ovo va sapuila ukãi u Samaria hati: ‘Noke yoku yevelela ulume u-u, tua limbuka okuti eye upopeli woluali.’