Petulu o Likala Yesu

Eci Yesu a kala lovapostolo vaye vohondo yo sapalalo, wa va sapuila hati: ‘Vosi yene uteke ulo vu ka njanduluka.’ Petulu wa tambulula hati: ‘Ame sio! Ndaño vosi va ku yanduluka, ame lalimue eteke hu yanduluka.’ Pole, Yesu wa sapuila Petulu hati: ‘Osimbu ekondombolo ka lia lilile, ove o ndi likala olonjanja vitatu.’

Eci asualali vambata Yesu konjo ya Kayafa, valua pokati kovapostolo va tila. Pole, vavali pokati kavo va kuama owiñi. Umue pokati kavo Petulu. Eye wa iñila kocitali conjo ya Kayafa kuenje wa kala oku yota ondalu. Vocinyi, upika umue ufeko, wa mola Petulu kuenje wa popia hati: ‘Ame nda ku kũlĩha! Ove wa kala la Yesu!’

Petulu wa popia hati: ‘Sio, sia kaile laye! Eci o kasi oku popia si cĩ!’ Kuenje Petulu wa enda pombundi. Pole, vepuluvi liaco ufeko ukuavo upika wo mola kuenje wa sapuila owiñi hati: ‘Ulume u wa kala la Yesu!’ Petulu wa popia hati: ‘Yesu sio kũlĩhĩle!’ Ulume umue wa popia hati: ‘Ove u umue pokati kavo! Ndi pondola oku limbuka elaka liove okuti, ove wa tunda ko Galilea ndeci Yesu.’ Pole, Petulu wa likala hati: ‘Ame sio kũlĩhĩle!’

Vepuluvi liaco, ekondombolo limue lia lila. Petulu wa mola okuti Yesu wa ñuala, kuenda wo vandekela. Kuenje Petulu wa ivaluka olondaka via Yesu yu wa tunda posamua loku lila calua.

Noke Ekanga Linene lia liongolola oco va sombise Yesu konjo ya Kayafa. Ovo va tumbikile ale ongombo yoku ponda Yesu kuenda cilo va kasi oku sanda esunga lioku ci linga. Pole, ovo ka va sangele esunga lalimue lioku u pisa. Oku sulako Kayafa wa pula Yesu hati: “Ove Vumõla a Suku?” Yesu wa tambulula hati: ‘Ame Ndimõla a Suku.’ Kayafa wa popia hati: ‘Ka tu sukila vali uvangi. Eci etonãi!’ Ekanga lia tava kondaka yaco kuenje lia popia hati: ‘Ulume u o sesamẽla oku fa.’ Ovo va patũla Yesu, vo siyila, va sitika ovaso aye kuenda vo veta loku popia vati: ‘Nda ove uprofeto tu sapuile omunu wa ku veta!’

Eci kuaca omẽle, vambata Yesu Kekanga Linene kuenje vo pula vali vati “Ove Vumõla a Suku?” Yesu wa tambulula hati: ‘Ene wa ci popi okuti, Ndimõla a Suku.’ Kuenje ovo vo lundila okuti wa popia etonãi kuenda vo tuala toke kelombe lia Pondiu Pilato nguluvulu yo ko Roma. Nye ca pita noke? Tu ci kũlĩhĩsi.