OCIPAMA 48
Nõla Akamba Vove Lolondunge
Akamba vocili va vokiya esanju lietu vapuluvi awa kuenda va tu pamisa vapuluvi ovitangi. Pole, Embimbiliya li tu lungula okuti, havosiko okuti akamba vawa. Oco hẽ o nõla ndati akamba vawa? Kũlĩhĩsa apulilo a kuãimo.
1. Akamba o nõla va pondola oku ku kuatisa ndati ale oku ku nyõla?
Ci leluka calua kokuetu oku setukula ovituwa viomanu tua siata oku kala lavo otembo yalua. Ci kaile okuti tu pita otembo yalua lavo vo internet ale sio, ocili ceci okuti, akamba va pondola oku tu kuatisa ale oku tu nyõla. Embimbiliya li popia okuti, “omunu endaenda lukualondunge o lingavo ukualondunge, pole, una o livala ukamba leveke [okuti yuna ka sole Yehova] o ka liyaka lovitangi.” (Olosapo 13:20) Akamba vana va sole Yehova loku u fendela, va ku kuatisa oku pamisa ukamba wove laye kuenda oku nõla olonjila viwa. Pole, akamba vana ka va sole Yehova, va tu tindula kokuaye. Eli olio esunga lieci Embimbiliya li tu vetiyila oku nõla akamba vetu lolondunge! Nda akamba vetu va sole Suku, ci kaile etu ale ovo, tu li kuatisa pokati. Tu ka tẽla oku ‘amamako oku li vetiya pokati loku li pamisa pokati.’—1 Va Tesalonike 5:11.
2. Oku nõla kuove akamba, ku ka kokela nye ku Yehova?
Yehova o nõla lutate akamba vaye. “Eye o kuete ukamba wocili lomunu wa suñama.” (Olosapo 3:32) Yehova o liyeva ndati nda tu nõla akamba vana ka vo sole? Eye o sumua calua! (Tanga Tiago 4:4.) Pole, nda tu yuvula akamba vãvi, tu sanjuisa calua Yehova, eye o tu nõla ndakamba vaye, tu pamisa ukamba wetu laye kuenda lomanu vana vo sole.—Olosamo 15:1-4.
LILONGISA ONDONGOSI
Kũlĩhĩsa esunga lieci oku nõla ciwa akamba vetu ci kuetele esilivilo kuenda tala ndomo o pondola oku kuata akamba vana va ka ku kuatisa komuenyo.
3. Kuata utate oco ku ka nõle akamba vãvi
Omanu ka va sole Suku kuenda ka va pokola kolonumbi viaye, akamba vãvi. Tala OVIDEO, noke konomuisa epulilo li kuãimo.
Tu pondola oku linga ndati ukamba ũvi lonjila yimue okuti ka tu ci limbuka?
Tanga 1 Va Korindo 15:33, noke konomuisa apulilo a kuãimo:
Omanu vapi va pondola oku kala akamba vãvi kokuove? Momo lie?
Tanga Olosamo 119:63, noke konomuisa epulilo li kuãimo:
Nye ci situlula nda omunu umue o ka kala ekamba liwa ale sio?
O masã yimue ya vola yi pondola oku volisa vikuavo. Ukamba ũvi u pondola oku ku nyõla ndati?
4. Omanu va litepa letu, va pondola oku kala akamba vawa kokuetu
Embimbiliya li tukula alume vavali vo ko Isareli yosimbu okuti, Daviti la Yonatão. Pokati kavo pa kala etepiso lialua, ci kaile kanyamo kuenda kekalo liomuenyo; pole, va kuata ukamba umue uwa. Tanga 1 Samuele 18:1, noke konomuisa epulilo li kuãimo:
Momo lie ka tu sukilila oku kuata lika akamba vakuanyamo amuamue letu, ale ekalo limuamue?
Tanga Va Roma 1:11, 12, noke konomuisa epulilo li kuãimo:
Akamba vana va sole Yehova va li pamisa ndati pokati?
Vocindekaise covideo, tala ndomo manji umue umalẽhe a sanga akamba kuna eye ka lavokaile. Tala OVIDEO, noke konomuisa apulilo a kuãimo.
Ndeci ca lekisiwa vovideo, momo lie olonjali via Akil, via lekisila esakalalo lakamba vaye vo kosikola?
Ovina vipi vio vetiya oku sola amalẽhe vaco?
Eye wa tẽla oku yula ndati ulika?
5. Ndomo tu kuata akamba vawa
Lilongisa ndomo o sanga akamba vocili—kuenda ndomo o kalavo ekamba liwa.Tala OVIDEO.
Tanga Olosapo 18:24 kuenda 27:17, noke konomuisa apulilo a kuãimo:
Akamba vocili va li kuatisa ndati pokati?
Ove o kuete hẽ akamba vawa ndava va lekisiwa vovideo? Nda ku kuete, o livala ndati ukamba lomanu vamue?
Tanga Va Filipoi 2:4, noke konomuisa epulilo li kuãimo:
Oco o kuate akamba vawa, o sukila oku kala ekamba liwa. O pondola oku ci linga ndati?
Oco o kuate akamba vawa, o sukila oku kala ekamba liwa
OMANU VAMUE VA POPIA VATI: “Ocina ca velapo oku kuata akamba oku kala ño ndoto sio.”
Nda wa popia nye?
NYE WA LILONGISA?
Nda tu nõla akamba vetu lolondunge, tu sanjuisa Yehova kuenda tu kuatisiwavo.
Oku Pitulula
Momo lie oku nõla kuetu akamba ku kuetele esilivilo ku Yehova?
Akamba vapi tu sukila oku yuvula?
O pamisa ndati ukamba wove lomanu va sunguluka?
OCO O KŨLĨHE OVINA VIKUAVO
Tala ndomo akamba vawa va tu kuatisa vapuluvi ohali.
“Pamisa Ukamba Wove la Vamanji Osimbu Esulilo ka Lieyile” (Utala Wondavululi wa Kuvala 2019)
Kũlĩhĩsa ananga a pondola oku ku kuatisa oku nõla akamba vawa.
“Ndi Linga Ndati Akamba Vawa?” (Amalẽhe va Pula—Atambululo a Kuatisa, Elivulu 1, ocipama 8)
Nye o sukila oku kũlĩha catiamẽla koku linga ukamba vo internet?
Vulandu losapi hati: “Nda yonguile oku kuata isia,” limbuka eci ca vetiya ulume umue oku kũlĩhĩsa ciwa akamba a nõlele.
“Embimbiliya li Pongolola Omuenyo Womanu” (Utala Wondavululi 1 wa Kupupu 2012)