Lekisa Ohenda

Ceci Yesu a Linga

OVIDEO: Yesu o Sakula Ulume Umue Omeke

1. Tala OVIDEO, ale tanga Yoano 9:1-7. Noke tambulula apulilo a kuãimo:

1. Anga hẽ Yesu tete—wa sakula ulume omeke, ale wo kundila olondaka viwa?—Tala Yoano 9:35-38.

2. Momo lie o simĩla okuti onjila ndomo Yesu o kundila yo vetiya oku lekisa onjongole yalua yoku yevelela olondaka viwa?

Nye tu Lilongisila ku Yesu?

2. Omunu umue o pondola oku lekisa onjongole yalua yoku yevelela esapulo lietu nda wa limbuka okuti, tuo kapako.

Setukula Yesu

3. Lekisa ocikembe komunu. Seteka oku sokolola ndomo eye a liyevite.

1. Lipula ndoco: ‘Ovina vipi vi kasi oku u sakalaisa? Ovina vipi vi kuete esilivilo kokuaye, ale a sole?’ Poku ci linga, ci ka ku kuatisa oku lekisa ohenda lonjila ndomo wa tuwa kuenda lutima wosi.

2. Lekisa okuti wa kapako esakalalo liomunu poku u yevelela lutate. Nda eye wa ku sapuila ndomo a liyevite catiamẽla kocina cimue, ale wa tukula ocitangi cimue a kasi oku liyaka laco, ku ka pongolole osapi yombangulo yaco.

4. Vangula lohenda kuenda lesumbilo. Nda o lekisa ohenda komunu kuenda o yongola muẽle oku u kuatisa, eye o ka ku yevelela omo lionjila o vangula laye. Kuata utate leci o popia, onjila ndomo o popia kuenda yuvula oku vangula ovina vi sumuisa omunu.

5. Kala ukuakukuatisa. Sanda apuluvi awa oco o kuatise omunu wa sangiwa. Nda tu lekisa ohenda komunu, ci ko vetiya vali oku lekisa onjongole yoku sapela letu.