POKU FETIKA OMBANGULO
OCIPAMA 4
Lekisa Umbombe
Ocisonehua: “Loku omboka tendi vakuene okuti, va velapo ene vu sule.”—Va Fil. 2:3.
Ceci Paulu a Linga
1. Tala OVIDEO, ale tanga Ovilinga 26:2, 3. Noke tambulula apulilo a kuãimo:
Paulu wa lekisa ndati umbombe konjila ndomo a vangula la Soma Agripa?
Paulu wa tiamisila ndati esivayo ku Yehova kuenda Kovisonehua okuti kokuaye muẽle sio?—Tala Ovilinga 26:22.
Nye tu Lilongisila ku Paulu?
2. Esapulo lietu li vetiya vali calua nda tu vangula lumbombe kuenda lesumbilo.
Setukula Paulu
3. Ku ka vangule lepela. Yuvula oku koka ovisimĩlo viokuti ove wa kũlĩha ovina viosi kuenda omunu ukuavo ka kũlĩhĩle lacimue. Vangula laye lesumbilo.
4. Lekisa okuti Embimbiliya olio ono yalongiso ocili o kasi oku kunda. Vondaka ya Suku mu sangiwa ovisimĩlo vi vetiya ovitima viomanu. Poku talavaya lalio, tu va kuatisa oku tungila ekolelo liavo kociseveto ca suapo.
5. Amamako oku tulumũha. Ku ka lipilike loku popia okuti, ove o kuete esunga. Ka tu yongola oku lihoyisa. Lekisa umbombe loku tulumũha, kuenje kũlĩha epuluvi o sukila oku tundapo. (Olosap. 17:14; Tito 3:2) Nda wa vangula lumbombe cecelela okuti, omunu o ka yevelela esapulo lietu vepuluvi likuavo.