OKU LINGA OLONDONGE
OCIPAMA 10
Tẽlisa Ohuminyo
Ocisonehua: “Ka tua nõlele lika oku vu sapuili olondaka viwa via Suku, pole, tuo wĩhivo ovimuenyo vietu, momo vu soliwe calua letu.”—1 Va Tes. 2:8.
Ceci Yesu a Linga
1. Tala OVIDEO, ale tanga Yoano 3:1, 2. Noke tambulula apulilo a kuãimo:
Momo lie Nikodemo a nõlelepo oku sapela la Yesu luteke?—Tala Yoano 12:42, 43.
Poku li sanga la Nikodemo luteke, Yesu wa lekisa ndati okuti wa likapeleleko oku linga olondonge?
Nye tu Lilongisila ku Yesu?
2. Tu lekisa okuti tu sole omanu poku tẽlisa ohuminyo yoku va kuatisa oku linga olondonge.
Setukula Yesu
3. Lilongisi votembo kuenda pocitumãlo ca sungulukila ondonge yove. Citava okuti, vosemana eye o sole oku lilongisa keteke, ale kowola yimue. Anga hẽ eye o lianja vali nda o lilongisila kocitumãlo caye cupange, konjo yaye, ale kocitumãlo cikuavo? Nda citava, pongolola esokiyo liove, oco o lilongise laye votembo kuenda pocitumãlo co sungulukila.
4. Lilongisi olonjanja viosi. Nda ove o linga ungende umue, ku ka ecelele okuti elilongiso li liwekapo toke eci o tiuka. Pole, kũlĩhĩsa nda:
O linga elilongiso vosemana yaco, pole, kowola yikuavo.
O linga elilongiso pocakati cotelefone, ale covideoconferencia.
O pinga kukundi ukuavo oco a yi linge.
5. Likutilila oco o kuate ocituwa ca sunguluka. Pinga ku Yehova oco a ku kuatise okuti, ku liwekapo oku longisa ondonge yove, ndaño ka yi lilongisa olonjanja viosi, ale yi kasi oku cilua oku kapako alungulo Ovisonehua. (Va Fil. 2:13) Citava okuti, ondonge yove yi kuete ovituwa vialua viwa. Omo liaco, likutilila oku pinga ekuatiso oco o tiamisile utima kokuavio.