Longisa Lonjila yi Lomboloka Ciwa

Ceci Yesu a Linga

OVIDEO: Yesu o Lungula Umalẽhe Ombiali Haeye Ohuasi

1. Tala OVIDEO, ale tanga Marko 10:17-22. Noke tambulula apulilo a kuãimo:

1. Citava okuti ovituwa vipi viwa Yesu a limbuka kumalẽhe ombiali?

2. Momo lie Yesu a sukilile oku lekisa ocisola kuenda utõi oco a lungule umalẽhe waco lonjila yi lomboloka ciwa?

Nye tu Lilongisila ku Yesu?

2. Tu sukila oku lekisa ocisola kolondonge vietu loku vi lomboluila lonjila yi lomboloka ciwa ovina ovio vi sukila oku linga, oco viamameko oku pamisa ukamba wavo la Yehova.

Setukula Yesu

3. Kuatisa ondonge yove oku litumbikila ovimãho loku vi tẽlisa.

1. Talavaya lonepa “Ocimãho” ci kasi kocipama locipama celivulu Sanjukili Omuenyo Otembo ka yi Pui!

2. Kuatisa ondonge yove oku kũlĩhĩsa ananga yi sukila oku eca, oco yi tẽlise ovimãho viotembo yitito, levi viotembo yalua.

3. Olonjanja viosi pandiya ondonge yove omo lioku amamako oku kula konepa yespiritu.

4. Kũlĩhĩsa ovina vi kasi oku tateka ondonge oku amamako kuenda yi kuatisa oku vi yula.

1. Lipula ndoco:

   • ‘Nda ondonge yange ka yeci ananga a sukiliwa oco yi papatisiwe, nye ci kasi oku u tateka?’

   • ‘Nye ndi sukila oku linga oco ndu kuatise?’

2. Likutilila ku Yehova oku pinga utõi, oco o sapele londonge yove lonjila yi lomboloka ciwa kuenda locisola oco yi limbuke ovina oyo yi sukila oku linga.

5. Liwekapo oku longisa olondonge ka vi kuli konepa yespiritu.

1. Oco o kũlĩhe nda elilongiso liaye Liembimbiliya li eca onima yiwa, lipula ndoco:

   • ‘Ondonge yange yi kasi hẽ oku kapako ovina yi lilongisa?’

   • ‘Ya siata hẽ oku endaenda kolohongele viekongelo loku sapuilako vakuavo ocili?’

   • ‘Nda oyo yi kasi oku lilongisa otembo yalua, yi yongola hẽ oku linga Ombangi ya Yehova?’

2. Nda ondonge ka yeci ondimbukiso layimue yoku kula:

   • Yi sapuila oco yi sokolole ovina vi kasi oku u tateka.

   • Lutate, yi lomboluila esunga lieci o liwekelapo oku u longisa.

   • Yi sapuila ovina yi sukila oku linga, oco yi fetike oku lilongisa vali.