Sanjukila Ukulihiso Yehova Aku Iha
“Ava va yeva ondaka ya Suku kuenje va yi pokola ovo va sumuluha.”—LUKA 11:28.
1. Otembo yipi Yehova a fetika oku livanguisa lomanu?
YEHOVA omanu o va sole calua, kuenda o va yonguila ekalo limue limue liwa. Omo liaco, ka ci komohisa okuti, eye wa siata oku li vanguisa lavo. Oku livanguisa kuaco, kua fetikila vocimbo co Edene. Ndomo elivulu Liefetikilo 3:8 li ci lombolola, eteke limue, eci Yehova Suku a kala loku “ñuala ñuala vocumbo koñolosi,” Adama la Heva “va yeva ondaka ya Yehova Suku.” Omunu vamue va siata oku popia hati, eci ci lekisa okuti, koloneke viaco, Yehova wa kala locituwa coku livanguisa la Adama eteke leteke. Ci kale okuti oco muẽle ca kala ale sio, ocili ceci okuti, Embimbiliya li lombolola ciwa okuti, Suku ka ecaile lika epindiso kulume watete, pole wo longaisavo cosi sukilile oku kuliha oco a te?lise ciwa ovikele viaye.—Efetikilo 1:28–30.
2. Ndamupi ulume watete lukãi waye veya oku tinduka ovo muẽle konjila yoku songuiwa la Yehova kuenda ca nena onima ye?
2 Yehova wa eca omuenyo ku Adama la Heva, kuenda omoko yoku tumila ovinyama viosi, kuenda yoku viala ovina viosi vi kasi kulo kilu lieve. Kua kala lika ocina cimosi va va handelekele okuti, ka ci tava oku ci linga. Suku wa va handelekele hati, ka ci tava oku lia kuti wukulihiso weci ciwa leci civi. Loku yonjiwa la Satana, Adama la Heva va lueya ocihandeleko ca suku. (Efetikilo 2:16, 17; 3:1–6) Ovo, va nõlapo oku li tumila ovo muẽle, kuenda oku litepisila ovo muẽle eci ciwa leci civi. Poku linga ndoco, ovo luveke wavo, va tinduka ovo muẽle konjila yoku songuiwa Lululiki wavo ukuacisola. Noke, kelinga eli, kueya oku iyilila ovitangi vialua kokuavo kokuavo muẽle kuenda kocitumbulukila cavo. Adama la Heva noke veya oku kuka, kuenje va fa, kuenda ka va kuatele elavoko lioku pinduiwa. Ocitumbulukila cavo, ceyavo oku piñala ekandu, kuenje onima yaco oku fa.—Va Roma 5:12.
3. Momo lie Yehova a liganguisilile la Kaini, kuenda Kaini wa tambuluiya ndati?
3 Ndaño lusuanji waco wa pita vocumbo co Edene, Yehova lopo, wamamako loku livanguisa lovilulikilo viaye omanu. Kaini, omõla watete wa Adama la Heva, wa kala ocipepi loku yuliwa lekandu. Yehova wo lungula hati, o kasi loku tindukila konjila yove yivi, puãi ‘linga eci ciwa.’ Kaini ka tavele kelungulo liaco eli liocisola, kuenje wa ponda manjaye. (Efetikilo 4:3–8) Omo liaco, omanu vatatu, okuti ovo va kala tete palo posi, va lekisa etombo lioku pokola kolonumbi, via sunguluka via Suku una wa va iha omuenyo, okuti eye ukuakueca olonumbi komanu vaye oco vopeko ekuatiso. (Isaya 48:17) Hesumuokuolio eci ceya oku nenela Yehova.
Yehova wa li Situluila Pokati Komanu Vaye Vakuekolelo Vokosimbu
4. Kueci catiamẽla kocitumbulukila ca Adama, Yehova wa kolelele nye, kuenda esapulo lipi lielavoko eye a eca kocitumbulukila ca Adama la Heva kuenda wa lieca lelavoko lia nye?
4 Ndaño okuti Yehova wa kuatele esunga lioku liwekapo oku livanguisa lomanu, eye ka ci lingile. Eye wa kolelele okuti, vamue pokati kocitumbulukila ca Adama vaka pokola kolonumbi Viaye. Handi vali, eci Yehova a pisa Adama la Heva, eye wa tukula eci catiamẽla kokuiya ‘kuombuto’ okuti, pokati kayo Lonyõha, Satana Eliapu, paka kala ukuse walua. Vokuenda kuotembo, Satana oka sasuiwa kutue. (Efetikilo 3:15) Ocitumasuku eci, ca kala esapulo limue li sanjuisa, hailio lieca elavoko ku vana “va yeva ondaka ya Suku kuenje va yi pokola.”—Luka 11:28.
5, 6. Kosiahulu Ndamupi Yehova a enda loku livanguisa lomanu vaye, kuenda eci ca va kuatisa ndati?
5 Yehova wa sapuila ocipango caye ku vakuekolelo vakuasimbu ndeci, ku Noha, ku Avirahama, ku Isake, ku Yakoba, kuenda ku Yovi. (Efetikilo 3:13; Etundilo 33:1; Yovi 38:1–3) Noke, lekuatiso lia Mose, Yehova wa sokiya olonumbi viovihandeleko oco vi songuile ofeka ya va Isareli. Ocihandeleko ca eciwile ku Mose ca va kuatisa kolonepa viñi viñi viomuenyo wavo. Omo lioku pokola kocihandeleko caco, va Isareli va litepele lomanu vakualofeka vikuavo, oco va linge omanu va likasi va Suku. Suku wa likuminyile ku va Isareli hati, nda va pokuile Kocihandeleko caye, nda ka va sumululuisile lika lekuatiso lioketimba, pole lo kespiritu okuti va linga olosoma lovitunda, kuenda nda va lingavo ofeka yimue yi kola. Ocihandeleko caco ca lekasailevo eci ci tava oku liwa, kuenda eci catiamẽla koku liyelisa oco va kuate uhayele uwa. Handi vali, Yehova wa lunguilevo eci catiame?la kovitangi nda vieyilila koku siapo oku pokola kocihandeleko caye.—Etundilo 19:5, 6; Esinumuilo 28:1–68.
6 Vokuenda kuotembo, alivulu akuavo afuimilua la Suku, eya oku vokiyiwa kulala wocili wovisonehua Viembimbiliya. Ovolandu esapulo a lombolola ndomo Yehova a linalisa ciwa lolofeka kuenda lomanu. Alivulu ovisungo a lombolola ciwa ovituwa viaye. Alivulu a sonehiwa lovaprofeto a situlula ndomo ocipango ca Yehova cika tẽlisiwa kotembo yiya kovaso. Alume vakuekolelo vokosimbu, va lilongisa lutate wocili kuenda va kuama ciwa ovisonehua viaco via fuimilua. Umue pokati kavo wa soneha hati: “Ondaka yove oyo ovela yolomai viange, haiyo ocinyi cokonjila yange.” (Osamo 119:105) Ku vosi vana va kuatele onjongole yoku yevelela, Yehova wa va longisa, kuenda weya oku va kuatisa oku kuata elomboloko liocili.
Ocinyi Cikasi Oku Amamako Loku Nina
7. Ndaño okuti Yesu wa linga ovikomo, Ndamupi eye a kulihiwile vali enene, kuenda momo lie?
7 Vokuenda kuocita catete canyamo, ovisoko via vakuetevo lia va Yudea, Kocihandeleko veya oku vokiyako oviholo viomanu. Ocihandeleko ceya oku pengisiwa, kuenje ka ca kale vali ono yelomboloko puãi ca linga ocilemo omo lioviholo viavo. (Mateo 23:2–4) Kuenje, kunyamo wa 29 K.K, Yesu wa molẽha nda Mesiya. Eye ka tumiwile lika oco a file omanu, pole weyililevo ‘oku imbila uvangi ocili.’ Ndaño okuti wa linga ovikomo, eye wa kulihiwile vali enene ‘Ndulongisi.’ Oku longisa kuaye kua kala ndocinyi ci mihila omanu va kasi vupeke kespiritu, okuti va kembiwa lovisimilo viomanu. Yesu wa popia hati: “Ame ndi cinyi coluali.”—Yoano 8:12; 11:28; 18:37.
8. Alivulu api afuimilua la Suku a sonehiwa kocita catete canyamo K.K, kuenda Ndamupi a kuatisa Akrsitão vo kocita catete?
8 Noke, kueya oku vokiyiwa Avangeliu, okuti ovolandu akuãla a lombolola eci catiamẽla komuenyo wa Yesu, kuenda kuetevo Liakristão noke yolofa via Yesu. Noke, kueya oku kala ovikanda via sonehiwa lolondonge via Yesu, kuenda ono yovitumasuku vielivulu Liesituluilo. Ovikanda viaco evi, oku vi tokeka Lovisonehua via va Heveru, vi suisapo ulala wocili walivulu a sangiwa Vembimbiliya liosi. Lekuatiso liondunda eyi yalivulu afuimilua la Suku, Akristão ‘kumue lolosandu veya oku kuliha ovisimilo viosi vi kola ndeci, upati lusõvi loku lepa kuenda oku longa kuocili.’ (Va Efeso 3:14–18) Ovo va kuete ‘ovisimilo ndevi via Kristu.’ (1 Va Korindo 2:16) Ndaño ndoco, Akristão vo kocita catete ka va kuatele elomboloko lia suapo liocina viosi viatiamẽla kocipango ca Yehova. Upostolo Paulu wa sonehela ku vakuavo va kuetavo hati: “Cilo tu vanja vanja volumuilo lua vuvala.” (1 Va Korindo 13:12) Olumuilo luaco lua pondola oku mõlehisa ño ovina vimue, pole ka lua mõlehisile ovina viosi. Elomboloko lia suapo Liondaka ya Suku lia kala handi kovaso.
9. Elomboloko lipi lia siata oku eciwa vokuenda ‘kuoloneke vilo via sulako?
9 Cilo, tu kasi kotembo yi tukuiwa hati, “koloneke via sulako,” okuti ‘kotembo yimue yohali yalua.’ (2 Timoteo 3:1) Uprofeto Daniele wa popele hati, vokuenda kuotembo yaco, ‘ukulihiso [wondaka ya Suku] uka lua.’ (Daniele 12:4) Omo liaco, Yehova, okuti eye Wavelapo koku Livanguisa lomanu, wa siata oku kuatisa vakuotima wa sunguluka oco va kuate elomboloko Liondaka yaye. Owiñi wakahandangala cilo u kuete elomboloko liokuti, Yesu Kristu wa vialekiwa kusoma oko kuli kunyamo wo 1914. Ovo va kulihavo okuti, eye ndopo muẽle oka nena esulilo liovina viosi vivi vi kasi voluali lulo, kuenje noke luka pongoluiwa vofeka yimue yelau. Etosi eli li silivila ndeti liatiame?la koku kundiwa kuolondaka viwa Viusoma, vi kasi loku kundiwila cilo kolonepa viosi violuali.—Mateo 24:14.
10. Vokuenda kuanyamo Ndamupi omanu va siata oku tenda elungulo lia Yehova?
10 Ocili okuti, vokuenda kuesapulo, Yehova wa siata oku sapula komanu vosi va kasi palo posi eci catiamẽla kocipango caye. Embimbiliya li tukula omanu valua okuti, va pokuile kondaka yaye yolondunge, kuenje va sumuluisiwa omo liepokolo liavo. Embimbiliya li tu lomboluilavo ovolandu omanu vana okuti, ka va pokuile kelungulo lia Suku lia eciwa locisola, puãi, va kuama onjila yivi ya Adama la Heva li tuala kenyõleho. Yesu wa linga ocindekaise culandu owu poku lombolola eci catiamẽla kolonjila vivali via litepa. Yimue yi tuala kenyõleho. Vonjila ya tanda omo mu kasi omanu vana ka va tava Kondaka ya Suku. Yikuavo, oyo onjila yi tuala komuenyo ko pui. Onjila ya sukatela, yomanu vana lika va tava Kembimbiliya ndomo li kasi, okuti olio Ondaka ya Suku, kuenda va pokola kovihandeleko vialio.—Mateo 7:13, 14.
Tu Sanjukili Eci tu Kuete
11. Ukulihiso wetu kuenda oku tava Kembimbiliya, u lekisa uvangi wa nye?
11 Ove hẽ o kasi pokati komanu vana va nõlapo oku endela vonjila yi tuala komuenyo? Nda ocili muẽle, ove o yongola oku amamako loku endela vonjila yaco. Ndamupi ove o pondola oku ci linga? Olonjanja viosi ivaluka asumuluho wa siata oku tambula omo lioku kuliha ocili Cembimbiliya, kuenda elinga lialio komuenyo wove. Oku tava ño handi kolondaka viwa, owo uvangi u lekisa okuti, ove wa sumuluisiwa la Suku. Yesu wa tukula eci catiamẽla kondaka eyi eci a likutilila ku Isiaye loku popia hati: “A Tate, a Cime cilu losi, hu sivaya omo wa sitikila ovina evi kolonoño la vakualondunge kuenje wa vi situluila komãla.” (Mateo 11:25) Vakuakutamba ombisi lavakuakutambula elisimu, elongiso lia Yesu lia va lombolokele ciwa, pole, asongui vetavo okuti va lilongisa calua kosikola, ka lia va lombolokele. Omo liaco, Yesu wamisako loku popia hati: “Lomue o tẽla oku iya kokuange, te Isia wa numa u koka.” (Yoano 6:44) Nda ove o kuete ukulihiso Wembimbiliya, kuenda wa tava kueci olio li tu longisa, owu uvangi wokuti, ove wa kokiwa la Yehova. Eci te tua ci sanjukila.
12. Kovina vipi Embimbiliya li tu iha elomboloko lia suapo?
12 Ondaka ya Suku yi kuete ocili ci yovola kuenda yi tu iha elomboloko. Vosi okuti va kapako ukulihiso Wembimbiliya, va yovoka koviholo, lo kolondotilina viesanda, kuenda kupeke wovutima u kasi loku tateka olohuluwa viomanu valua. Ndeci, oku kuliha ocili catiamẽla kueci ci pita lava va fa, ci tu yovola koku kuata usumba lomanu va fa kuenda koku kuata ohele yokuti, vangandietu va fa va kasi oku talisiwa ohali. (Esekiele 18:4) Oku kuliha ocili catiamẽla kovangelo vãvi, ci tu kuatisa oku yuvula oku kupukila vonjanjo yolondele. Elongiso liatiamẽla kepinduko, lia siata oku lembeleka vana va fisa vangandiavo. (Yoano 11:25) Ovitumasuku Viembimbiliya vi tu lekisa eci catiamẽla kotembo tu kasi kuenda vi tu iha ekolelo kolohuminyo via Suku viatiamẽla kueci ci keya kovaso. Ovina evi vi pamisavo elavoko lietu lioku ka kala otembo yenda hu.
13. Ndamupi oku pokola Kondaka ya Suku ci tu kuatisa ketimba?
13 Olonumbi via Suku vi sangiwa Vembimbiliya vi tu longisa oku kuama onjila yina okuti, yi tu nenela uhayele wocili wo ketimba. Ndeci, tua lilongisa oku yuvula ovituwa vina okuti vi nyõla etimba lietu, ndeci oku sipa eliamba, kuenda ovina vikuavo. Tu yuvula uholua. (1 Va Korindo 7:1) Oku pokola kolonumbi via Suku viatiamẽla koku yuvula ukahonga, ci tu kuatisa oku liyovola kovovei ana a sambuka. (1 Va Korindo 6:18) Poku pokola kelungulo lia Suku lioku yuvula oku sola calua olombongo, etu ka tu nyõli ombembua yetu yovutima ndeci vamue va siata oku linga poku sandiliya ovokuasi. (1 Timoteo 6:10) Ndamupi ove wa siata oku kuatisiwa ketimba omo lioku pokola kondaka ya Suku vomuenyo wove?
14. Ocikele cipi espiritu sandu li kuete komuenyo wetu?
14 Nda tua pokola Kondaka ya Suku komuenyo wetu, tu tambula espiritu sandu lia Yehova. Tu lekisa ovituwa ndevi via Kristu, vina vi limbukiwila poku lekisa ohenda kuenda ocikembe. (Va Efeso 4:24, 32) Espiritu lia Suku li tu kuatisavo oku lekisa apako alio ndeci, ocisola, esanju, ombembua, epandi, unu, esunga, ekolelo, umbombe, kuenda esuluviko. (Va Galatia 5:22, 23) Ovituwa viaco evi, vi nena esanju lia piãla, kuenda vi vetiya ukamba wocili la vakuetu oku kongelamo vakuepata lietu muẽle. Etu tu kuata ongusu yovutima yina yi tu kuatisa oku pandikisa kovitangi lekolelo. Ove hẽ o pondola oku limbuka ndomo espiritu sandu li kasi loku mioñoluila omuenyo wove kuwa?
15. Osimbu tu amamako loku linga ocipango ca Suku komuenyo wetu, ekuatiso lipi hẽ tupuko?
15 Osimbu tu amamako loku tiamisila omuenyo wetu kocipango ca Suku, tu pamisa ukamba wetu la Yehova. Tu kolela muẽle okuti, eye wa kuliha ekalo lietu, kuenda o tu sole calua. Tua siata oku lilongisila kovina vi pita vomuenyo wetu okuti, eci tu sangiwa lovitangi, eye o tu kuatisa. (Osamo 18:18) Tua limbuka muẽle okuti, eye o yeva olohutililo vietu. (Osamo 65:2) Tua kolela kolonumbi viaye, momo tua kuliha okuti vika tu kuatisa. Kuenda tu kuete elavoko limue li komohisa liokuti, kotembo yaye ya sokiyiwa, Suku oka tuala kelipuo omanu vosi vo kolela, kuenda vaka tambula ocali comuenyo wenda ño hu. (Va Roma 6:23) Ondonge Tiago wa soneha hati: “Ameli ku Suku kuenje eye amela kokuene.” (Tiago 4:8) Ove hẽ wa siata oku limbuka okuti ukamba wove la Yehova u kasi loku livokiya muẽle osimbu wamamako loku amẽla kokuaye?
Ukuasi Umue ka u Sokisiwa
16. Apongoloko api Akristão vamue vo kocita catete va linga?
16 Upostolo Paulu wa ivaluisa Akristão olombuavekua vo kocita catete hati, vamue pokati kavo, va kala vakuokahonga, vakuakupekelisa, alume va lipekela lalume, ovimunu, vakuacipululu, oloholua, vakuakuimbula, kuenda olondiandia. (1 Va Korindo 6:9–11) Ocili Cembimbiliya, ca va vetiya oku linga apongoloko komuenyo wavo, kuenje, va ‘sukuiwa.’ Seteka oku sokolola ndomo omuenyo wove cilo nda wu kasi nda kua lilongisile ocili Cembimbiliya ci yovola. Ocili okuti, ocili eci Cembimbiliya ukuasi umue okuti ka u sokisiwa. Hesanjukuolio tu kuete omo okuti, Yehova o li vanguisa letu!
17. Ndamupi Olombangi via Yehova via siata oku tekuiwa kespiritu Kolohongele Viakristão?
17 Handi vali, sokolola asumuluho tua siata ou tambula omo liukamba tu kuete la vamanjetu vakuakova añi añi va sangiwa kolofeka viosi. “Ukuenje wa kolelua haeye wa lunguka,” wa siata ou angiliya okulia kuespiritu kotembo ya tukuiwa, ndeci Ambimbiliya, olorevista, kuenda alivulu akuavo a sandekiwa valimi añi añi. (Mateo 24:45–47) Kolohongele viekongelo via lingiwa vokuenda kunyamo wo 2000. Olombangi via Yehova kolofeka viñi viñi, via pitulula oku tanga alivulu ecelãla Embimbiliya atiamẽla Kovisonehua vio Heveru. Ovo va konomuisa eci catiamẽla komuenyo womanu va lomboluiwa velivulu Estudo Perspicaz das Escrituras. Ovo va lilongisa onepa yimue velivulu O Maior Homem Que já Viveu, kuenda va lilongisavo elivulu Preste Atenção à Profecia de Daniel! Kuenje, va lilongisavo eci ca soka akui atatu lepandu kovipama vioku tanga vi sangiwa Vutala Wondavululi, kuenda eci ci soka 52 kovipama vielilongiso. Handi vali, omanu va Yehova va tekuiwa kespiritu leci cisoka 12 katendelo ovipama Viupange Wetu Wusoma, kuenda osemana losemana, kua lingiwa olohundo viowiñi viñi viñi vi kuete uvangi Wembimbiliya. Hukuasikokuowo wukulihiso konepa yespiritu wa siata ou angiliyiwa!
18. Kovina vipi tua siata oku kuatisiwa lekongelo Liakrsitão?
18 Voluali luosi, ci pitahãla 91.000 kakongelo a siata oku eca ekuatiso kuenda ekoliso liukamba kolohongele. Tua siatavo oku kuatisiwa Lakristão vana okuti akulu vendamba kespiritu okuti va lekisa onjongole yoku tu kuatisa kespiritu. (Va Efeso 4:11–13) Ocili okuti, tua siata oku kuatisiwa calua lukulihiso wocili tua lilongisa. Ci sanjuisa calua oku kuliha kuenda oku vumba Yehova. Halondakakuovio viocili viukualosamo wa popia hati: “Va sumuluha vana okuti Yehova eye Suku yavo”!—Osamo 144:15,NW.
Ove hẽ Ocivaluka?
• Yehova wa enda oku li vanguisa lelie kosimbu eci handi Kristu keyile palo posi?
• Ndamupi ocinyi cespiritu ceya oku tua kocita catete, kuenda koloneke vilo?
• Asumuluho api eyilila koku kapako ukulihiso wa Yehova?
• Momo lie tu sanjukila omo liukulihiso wa Suku tu kuete?
[Alitalatu kemela 22]
Yehova wa sapula ocipango caye ku Noha, ku Mose kuenda ku Avirahama
[Elitalatu kemela 23]
Koloneke vietu vilo, Yehova o kasi loku eca elomboloko Liondaka yaye
[Alitalatu kemela 24]
Sokolola asumuluho tua siata oku tambula vongongela yetu ya vamanji vakuakova añi añi!