O Kasi hẽ Pokati Kava va Soliwe la Suku?

“U o kuete ovihandeleko viange kuenje o vi lava eye o sole, lu o sole ame eye o soliwe la Tate.”​—⁠YOANO 14:⁠21.

1, 2. (a) Ndamupi Yehova a lekisa ocisola caye komanu? (b) Nye Yesu a linga kuteke 14 Kosãi ya Nisana, kunyamo wo 33 K.K.?

YEHOVA o sole calua omanu vaye a lulika. Omo liaco, eye wa sola oluali kuenje, ‘wa eca Omõlaye wongunga okuti, wosi u kolela ka fi, puãi, o mola omuenyo ko pui.’ (Yoano 3:16) Omo okuti ocipito Conjivaluko yolofa via Kristu ci kasi ocipepi, Akristão vocili va sukila oku kũlĩha okuti, Yehova “wa tu sola etu, kuenje wa tuma Omõlaye ha lingi ocitundasonde cakandu etu.”​—⁠1 Yoano 4:⁠10.

² Kuteke 14 Kosãi ya Nisana, kunyamo wo 33 K.K., Yesu wongolola eci ci soka 12 kolondonge viaye. Kuenje, wa enda lavio vohondo yo kosapalalo ko Yerusalãi, omu va lingila ocipito Copaskoa yonjivaluko yeci va Isareli va yovuiwa kofeka yo Egito. (Mateo 26:​17-20) Noke yocipito caco ca va Yudea, Yesu wa pinga Yuda Isikariote oco a tunde. Kuenje, wa sokiya ondalelo yeya oku tukuiwa hati, Onjivaluko yolofa via Kristu.a Ondalelo yaco Yesu wa yi linga lolondonge viaye 11. Omo liaco, ombolo ka yi kuete etumbisa yi lomboloka etimba liaye, kuenda ovinyu yi kusuka, yi lomboloka osonde yaye. Ovolandu akuavo atiamẽla kondaka eyi, a sangiwa valivulu Evangeliu a sonehiwa la Mateo, la Marko, kuenda Luka. Kuenje, upostolo Paulu ocipito caco wa ci tukula hati, ‘ondalelo ya Ñala.’​—⁠1 Va Korindo 11:20; Mateo 26:​26-28; Marko 14:​22-25; Luka 22:​19, 20.

3. Ndamupi upostolo Yoano a linga elomboluilo liolowola lia sulako via Yesu kumue lolondonge viaye kosapalalo, lia litepa lalomboluilo akuavo?

³ Ocili okuti, upostolo Yoano ka tukuile lacimue catiamẽla koku pitisa ombolo lovinyu. Ci lekaisa okuti, eci a soneha Evangeliu liaye (kunyamo wo 98 K.K.), ocipito caco ca tumbikiwile ale pokati Kakristão vatete. (1 Va Korindo 11:​23-26) Upostolo Yoano wa tumiwa la Suku, o tu lomboluila eci Yesu a popia tete kuenda o lombololavo eci ceya oku pita noke yoku sokiya ocipito Conjivaluko yolofa Viaye. Ovolandu aco a sangiwa vovipama vitãlo Vievangeliu lia Yoano, a lombolola ndomo Suku a lekisa ocisola komunu lomunu. Omo liaco, tu konomuisi elivulu lia Yoano okupisa kocipama 13 toke 17.

Lilongisila Kongangu Yocisola ca Yesu

4. (a) Ndamupi Yoano a lombolola osapi yohundo Yesu a linga lolondonge viaye eci a tumbika ocipito Conjivaluko? (b) Lipi hẽ esunga lia velapo lieci Yehova a solela Yesu?

⁴ Ocisola oco osapi ya velapo vovipama vi lombolola elungulo Yesu a eca kolondonge viaye. Catiamẽla ‘kocisola,’ ondaka yaco Yesu wa yi lombolola volonepa viñi viñi kueci ci soka 31 kolonjanja. Ocisola Yesu a lekisa ku Isiaye Yehova, kuenda kolondonge viaye, ci sangiwa vali enene vovipama evi. Ocisola Yesu a lekisa ku Yehova, ci tava oku ci limbukila Vavangeliu a lombolola eci catiamẽla komuenyo waye. Pole, upostolo Yoano eye lika wa soneha olondaka via Yesu eci a popia hati: ‘Ndi sole Isia.’ (Yoano 14:31) Yesu wa popiavo hati, Yehova wo sola calua, kuenda wa lekisa esunga liaco poku popia hati: “Ndeci Isia a sole ame, haico ame ndo soli ene. Kali vocisola cange. Nda vu pokola kovihandeleko viange, vu kala vocisola cange, ndeci ame nda pokola kovihandeleko via Tate, kuenje ñasi vocisola caye.” (Yoano 15:​9, 10) Ocili okuti, Yehova o sole calua Omõlaye omo liepokolo liaye. Hangangukuoyo yiwa Yesu Kristu a eca kolondonge viaye!

5. Ndamupi Yesu a lekisa ocisola kolondonge viaye?

⁵ Ocisola Yesu a kuatela olondonge viaye, ca lekisiwa vali calua kefetikilo liulandu wa Yoano watiamẽla kohongele Yesu a linga lolondonge viaye. Yoano wa popia hati: ‘Osimbu ofesta yo Paskoa ka ya fetikile handi, Yesu wa kũlĩhĩle ale okuti ekumbi liaye lioku tunda voluali lulo ha endi ku Isia, lieya. Ava va kala vaye muẽle voluali lulo wa va sola, kuenje wa va sola muẽle toke kesulilo.’ (Yoano 13:⁠1) Koñolosi yaco, Yesu wa longisa olondonge viaye eci catiamẽla koku lekisa ocisola poku kuatisa vakuavo. Eye wa sukula olomãhi viavo. Eci oco omunu lomunu pokati kavo a sukilile oku lingila Yesu kuenda oku lingila vamanjaye, pole ovo hacoko va linga. Yesu wa linga upange waco lumbombe wocili, kuenje noke wa popia hati: “Nda ame ndi Ñala, Haime ndulongisi, nda nda sukula olomãi viene, nda co sesameli oku lisukuilavo olomãi viene pokati. Momo ndo wihi ongangu okuti vu lingavo ndeci ndo lingi.” (Yoano 13:​14, 15) Akristão vocili va sukila oku lekisa onjongole yalua kumosi lesanju poku kuatisa vakuavo.​—⁠Mateo 20:​26, 27; Yoano 13:⁠17.

Kuama Ocihandeleko Cokaliye

6, 7. (a) Etosi lipi lia velapo Yoano a tukula liatiamẽla koku tumbikiwa kuocipito Conjivaluko? (b) Ocihandeleko cipi cokaliye Yesu a eca kolondonge viaye? Kuenda ocina cipi cokaliye ci sangiwa vocihandeleko caco?

⁶ Esapulo lia Yoano li lombolola eci ca pita kosapalalo keteke 14 Kosãi ya Nisana koñolosi olio lika li tukula ndomo Yesu a pinga ku Yuda Isikariote oco a tunde. (Yoano 13:​21-30) Pole, ovolandu a sangiwa Vevangeliu a lekisa okuti, tete Yesu wa pinga ku Yuda omakuli oco a tunde, kuenje, noke oco Yesu eya oku linga ocipito Conjivaluko yolofa viaye. Eye wa pita otembo yimue loku vangula lovapostolo vaye vo kolela, kuenda wa va ĩha elungulo kumue lolonumbi. Osimbu tuamamako loku liangiliya oco tu ende kocipito Conjivaluko, tu sukila oku kuama olondaka Yesu a popia kotembo yaco. Omo liaco, tu yongola oku kala pokati ka vana va soliwe la Suku.

⁷ Elongiso liatete, Yesu a eca kolondonge viaye, okuti noke lieya oku tumbika ocipito Conjivaluko yolofa viaye, lia kala ocina cimue okuti ovo lalimue eteke va ci yevele. Eye wa popia hati: “Ndu wihi ocihandeleko cokaliye cokuti, lisoli pokati ndeci ame ndo solivo, haico ene lisolivo pokati. Oku oko vaka limbukila okuti vulondonge viange, nda ulisole pokati.” (Yoano 13:​34, 35, NW ) Vocihandeleko eci, ocina cipi hẽ ca kala cokaliye? Noke kuteke waco muẽle, Yesu wa ci lombolola ciwa eci a popia hati: “Ocihandeleko cange ceci, siti, Lisoli pokati ndeci ndo soli. Ocisola ca velapo eci ka kuli, cokuti omunu o pesila akamba vaye omuenyo waye.” (Yoano 15:​12, 13) Ocihandeleko ca Mose ci lekisa okuti, va Isareli va sukilile oku ‘sola ava va lisungue lavo ndeci va lisole ovo muẽle.’ (Ovisila 19:18) Pole, ocihandeleko ca Yesu camako vali. Akristão te va sola vakuavo ndeci Kristu a va sola okuti va kapa kohele ovimuenyo viavo omo liocisola va kuetele vamanjavo.

8. (a) Nye ca kongeliwa voku lekisa ocisola? (b) Ndamupi Olombangi via Yehova via siata oku lekisa ocisola caco koloneke vilo?

⁸ Ciwa okuti, kotembo yocipito Conjivaluko tu likonomuisa etu muẽle ndomo tu kasi, kuenda ndomo tu kasi la vakuetu vekongelo, oco tu tale nda tu kuete ocisola ndeci ca Kristu okuti oco ci kasi pokati Kakristão vocili. Oku likolisilako kuaco poku lekisa ocisola, olonjanja vialua ci lomboloka okuti, Akristão va nõlapo oku kapa kohele ndaño muẽle omuenyo wavo, pole, lalimue eteke va pakula vamanjavo. Eci ka ci lomboloka okuti tu likala oku linga eci ciwa catiamẽla kokuetu muẽle, pole tu nõlapo oku kuatisa vamanjetu kuenda omanu vakuavo. Upostolo Paulu wa eca ongangu yiwa yatiamẽla kondaka eyi. (2 Va Korindo 12:15; Va Filipoi 2:17) Kolonepa viosi violuali, Olombangi via Yehova via kũlĩhĩwa ciwa omo liocituwa cavo coku kuatisa vamanjavo kuenda vana va lisungue lavo. Omo liaco, va pita otembo yalua loku kundila vakuavo ocili Cembimbiliya.b​—⁠Va Galatia 6:⁠10.

Ukamba Umue u Soliwe Calua

9. Oco tu kuate ukamba wocili la Suku kumue Lomõlaye, nye tu sukila oku linga?

⁹ Oku soliwa la Yehova kuenda Omõlaye Yesu Kristu, oco ca velapo vali enene pokati kovina viosi. Oco tu limbuke ocisola caco, tu sukila oku linga cimue. Kuteke wa sulako Yesu a kala lolondonge viaye, eye wa popia hati: “U o kuete ovihandeleko viange kuenje o vi lava eye o sole, lu o sole ame eye o sola Tate, kuenje ndu solavo, loku limolehisa kokuaye.” (Yoano 14:21) Omo okuti tu kuete ukamba wocili la Suku kuenda Omõlaye, tu pokola kolonumbi viaye lesanju. Volonumbi viaco mua kongela ocihandeleko cokaliye coku lekisa ocisola, kuenda oku pokolavo kocikundi Yesu a tuma noke yepinduko liaye hati: ‘Kundila omanu loku imbila uvangi.’ Pole, ci sukilavo oku likolisilako loku ‘longisa omanu’ vana okuti va pokola kolondaka viwa.​—⁠Ovilinga 10:42; Mateo 28:​19, 20.

10. Ukamba we u kasi pokati kolombuavekua kuenda “olomeme vikuavo”?

¹⁰ Kuteke waco, poku tambulula epulilo lia lingiwa lupostolo Yuda (Tadeo), Yesu wa popia hati: “Umue, nda o sole ame, o pokola kondaka yange, Tate u solavo, oco etu tuiya kokuaye kuenje tu tunga laye.” (Yoano 14:​22, 23) Akristão olombuavekua, vana va lalekiwa oku viala la Kristu kilu, osimbu va kasi palo posi, va livala ukamba wocili la Yehova kuenda Lomõlaye. (Yoano 15:15; 16:27; 17:22; Va Heveru 3:1; 1 Yoano 3:​2, 24) Pole, “olomeme vikuavo,” okuti vi kuete elavoko lioku kala otembo yenda ño hũ palo posi, vi kuetevo ukamba wocili “lungombo” wavo Yesu Kristu. Handi vali, vi lekisavo ukamba wocili ku Yehova Suku yavo, momo va pokola kokuaye.​—⁠Yoano 10:16; Osamo 15:​1-5; 25:⁠14.

‘Kawa Tiamẽleli Koluali’

11. Elungulo lipi Yesu a eca kolondonge viaye?

¹¹ Vokuenda kuohongele ya sulako Yesu a linga kumue lolondonge viaye eci a kala loku lavoka olofa viaye, eye wa va lungula hati: Omunu wosi o soliwe la Suku, oka suvukiwa loluali. Eye wa popia hati: “Nda oluali lu u suvuki ivaluki okuti ame lua lianga oku suvuka. Nda wa kaili vakualuali nda oluali lua sola valuo, puãi, omo kavuvakualualiko, omo ame ndo noli voluali, oco oluali lu-u suvukili. Ivaluki ondaka nda popia lene, siti, Ukuenje ka velipo okuti ñala yaye o sule. Nda va fũkĩlisa ame, ene vo fũkĩlisivo, nda va pokola kondaka yange va pokolavo kondaka yene.”​—⁠Yoano 15:​18-20.

12. (a) Momo lie Yesu a lunguila olondonge viaye hati vika suvukiwa loluali? (b) Nye vosi yetu tu sukila oku konomuisa osimbu tu lavoka ocipito Conjivaluko?

¹² Yesu wa eca elungulo eli kolondonge viaye 11, kuenda Kakristão vosi vocili oco noke ka vaka kave koku kuata utõi kuenda oco ka vaka konyõhe omo lioku suvukiwa loluali. Eye wa vokiyako hati: “Nda popia lene ovina evi okuti ka vu konyuisua. Vo tundisi volosunangonga, kuenje, kuiya eteke okuti u o wipayi o soka hati, Nda vumba Suku. Kuenje ovina evi va vi lingila omo ka va kũlĩhile Isia ndaño ame.” (Yoano 16:​1-3) Ulume umue wa siata oku konomuisa eci ci kasi Vembimbiliya wa popia okuti, ondaka ya pongoluiwa hati, oku “konyuisua,” yi lomboloka ‘okuti omunu o fetika oku kamba ekolelo loku konyõha kua una eye a kuetele ekolelo, kuenje, eye o yapuka muẽle vonjila.’ Osimbu tu lavoka ocipito Conjivaluko ya Yesu, vosi yetu tu sukila oku sokolola omuenyo wa vana va lekisa ekolelo, cikale kosimbu ale kotembo yilo. Kuenje, tu kuami ongangu yavo yoku pandikisa kohali. Kuka ecelele okuti, oku suvukiwa ku tepulula ukamba wove la Yehova kuenda la Yesu. Pole, nõlapo muẽle oku kolela loku pokola kokuavo.

13. Nye Yesu a pinga ku Isiaye oco olondonge viaye vi kuatisiwe?

¹³ Vohutililo yokumalusula Yesu a lingila vohondo yo kosapalalo ko Yerusalãi, wa pinga ku Isiaye hati: “Nda va iha ondaka yove, kuenje oluali lua va suvuka, momo havakualualiko, ndeci ame siukualualiko. Si pingi okuti o vopa voluali, te okuti o va teyuila kevĩho. Ovo havakualualiko ndeci ame siukualualiko.” (Yoano 17:​14-16) Tu pondola oku kolela okuti, Yehova o lavulula vosi eye a sole, okuti o va kolisa osimbu vamamako loku litepa loluali.​—⁠Isaya 40:​29-31.

Amamako Locisola ca Isia Kuenda Comõlaye

14, 15. (a) Yesu wa sokisiwa la nye okuti ca litepa luyuva ka ‘wa salalele’? (b) ‘Ovianja,’ ‘viayuva,’ vi sokisiwa lelie?

¹⁴ Osimbu Yesu a kala oku vangula lolondonge viaye kuteke 14 kosãi ya Nisana, eye muẽle wa lisokisa ‘luyuva wocili,’ okuti ka u sokisiwa lowu wa va Isareli ka ‘wa salalele’ omo liekambo liavo liekolelo. Eye wa popia hati: “Ame nduyuva wocili, Tate eye ongunja yaco.” (Yoano 15:⁠1) Eci handi ulandu owu ka wa tẽlisiwile, uprofeto Yeremiya wa soneha olondaka via Yehova viatiamẽla komanu vo kotembo yaye okuti ka va kuatele ekolelo poku popia hati: “Haimo nda ku tuika nduyuva wa nõlĩwa kombuto yocili. . . . Wa pongoloka ndati okuti wa linga olunjuanjua?” (Yeremiya 2:21) Handi vali, uprofeto Hosea wa sonehavo hati: “Isareli uyuva wa salala, wimaima epako liawo. . . . Utima wavo we yuka uhembi.”​—⁠Hosea 10:​1, 2.

¹⁵ Ocili okuti, va Isareli ka va lekisile ovituwa viwa kefendelo, kuenda va tombele Suku omo liovituwa viavo vĩvi. Eci kua kambele lika oloneke vitatu oco Yesu a linge ohongele yaye ya sulako lolondonge viaye, eye wa vangula lasongui voko Yudea haivo vakuambambe hati: “Mopia lene siti, Usoma wa Suku upiwa kokuene kuenje weciwa kofeka yima apako awo.” (Mateo 21:43) Ofeka yaco yokaliye, okuti ‘va Isareli ya Suku,’ etendelo liavo lia soka 144.000 Kakristão olombuavekua, kuenda va kasi ‘ndovianja,’ ‘viayuva,’ okuti Yesu Kristu.​—⁠Va Galatia 6:16; Yoano 15:5; Esituluilo 14:​1, 3.

16. Nye Yesu a vetiya kolondonge viaye 11 okuti oco va sukilile oku linga? Kuenda ci popiwa hẽ ndati catiamẽla kolombuavekua via supapo kulo koloneke viesulilo?

¹⁶ Yesu wa sapuila kolondonge viaye 11 a kala lavio vohondo yoko sapalalo hati: “Ocanja cosi cange ka cimi epako, o ci sonjako, kuenje cosi cima epako, o ci sonjela oco cime epako lia lua. Puãi ene wa sonjelui ale londaka nda popia lene.” (Yoano 15:​2, 4) Ovolandu atiamẽla komanu va Yehova koloneke vilo, a lekisa okuti olombuavekua via supapo vi kuete ukamba wocili Lusongui wavo Yesu Kristu. (Va Efeso 5:23) Ovo va siata oku tava oku yelisiwa. (Malakiya 3:​2, 3) Tunde kunyamo wo 1919, ovo va siata oku ima apako alua Usoma wa Suku. Kuenje, tunde kunyamo wo 1935, etendelo liakamba va Yesu okuti, ‘owiñi wakahandangala,’ li kasi oku livokiya calua.​—⁠Esituluilo 7:9; Isaya 60:​4, 8-11.

17, 18. (a) Olondaka vipi via Yesu vi pondola oku kuatisa olombuavekua kuenda olomeme vikuavo oco vamameko locisola ca Yehova? (b) Ndamupi oku enda kocipito Conjivaluko ci tu kuatisa?

¹⁷ Handi vali, Yesu wa sapuila Kakristão vosi olombuavekua kumue lakamba vavo hati: “Kokuima kuene epako lia lua oko Tate a muisilua ulamba, kuenje vu lekisa okuti vulondonge viange. Ndeci Isia a sole ame, haico ame ndo soli ene. Kali vocisola cange. Nda vu pokola kovihandeleko viange, vu kala vocisola cange, ndeci ame nda pokola kovihandeleko via Tate, kuenje ñasi vocisola caye.”​—⁠Yoano 15:​8-10.

¹⁸ Vosi yetu tu yongola oku amamako loku lekisa ocisola ku Suku, kuenda eci ci tu vetiya oku lekisa apako awa Akristão. Eci tu ci linga pokupa esilivilo kapuluvi osi oku kunda ‘olondaka viwa viusoma wa Suku.’ (Mateo 24:14) Tu lingavo cosi tu tẽla poku lekisa ‘apako espiritu’ komuenyo wetu. (Va Galatia 5:​22, 23) Oku enda kocipito Conjivaluko yolofa via Kristu, cika tu ĩha utõi woku lekisa ocisola kuenda cika tu ivaluisa ocisola ca velapo ca Suku kuenda Comõlaye Kristu va tu kuetele​—⁠2 Va Korindo 5:​14, 15.

19. Nye ci kuatisa okuti tuka ci lilongisa vocipama cikuãimo?

¹⁹ Eci Yesu amãla oku lomboluila kolondonge viaye catiamẽla kocipito Conjivaluko, eye wa likuminya kokuavo hati Isiaye oka va tumisa ‘espiritu sandu oco li va kuatise.’ (Yoano 14:26) Vocipama cikuãimo, tuka lilongisa ndomo espiritu sandu li pondola oku kuatisa olombuavekua kuenda olomeme vikuavo, oco viamameko locisola ca Yehova.

[Atosi pombuelo yamẽla]

Apulilo Oku Pitulula

• Elongiso lipi lia sunguluka Yesu a eca kolondonge viaye kueci catiamẽla koku lekisa ocisola?

• Omo liocipito Conjivaluko, nye ca sungulukila okuti tu likonomuisa etu muẽle osimbu tu lavoka eteke liaco?

• Momo lie ka tu lulumĩla omo lieci Yesu a popia catiamẽla koku suvukiwa kuenda oku lambalaliwa loluali?

• ‘Uyuva wocili’ helie? Velie vatiamẽla ‘kovianja’ viaco, kuenda nye ci lavokawa kokuavo?

[Elitalatu kemẽla 23]

Yesu wa eca elongiso limue li komohĩsa kolondonge viaye lieci catiamẽla koku lekisa ocisola

[Elitalatu kemẽla 24]

Olondonge via Kristu vi pokola kocihandeleko coku lekisa ocisola poku likolisilako ovo muẽle