Apulilo Valingiwa Lavakuakutanga

Anga hẽ olohuminyo viosi tu lingila Suku olonjanja viosi vi kala ekisika?

Vembimbiliya ohuminyo yi lingiwila Suku, ocina cimue ci kuete esilivilo okuti ci sukila oku ci tẽlisa ndeci: oku eca cimue, oku iñila kupange umue ulikasi, oku likuminya ekalo limue ale oku yuvula oku linga ovina vimue okuti komanu valua, nda via sunguluka. Vembimbiliya mu sangiwa ovolandu amue atiamẽla kolohuminyo vialua okuti oco omanu va kuame onjila yimue, tete Suku wa sukilile oku linga cimue oco omanu va kuatele ekolelo kohuminyo yaco. Ndeci, Hana ina yuprofeto Samuele, “wa linga ohuminyo hati, A Yehova Ukualohoka nda . . . okuti oku njivala hacoko, puãi weca kufeko wove omõla ulume, ame omõlaco ndu weca ku Yehova oloneke viosi viomuenyo wange. Kutue waye ka ku piti omoko yomuto.” (1 Samuele 1:​11, NW) Pole, Embimbiliya li lombololavo eci catiamẽla koku likuminya cimue okuti, ocipango comunu waco muẽle. Ndamupi olohuminyo via kisikiwa Vembimbiliya?

Salomone Soma yo kofeka yo Isareli yosimbu wa popia hati: “Nda wa linga ohuminyo ku Suku ku ka livale oku yi tẽlisa.” Kuenje eye wa vokiyako hati: “Cosi wa likuminya ci linga. Ka ca sungulukile oku linga ohuminyo yina okuti noke ku yi tẽlisa.” (Ukundi 5:​4, 5, NW) Ocihandeleko ca ihĩwa va Isareli pokati ka Mose ca lombolola okuti: “Nda o likuminya ohuminyo la Yehova, Suku yove, ku ka lende oku ci linga, momo Yehova, Suku yove, o ku ci silĩhã muẽle; kuenje ci ku lingila ekandu.” (Esinumuĩlo 23:21) Omo liaco, oku linga yimue ohuminyo ku Suku ocikele cimue cinene. Eci ci kuete oku lingiwa lesunga limue liwa kuenda omunu o ci linga o kuete oku kũlĩhĩsa ciwa epondolo liaye lioku tẽlisa cosi ca kongeliwa vohuminyo yaco eye a linga. Nda ka kuete epondolo liaco, ciwa okuti eye ka lingi ohuminyo. Anga hẽ, eci ci lomboloka okuti olohuminyo viosi viatiamẽla kekisika?

Ci popiwa hẽ ndati, nda ohuminyo ya lingiwa yatiamẽla kocina cimue okuti noke tu lilongisa okuti ocina caco ka catiamẽle kocipango ca Suku? Kuenda ci lingiwa hẽ ndati nda ohuminyo yaco yatiamẽlele kovituwa vimue ka via sungulukile lefendelo liocili? (Esinumuĩlo 23:18) Ocili okuti, ohuminyo yaco ka yi kala vali ekisika. Omo liaco, ndeci Vocihandeleko ca Mose ohuminyo ya lingiwa lukãi ci tava okuti isiaye o likala oku tẽlisa ohuminyo yaco ale ulume waye.​—⁠Atendelo 30:​3-15.

Sokololavo omunu umue o lingila ohuminyo Suku okuti ka yongola oku kuela komuenyo waye wosi, pole noke eye o sanga atatahãi añi añi atiamẽla kohuminyo yaco a lingile. Kuenje noke o limbuka okuti, nda wamamako oku tẽlisa ohuminyo yaco, ci pondola oku u tuala koku linga ekandu ku Suku liatiamẽla koku tomba ovituwa viwa. Ci kuete hẽ esilivilo okuti eye amamako loku likolisilako oku tẽlisa ohuminyo yaco? Ka ca velelepo hẽ kokuaye oku liteyuila lonjila yimue ya sunguluka oco ka ka linge ekandu liatiamẽla koku tomba ovituwa viwa omo lioku siapo oku linga eci catiamẽla koku tẽlisa ohuminyo yaye okuti ka sukila oku likekembela kuenda oku pinga ongecelo ku Suku noke yoku linga ekandu? Omunu waco eye lika o kuete omoko yoku nõla eci a yongola. Lomue omunu ukuavo o pondola oku u nõlelako eci a yongola.

Ci popiwa hẽ ndati nda omunu wa linga ohuminyo noke weya oku limbuka okuti wa yayulako enene oku linga ohuminyo yaco? Ci kuete hẽ esilivilo okuti eye amamako oku tẽlisa eci a likuminya? Eci ka ca lelukile ku Yefita oku tẽlisa ohuminyo a lingilile Suku, pole eye lutate wocili oco a linga. (Olonganji 11:⁠30-⁠40) Nda omunu umue wa yapuka koku tẽlisa ohuminyo yaye, ci pondola oku ‘temĩsa’ Suku kuenda oku u sumuisa omo lieci omunu waco a linga. (Ukundi 5:⁠6) Oku tomba eci catiamẽla koku tẽlisa eci omunu a likuminya ci pondola oku tepulula esumũlũho lia Suku komunu waco.

Yesu Kristu wa popia hati: “Oku popia kuene ku linge nda oco, oco; nda hacoko, hacoko. Cosi ci pitahãla evi ca tunda kevĩho.” (Mateo 5:37) Ukristão ka sukila oku sakalala lika leci catiamẽla koku tẽlisa ohuminyo, pole o sukilavo oku tẽlisa cosi a vanguila kovaso a Suku kuenda komanu. Nye ci lingiwa nda omunu umue wa sanga atatahãi noke yoku litava ciwa pokati lomunu umue okuti cosi ca kala ciwa, pole noke yoku kũlĩhĩsa ciwa wa limbuka okuti kuli elimbi? Omunu waco o sukila oku tenda elinga liaco ndocitangi cimue cocili. Pole, omo liombangulo yimue yiwa ci tava okuti omunu ukuavo o nõlapo onjila yoku u wecela okuti ka ci sukila vali oku tẽlisa ohuminyo yaco.​—⁠Osamo 15:4; Olosapo 6:​2, 3.

Kueci catiamẽla koku tẽlisa olohuminyo kuenda ovina viosi vikuavo, nye tu sukila oku velisapo vali okuti ovina viosi ci sule? Olonjanja viosi tu amamiko loku sandiliya oku kuata ukamba uwa la Yehova Suku.

[Alitalatu kemẽla 30, 31]

Hana ka vanjele konyima kueci catiamẽla koku tẽlisa ohuminyo yaye

[Alitalatu kemẽla 31, 30]

Ndaño okuti ca tilĩle calua, pole, Yefita wa tẽlisa ohuminyo yaye