Eca Elembeleko Komanu VA Kasi Oku Tala Ohali

“Yehova wa mbuavekela . . . loku lembeleka [omanu] vosi va sumua.”​—⁠ISAYA 61:​1, 2.

1, 2. Helie tu sukila oku ĩha elembeleko kuenda momo lie?

YEHOVA, okuti eye Suku yelembeleko, o tu longisa oco tu lekise esakalalo la vakuetu eci va liyaka lovitangi. Eye o tu longisa oku ‘kolisa vana va hongua’ kuenda oku lembeleka omanu vosi va sumua. (1 Va Tesalonike 5:14) Eci kuiya ovitangi etu tu eca ekuatiso liaco ku vakuetu tu fendelela kumosi. Etu tu lekisavo ocisola komanu vana ka va kasi vekongelo kuenda ku vana okuti kosimbu va tu suvukile calua.​—⁠Mateo 5:​43-48; Va Galatia 6:⁠10.

² Yesu Kristu wa tanga ocitumasuku kuenda wa ci tiamisila kokuaye muẽle poku popia hati: “Espiritu lia Ñala Yehova lia mbuila, momo Yehova wa mbuavekela oku kundila vakuahali ondaka yiwa. Wa numa oku petula ava va teka itima, . . . loku lembeleka [omanu] vosi va sumua.” (Isaya 61:​1, 2; Luka 4:​16-19) Koloneke vilo, Akristão olombuavekua va siata oku limbuka okuti ocikundi caco catiamẽlavo kokuavo kuenje “olomeme vikuavo” vi kuetevo esanju poku li kongela kokuavo koku linga upange waco.​—⁠Yoano 10:⁠16.

3. Eci omanu va pulisa hati, “Momo lie Suku a ecelela okuti kuiya ovitangi,” ndamupi tu pondola oku va kuatisa?

³ Eci kuiya ovitangi omanu va sumua calua kuenje olonjanja vimue va siata oku pulisa ndoco: “Momo lie Suku a ecelela okuti kuiya ovitangi?” Embimbiliya lieca etambululo liepulilo eli. Pole, komunu una okuti ka lilongisa Embimbiliya, ci sukila otembo yalua oku kuata elomboloko liasuapo. Etu tu pondola oku sanga ekuatiso valivulu Olombangi via Yehova.a Omanu vamue va siata oku sanga elembeleko liocili eci va konomuisa Vembimbiliya ocinimbu cimue ndeci ci sangiwa kelivulu lia Isaya 61:​1, 2, cina ci lombolola onjongole ya Suku yoku eca elembeleko komanu.

4. Ndamupi ufeko umue Ombangi ya Yehova kofeka yo Polônia a kuatisa ekamba liaye va tangela kumosi una wa sumuile calua? Kuenda nye ove o pondola oku lilongisila kulandu waco oco o kuatise vakuene?

⁴ Cikale amalẽhe ale akulu, vosi yavo va sukila elembeleko. Ufeko umue wo kofeka yo Polônia okuti wa sumuile calua, wa pinga ekuatiso kukãi umue. Lumbombe wocili ekamba lina okuti Ombangi ya Yehova wa limbuka okuti, ufeko waco wa kuata apulilo alua kuenda atatahãi ndeci: “Momo lie ku kasilili evĩho lialua? Momo lie omanu va talela ohali? Momo lie manjange umalẽhe a talela ohali lulema? Momo lie utima wange ka u kuetele uhayele? Amanu vakuatavo va siata oku popia hati, Suku o yongola okuti tu tala ohali. Nda ondaka eyi ocili, ndika liwekapo oku tava kokuaye!” Manji ufeko okuti Ombangi ya Yehova, wa likutilila ku Yehova vokañunuñunu kuenje wa popia hati: “Nda pandula kuenda ndi ci sanjukila calua omo okuti ove wa pula kokuange eci catiamẽla kondaka eyi. Ndika seteka oku ku kuatisa.” Manji wa popia hati, ufeko waco wa kuata atatahãi alua tunde vutila waye kuenje Olombangi via Yehova vio kuatisa calua. Ufeko waco wamisako loku popia hati: “Nda lilongisa okuti, Suku hayeko o kasi oku talisa ohali omanu. Eye o kuete ocisola lomanu, o va yonguila eci ciwa kuenda ndopo muẽle oka linga apongoloko a komohĩsa palo posi. Ovoveyi, ovitangi vioku kuka kuenda olofa, ndopo muẽle vika puako kuenje omanu vosi va pokola ku Suku, vaka kala otembo yenda hũ vofeka yelau palo posi.” Manji wa lekisa kufeko waco elivulu Liesituluilo 21:​3, 4; Yovi 33:25; Isaya 35:​5-7. Noke yoku pita otembo yimue loku sapela, ufeko wa popia hati: “Kaliye ndi kuete elomboloko liesilivilo liomuenyo wange. Ci tava hẽ okuti ndu ku mõla vali eteke likuavo?” Eye weya oku fetika elilongiso Liembimbiliya okuti va lilongisa olonjanja vivali vokuenda kuosemana.

Kuatisa Vakuene Lelembeleko Lieciwa la Suku

5. Eci tu lekisa ukamba, nye cika lekisa elembeleko liocili?

⁵ Eci tu sandiliya oku lembeleka vakuetu, tu sukila oku lekisa olondaka vimue viukamba. Tu likolisilako oku eca elembeleko komanu vana va sumua poku kuama olondaka vina viatiamẽla kocitangi cavo. Elembeleko liaco ka ci tava okuti lieciwa lolondaka vina viombambe. Embimbiliya li tu sapuila okuti, “epandi kuenda okukolisiwa lovisonehua ku tu kokela elavoko.” (Va Roma 15:⁠4) Omo liaco, vepuluvi limue lia sunguluka, tu pondola oku lombolola eci catiamẽla Kusoma wa Suku kuenda oku lekisa Vembimbiliya ndomo usoma waco uka tetulula ovitangi viomanu. Handi vali, tu pondolavo oku lombolola esunga lioku kolela kelavoko liaco. Poku ci linga, tuka tẽla oku eca elembeleko liocili.

6. Ndamupi tu pondola oku kuatisa omanu oco va kuate elomboloko liokuti ovo va pondola oku kuatisiwa lelembeleko li tunda Vembimbiliya?

⁶ Oco omunu a kuatisiwe lelembeleko tua eca kokuaye, eye o sukila oku kũlĩha ciwa Suku yocili, oku tuwa Kuaye kuenda oku kolela kolohuminyo viaye. Eci tu sandiliya oku kuatisa omunu umue okuti handi ka kasi oku fendela Yehova, tu sukila oku u lomboluila atosi akuãimo. (1) Elembeleko li sangiwa Vembimbiliya li tunda ku Yehova, Suku yocili. (2) Yehova eye Suku yocisola, Ukuonenewosi, Ululiki wilu losi. Eye Suku umue ukuacikembe haeye ukuacili. (3) Etu tu pondola oku kuatisiwa poku liyaka lovitangi nda tua lekisa ukamba wocili ku Suku poku kuata ukũlĩhĩso u tunda Vondaka Yaye. (4) Vembimbiliya mu sangiwa ovolandu atiamẽla komanu vañi vañi va tala ohali.

6. Ndamupi tu pondola oku kuatisa omanu oco va kuate elomboloko liokuti ovo va pondola oku kuatisiwa lelembeleko li tunda Vembimbiliya?

7. (a) Nye tu pondola oku linga poku lombolola okuti elembeleko li tunda ku Suku lieciwa ‘lekuatiso lia Kristu’? (b) Ndamupi ove o pondola oku lembeleka omunu una wa limbuka okuti ovituwa viaye vĩvi?

⁷ Omanu vamue va siata oku kuatisa konepa yespiritu omanu vana va sumua okuti va kuete ale ukũlĩhĩso Wembimbiliya poku tanga elivulu lia 2 Va Korindo 1:​3-7. Eci ovo va ci linga, va vetiya olondaka vi popia hati, “elembeleko tu sanga la Mitakati Kristu li tu luilavo.” Ocinimbu eci Cembimbiliya ci pondola oku kuatisa omunu oku limbuka okuti Embimbiliya olio ono yelembeleko eye a sukila oku kapako calua. Embimbiliya li pondolavo oku linga ono yombangulo yina yikuamiwa kapuluvi akuavo. Nda omunu wa limbuka okuti ovitangi a kasi oku liyaka lavio via tunda kovina vĩvi eye a linga, tu sukila oku yuvula oku u vetela evelo poku u sapuila okuti, olondaka vi sangiwa kelivulu lia 1 Yoano 2:​1, 2 kuenda Kosamo 103:​11-14, vi eca elembeleko liocili. Nda tua kuama onjila eyi, tuka eca embeleko ku vakuetu lolondaka vi tunda ku Suku.

Elembeleko Komanu Vana va Liyaka Lungangala Ale Lovitangi Viuhukũi

8, 9. Ndamupi tu pondola oku eca elembeleko komanu vana va kasi oku tala ohali omo liungangala?

⁸ Kuli omanu valua okuti va kasi oku liyaka lungangala pocitumãlo cavo, levĩho kuenda ungangala una u tunda kovoyaki. Ndamupi tu pondola oku eca elembeleko kokuavo?

⁹ Akristão vocili, va likolisilako calua oku yuvula oku tiamẽla kombiali yimue ale oku litenga vovitangi violuali ci kale kolondaka ale kovilinga. (Yoano 17:16) Pole, ovo va kuama Embimbiliya oco va lekise okuti ovitangi vi kasi oku pita cilo, vika puako. Ci tava okuti, ovo va tangavo elivulu Liosamo 11:5 oco va lekise ndomo Yehova a nyãle omanu vana va sole ungangala. Handi vali, va tangavo elivulu Liosamo 37:​1-4, oco va lombolole ciwa okuti Suku ka tu vetiya oku lifetuluinya pole o tu vetiya oku kolela kokuaye. Olondaka Viosamo 72:​12-14, vi lekisa ndomo Yesu Kristu, Salomone Wavelapo haeye o kasi oku viala Kusoma oko kilu, a kuetele ohenda omanu vana va kasi oku tala ohali lungangala.

10. Nda ove wa pita vuyaki vokuenda kuanyamo alua, ndamupi ovinimbu Viembimbiliya via tukuiwa ndeti vi pondola oku ku lembeleka?

¹⁰ Omanu vamue va siata oku tala ohali yalua omo liovoyaki a lingiwa lovitundo viasualali. Omanu vaco va siata oku popia hati, uyaki kumue lovitangi vi tunda kuyaki waco, ovina vimue okuti viatiamẽla komuenyo. Ovo va siata oku kuata lika elavoko liokuti, ekalo liavo li kala lika ciwa nda va ilukila vofeka yimue yikuavo. Pole, valua pokati kavo ka va siatele oku litunda ciwa poku kuama onjila yaco kuenda vana va seteka oku ci linga, va siata oku pesela omuenyo wavo. Omanu vana va siata oku ilukila kolofeka vikuavo, ndaño okuti va siapo ovitangi vimue pole va siata oku sanga ovitangi vikuavo. Poku kuatisa omanu vaco, ci tava oku tanga elivulu Liosamo 146:​3-6, oco omuenyo wavo u kuate elavoko limue lia velapo okuti elavoko lioku ilukila kofeka yimue yikuavo li sule. Ocitumasuku celivulu lia Mateo 24:​3, 7, 14 ale ca 2 Timoteo 3:​1-5, ci pondola oku va kuatisa oku kuata elomboloko liocili liatiamẽla kovitangi va kasi oku liyaka lavio kuenda oku limbuka okuti tu kasi koloneke via sulako violuali lulo. Ovinimbu vimue Viembimbiliya ndeci, Osamo 46:​1-3, 8, 9 kuenda Isaya 2:​2-4, vi pondola oku va kuatisa oku limbuka okuti kuli elavoko liombembua yocili kovaso yoloneke.

11. Ovinimbu vipi Viembimbiliya via lembeleka ukãi umue wo kofeka yo Kutakelo vo Afrika, kuenda momo lie?

¹¹ Vokuenda kuyaki wa pita kolofeka vio Kutakelo vo Afrika, ukãi umue wa tunda vonjo yaye lolupesi eci va kala oku loya calua. Eye wa kala lusumba walua, lesumuo lialua kuenda ovitangi vikuavo komuenyo waye. Noke, osimbu epata liaye lia kala kofeka yikuavo, ulume waye wa nõlapo oku timĩha ukanda wavo wuvangi wolohuela, kuenje wa tundisa ukãi waye wa mina kumue lomõlavo o kuete ekũi lianyamo kuenje ulume waco wa linga ocitunda. Eci ukãi waco vo lomboluila olondaka vi sangiwa kelivulu lia Va Filipoi 4:​6, 7 kuenda Kosamo 55:​22, kuenda ovipama vimue viopiwa Vutatala Wondavululi lo vo Desperta!i, eye weya oku sanga elembeleko liocili kuenda esilivilo liomuenyo.

12. (a) Ekuatiso lipi Embimbiliya lieca komanu vana va kasi oku tala ohali omo liuhũkui? (b) Ndamupi umue Ombangi ya Yehova kofeka yo Asia a tẽla oku kuatisa ukãi umue wa kala oku landa cimue?

¹² Uhukũi wa siata oku nena ohali yalua kolohuluwa viomanu. Olonjanja vimue omanu va siata oku tala ohali omo liovoyaki kuenda ovitangi vikuavo vi yilila kuyaki waco. Handi vali, olombiali violuali lulo kuenda omanu vakuavo va kasi pomangu yoku songola haivo vakuacipululu, olonjanja vimue va siata oku tunga ongombo yoku nyana olombongo komanu kuenda oku punda ovikuata viavo. Pole, kuli omanu vamue okuti lalimue eteke va kuatele cimue voluali lulo. Tu pondola oku kuata elembeleko poku kũlĩha okuti Suku wa likuminya oku eca ekuatiso ku vana va kolela kokuaye kuenda wa likuminyavo oku nena oluali luesunga muna omanu vaka sanjukila ovopange avo. (Osamo 146:​6, 7; Isaya 65:​17, 21-23; 2 Petulu 3:13) Umue Ombangi ya Yehova kofeka yo Asia eci a yeva ukãi umue ukuakulanda ovina a kala okuliyeya omo liovitangi viekambo liokulia, eye wo sapuila okuti ovitangi viaco evi uvangi wovitangi vikuavo vi kasi oku pita kolonepa viosi violuali. Eci a lombolola olondaka vi sangiwa kelivulu lia Mateo 24:​3-14 kuenda Osamo 37:​9-11, ukãi waco wa fetika oku lilongisa Embimbiliya.

13. (a) Eci omanu va pita lesumuo omo liolohuminyo ka via tẽlisiliwile, ndamupi tu pondola oku kuama Embimbiliya oco tu va kuatise? (b) Nda omanu va sima hati, omo liovitangi vi kasiko ci lekisa okuti ka kuli Suku, ndamupi ove o pondola oku vangula lavo?

¹³ Eci omanu va liyaka lohali vokuenda kuanyamo alua, ale pamue eci va sumua omo liolohuminyo ka via tẽlisiliwile, ci tava okuti va sokisiwa la va Isareli eci va kala kofeka yo Egito okuti ‘ovitima viavo viatekele’ kuenda ka va yevelelile vali. (Etundilo 6:⁠9) Omo liaco, ci kuete esilivilo oku va lomboluila ndomo Embimbiliya li pondola oku va kuatisa oco va tẽle oku yula ovitangi violoneke vilo kuenda oku yuvula olonjanjo vina via siata oku nyõla omuenyo womanu. (1 Timoteo 4:8b) Omanu vamue va pondola oku sima okuti omo liekalo lĩvi va kasi oku liyaka lalio, eci ci lekisa okuti ka kuli Suku, ale pamue va popia hati, Suku ka kasi oku va kuatisa. Ove o pondola oku va lekisa ocinimbu cimue Cembimbiliya coku va kuatisa oco va limbuke okuti Suku wa linga eliangiliyo lioku kuatisa omanu, pole valua ka va siatele oku tava keliangiliyo liaco.​—⁠Isaya 48:​17, 18.

Elembeleko Kuava va Pita Lahunguhungu Ofela Kuenda Ovilemawe

14, 15. Eci omanu vamue va liyaka lovitangi viovilemawe ndamupi Olombangi via Yehova via siata oku lekisa esakalalo kokuavo?

¹⁴ Ci tava okuti ovina vi nyõleha omo liovitangi vi tunda kehunguhungu liofela, kovilemawe, kondalu ale ketenda limue lia tuika. Kuenje ci tava okuti kuiya esumuo lialua. Nye ci lingiwa oco kueciwa elembeleko komanu vana va puluka kovitangi viaco?

¹⁵ Omanu va sukila oku kũlĩha okuti, kuli umue o kasi oku va tata. Noke liocisalu cimue ca endisiwa lolongangala vofeka yimue, omanu vosi va sangiwa vofeka yaco veya oku liyaka lovitangi vialua. Vamue pokati kavo va pesela vakuepata, una wa siata oku eca eteku kepata kuenda akamba vavo. Handi vali vamue va pumba upange kuenda cosi ovo va kolelele. Olombangi via Yehova, via kuatisa omanu va sangiwa posongo yaco poku va lomboluila eci catiamẽla kepata liavo va fisa kuenda oku va lembeleka lolondaka vi tunda Vembimbiliya. Omanu valua va eca olopandu viavo omo liekuatiso liaco va tambula.

16. Eci kofeka yo El Salvador kua pita ocilemawe cimue cinene, momo lie upange woku kunda Wolombangi via Yehova pocitumãlo wa kuatela esilivilo liocili?

¹⁶ Kunyamo wo 2001, kofeka yo El Salvador kua pita ocilemawe cimue cinene okuti ca ponda omanu valua. Ukuenje umue o kuete ci soka 25 kanyamo okuti omõla umue Ombangi ya Yehova haeye wa yonguile ale ufeko kuenda amalẽhe vavali vafeko, vosi yavo va fa. Kuenje, ina yukuenje una wa fa kuenda ufeko una ukuenje waco a yonguile, va li tumbikile kupange woku kunda. Omanu valua va enda oku popia lavo hati, Suku eye wa ecelela okuti ovo va fa ale eci oco ca kala ocipango ca Suku. Vamanji va lombolola olondaka vielivulu Liolosapo 10:22 loku lekisa okuti, Suku ka yongola okuti tu pita lovitangi. Ovo va tangavo elivulu lia Va Roma 5:​12, oco va lekise okuti olofa vieya omo liekandu lia Adama kuenda eci hacoko ocipango ca Suku. Ovo va lombololavo olondaka vielembeleko vi sangiwa kelivulu Liosamo 34:18; Osamo 37:29; Isaya 25:8 kuenda Esituluilo 21:​3, 4. Omanu va lekisa onjongole yocili yoku yevelela, ca piãla vali enene eci va limbuka okuti akãi vaco vavali vosi yavo va fisa vakuepata liavo vocilemawe. Omo liaco, omanu valua va fetika oku lilongisa Embimbiliya.

17. Kotembo yovitangi, ekuatiso lipi tu sukila oku eca komanu?

¹⁷ Eci kuiya ovilemawe, ci tava okuti o sanga omunu umue o sukila ekuatiso lionjanga lio ketimba. Vekuatiso liaco ci tava okuti mu kongela oku vilikiya ondotolo, oku sandiliya ocendelo oco ombeyi yende kosipitali, ale pamue oku eca ekuatiso liokulia kuenda liuwalo. Kunyamo wo 1988 eci kofeka yo Italia kua pita ocilemawe, ulume umue ukuasapulo wa popia hati, Olombangi via Yehova “vi talavaya lesunguluko liocili, vi eca ekuatiso komanu vosi va tala ohali, pole ka vi tendi etavo liomanu vaco vana va kasi lovitangi.” Kolofeka vimue, ovitangi vina via lomboluiwa vovitumasuku okuti vika tẽlisiwa koloneke via sulako, via siata oku nena ohali yalua komanu. Kolofeka viaco, Olombangi via Yehova via siata oku lombolola ovitumasuku Viembimbiliya kuenda oku eca elembeleko komanu lekuatiso liolohuminyo Viembimbiliya okuti, Usoma wa Suku owo lika uka nena oku kolapo komanu vosi.​—⁠Olosapo 1:33; Mika 4:⁠4.

Oku Eca Elembeleko Eci ku fa Umue Vepata

18-20. Eci vepata mu fa umue, nye ove o pondola oku popia, ale oku linga oco wece elembeleko?

¹⁸ Oloneke viosi olohuluwa viomanu va siata oku pita lovitangi violofa via vangandiavo. Ove pamue o ñualehela lomanu vaco va sumua eci wenda kupange woku kunda, ale ceci wenda kupange weteke leteke woku sanda eteku. Nye ove o pondola oku popia ale oku linga oco ece elembeleko?

¹⁹ Anga hẽ omunu waco o kasi lesumuo lialua? Anga hẽ vonjo yaye mueyuka vakuepata va sumua calua? Ocili okuti, kuli ovina vialua ove o pondola oku popia, pole, tete ove o sukila oku sokolola lutate. (Ukundi 3:​1, 7) Ci tava okuti pamue o sukila lika oku lekisa ukamba wove, loku va sila elivulu limue li lombolola eci ci sangiwa Vembimbiliya ndeci, (ombrochura, orevista, ale otratado). Kuenje noke yoloneke vimue, tiuka vali oco o tale nda va sukila vali ekuatiso likuavo. Votembo yimue ya sunguluka, eca olondaka vielembeleko vina vi tunda Vembimbiliya. Olondaka viaco vi pondola oku va kuatisa calua. (Olosapo 16:24; 25:11) Ove ku pondola oku pindula omunu wa fa ndeci Yesu a linga. Pole, o pondola lika oku va sapuila eci Embimbiliya li popia catiamẽla kuava va fa, ndaño okuti owola yaco ove ku pondola oku pongolola ovisimĩlo ka via sungulukile vi kasi vovitima viavo. (Osamo 146:4; Ukundi 9:​5, 10; Esekiele 18:⁠4) Ove o pondola oku tanga lavo ohuminyo Yembimbiliya yatiamẽla kepinduko. (Luka 8:​49-56; Yoano 11:​39-44) Ci tava okuti o situlula elomboloko liovinimbu viaco lekuatiso liulandu Wembimbiliya una u lombolola eci catiamẽla kepinduko. (Luka 8:​49-56; Yoano 11:​39-44) Lombolola ovituwa via Suku ukuacisola una o tu ĩha elavoko liaco. (Yovi 14:​14, 15; Yoano 3:16) Lombololavo ndomo elongiso liaco lia siata oku ku kuatisa kuenda lekisavo esunga lieci ove o kuetele ekolelo kovina viaco.

²⁰ Oku laleka omunu waco wa sumua oco a ende Konjango Yusoma, ci pondola oku u kuatisa oku kũlĩha omanu vana va kuete ocisola lava va lisungue lavo kuenda oku kũlĩhavo ndomo ovo va pondola oku lilembeleka pokati. Ukãi umue kofeka yo Suesia wa limbuka okuti, eli olio ekuatiso a enda oku sandiliya komuenyo waye wosi.​—⁠Yoano 13:35; 1 Va Tesalonike 5:⁠11.

21, 22. (a) Nye tu sukila oku linga nda tu kasi oku eca elembeleko? (b) Ndamupi ove o pondola oku eca elembeleko komunu umue o kuete ale ukũlĩhĩso Wembimbiliya?

²¹ Eci ove o limbuka omunu umue wa pita locitangi cimue, cikale okuti omunu waco Ukristão ale sio, anga hẽ ove o sanga atatahãi atiamẽla kueci o linga ale ceci o popia? Ondaka yo Helasi oku “lembeleka,” Vembimbiliya yi lombolokavo “elaleko lioku kala ponele yomunu umue.” Omo liaco, oku kala omunu umue ukuakulembeleka ci lomboloka oku kala oñuatisi yimue yi kuete esilivilo lialua votembo yesumuo.​—⁠Olosapo 17:⁠17.

²² Nye ove o sukila oku linga nda wa limbuka okuti, omunu ove o yongola oku kuatisa wa kũlĩha ale eci Embimbiliya li popia catiamẽla kolofa, kocisembi kuenda kepinduko? Omunu wa sumua eci a limbuka okuti va manjaye kespiritu va kasi laye ci pondola oku eca elembeleko liocili kokuaye. Nda eye o yongola oku vangula, u yevelela lutate. Kuka sime okuti pamue ove lika o sukila oku vangula calua. Nda wa tanga laye ocinimbu cimue Cembimbiliya, lombolola okuti ocinimbu caco Ondaka ya Suku yina yi pondola oku ku kuatisi vosi yene. Lombolola eci catiamẽle kelavoko liene lioku kolela kolohuminyo Viembimbiliya. Poku sokolola lutate ohenda ya Suku kuenda oku vangula lukuene eci catiamẽla kocili ci sangiwa Vondaka ya Suku, ove o pondola oku kuatisa una o kasi lesumuo lialua oco a tave kelembeleko kuenda oku pamisiwa la Yehova ‘Suku yelembeleko.’​—⁠2 Va Korindo 1:⁠3.

[Etosi pombuelo yemela]

Lipi Etambululo Liove?

• Helie omanu va kapa ekandu omo liovitangi vialua? Kuenda ndamupi tu pondola oku kuatisa omanu vaco?

• Nye tu sukila oku linga oco tu kuatise vakuetu oku tambula elembeleko liocili li tunda Vembimbiliya?

• Ovitangi vipi via siata oku sumuisa calua omanu posongo yove? Kuenda ndamupi ove o pondola oku va lembeleka?

[Elitalatu kemela 31]

Oku eca esapulo lielembeleko kotembo yovitangi

[Ofoto ya eciwa]

Pocitumãlo cocicitililo: UN PHOTO 186811/J. Isaac

[Elitalatu kemela 32]

Omunu wa sumua eci alimbuka okuti va manjaye kespiritu va kasi laye ci pondola oku nenela elembeleko liocili