“Tala, u Eye Suku Yetu!”

Ulandu u sangiwa vovipama vilo vivali vielilongiso wopiwa velivulu losapi ya linga hati, Achegue-se a Jeová, lia sandekiwa kohongele yofeka ya lingiwila voluali luosi vokuenda kunyamo wo 2002/03. _Tala ocipama losapi ya linga hati, “Elivulu Eli Lia Ndi Veta Calua Kutima,” kemẽla 29.

“Tala, u eye Suku yetu, eye tua felevela okuti o tu popela. U, Yehova.”​—⁠ISAYA 25:⁠9.

YEHOVA Ululiki wilu losi wa tukula Avirahama ukuasimbu hati: “Ekamba liange.” (Isaya 41:⁠8) Ci komohĩsa calua oku kũlĩha okuti omunu waño o pondola oku kuata ukamba wocili la Ñala Yehova Ukuonenewosi! Citava okuti, ove o lipulisa ndoco: ‘Ci tava hẽ okuti ndi kuata ukamba wocili la Suku?’

1, 2. (a) Ndamupi Yehova a tukula Avirahama ukuasimbu? Kuenda ndamupi ondaka yaco yi tu komohĩsa? (b) Ndamupi Embimbiliya li tu likuminya catiamẽla kukamba wetu la Suku?

² Embimbiliya li tu sapuila okuti, ci tava oku kuata ukamba wocili la Suku. Avirahama wa kuatele ukamba la Yehova omo lioku ‘kolela kokuaye.’ (Tiago 2:23) Koloneke vilo, Yehova wa ‘kolelavo omanu vana va sunguluka.’ (Olosapo 3:32) Elivulu lia Tiago 4:8 li tu vetiya hati: “Ameli ku Suku kuenje eye amela kokuene.” Etu nda tua lekisa onjongole yoku kuata ukamba wocili la Yehova, eye oka tava oku tu tambula kuenje tu linga akamba vaye vocili. Anga hẽ olondaka evi vi lomboloka okuti etu tumanu vakuakandu haetu ka tualipuile tu pondola oku eca elianga liatete? Sio hacoko. Etu tu pondola oku linga ekamba liocili lia Yehova, omo okuti Eye wa eca ale alianga aco avali a kuete esilivilo liocili.​—⁠Osamo 25:⁠14.

3. Aliagiliyo api avali Yehova a linga oco tu kale akamba vaye vocili?

³ Catete, Yehova wa linga eliangiliyo liokuti omõlaye Yesu ‘eca omuenyo waye oco u linge ocisembi coku yovola omanu valua.’ (Mateo 20:28) Ocisembi caco oco ci tuecelela oku kuata ukamba wocili la Suku. Embimbiliya li popia ndoco: “Etu tu . . . sole [Yehova] momo eye wa lianga oku tu sola.” (Yoano 4:19) Omo okuti, Suku eye wa ‘lianga oku tu sola tete,’ eye wa tu lingila eliangiliyo lioku kuata ukamba wocili laye. Cavali ceci okuti, Yehova wa li situluila eye muẽle kokuetu. Ocili okuti oco tu kuate ukamba lomunu umue, tete tu sukila oku kũlĩha ciwa omunu waco loku kapako ovituwa viaye kuenda ekalo liaye. Tu konomuisi elomboloko liondaka eyi. Nda Yehova wa lisalamisile kuenda wa kaile o Suku yimue ka ya kũlĩhĩwile, nda lalimue eteke tua tẽla oku kuata ukamba laye. Pole, Yehova ka lisalamisile momo o yongola okuti tu u kũlĩha ciwa. (Isaya 45:19) Lekuatiso Liembimbiliya, Yehova wa li situlula eye muẽle lonjila yimue ya sunguluka. Omo liaco, owu owo uvangi u lekisa okuti, eye ka tu kuetele lika ocisola, pole o yongolavo okuti tu u kũlĩha ciwa kuenda tu lekisavo ocisola kokuaye momo eye Isietu wokilu.

4. Ndamupi tuka kala osimbu tuka amamako oku kũlĩha ciwa ovituwa via Yehova?

⁴ Anga hẽ ove wa muile ale ndomo okamõla kamue katito ka tukula isiaye hati ekamba liaye loku lekisa esanju poku popia hati: “Tala, u eye isiange?” Afendeli va Suku va kuete esunga lioku kuata ovisimĩlo vimuamue vieci catiamẽla ku Yehova. Embimbiliya lia popele ale osimbu okuti ku keya otembo yimue eci omanu vakuekolelo vaka popia hati: “U eye Suku yetu.” (Isaya 25:​8, 9) Osimbu tu amamako oku kuata elomboloko liatiamẽla kovituwa via Yehova, tuka limbuka okuti tu kuete Isia umue uwa kuenda eye Ekamba limue liocili. Ocili okuti oku kũlĩha ciwa ovituwa via Yehova, ku tu ĩha asunga alua oku kuata ukamba wocili laye. Omo liaco, tu konomuisi ndomo Embimbiliya li situlula ovituwa via velapo via Yehova ndeci, unene, esunga, olondunge kuenda ocisola. Vocipama cilo, tuka lilongisa lika ovituwa vitatu via tete.

‘Yehova o Kuete Unene wa Piãla’

5. Momo lie ca sungulukila oku tukula Yehova okuti eye lika “Tõlo”? Kuenda kolonepa vipi eye a siata oku talavaya lunene waco u komohĩsa calua?

⁵ Yehova eye ‘ukuonene wa piãla.’ (Yovi 37:23) Elivulu lia Yeremiya 10:​6, li popia ndoco: “A Yehova, lomue wa lisoka love. Ove vunene kuenda onduko yove ya kemãla lunene.” Yehova ka sokisiwa lovina vikuavo a lulika momo o kuete unene umue ka u sulila. Eli olio esunga lieci eye a tukuiwila hati, “Tõlo.” (Esituluilo 15:⁠3) Yehova o talavaya lunene waye, una u pondola oku u kuatisa poku lulika ovina, poku nyõla, oku teyuila kuenda oku tumbulula lawo ovina viosi a yongola. Omo liaco, tu konomuisi ovindekaise viatiamẽla Kunene waye woku lulika ovina viosi kuenda woku teyuila ovina viaco.

6, 7. Ekumbi li kuete unene wa tuwa ndamupi kuenda uvangi upi u lekisiwa lekumbi liaco?

⁶ Nda ove o kasi posamua okuti kuli utanya walua, nye o yeva ketimba liove? Ove o yeva owuya wutanya. Ocili okuti, ove o pondola oku limbuka unene Yehova a lulika lawo ovina viosi. Unene wekumbi u pitĩla hẽ toke pi? Olio li eca owuya umue u soka 15 kolohũlũkãi vioku tokota kuaco. Nda ove wa kuatele epondolo liokupa onepa yimue yitito yosongo yekumbi ya soka ndutue wofinete okuti o yi kapa mulo Voluali, nda lomue wa tẽla oku kala ocinãla cimue ci soka 150 kolokilometulu lapa pa kasi ekumbi liaco. Vosengundu yimosi, ekumbi lieca eci ci soka olohũlũkãi violohuluwa viowuya una wa lisoka lowuya wolohũlũkãi viatenda anene a tuikila pamosi. Ongongo yi ñuala konele yekumbi vocinãla cimue ca sunguluka. Nda ekumbi lia kale ocipepi longongo, ovava a kasimo nda a takata kuenda nda lia kaile ocipãla, ovava a kasimo nda a linga ocikokoto. Omo liaco, nda ekumbi lia kale ocipepi ale ocipãla nda lia nyõla ongongo yetu okuti ka mu kala oviendalomuenyo.

⁷ Ndaño okuti, omuenyo womanu u kuatisiwa lekumbi, pole omanu valua ka va sokolola esilivilo liekumbi. Ovo ka va sokolola eci ci pondola oku tu longisa ekumbi. Osamo 74:​16, yi lombolola eci catiamẽla ku Yehova ndoco: “Ove wa lulika osãi lekumbi.” Ocili okuti, ekumbi li sivaya Yehova una wa ‘lulika ilu losi.’ (Osamo146:⁠6) Ekumbi ocina cimue ca lulikiwa pokati ka vialua okuti li tu longisa eci catiamẽla kunene wa Yehova. Osimbu tu amamako oku lilongisa eci catiamẽla kunene wa Yehova woku lulika ovina viosi, esumbilo lietu kokuaye li livokiya calua.

8, 9. (a) Olondaka vipi viocindekaise vi lekisa ombili Yehova a kuete yoku teyuila kuenda oku tata afendeli vaye? (b) Ungombo kosimbu wa sukilile oku tata ndati olomeme viaye? Kuenda ocituwa caco ci tu longisa nye catiamẽla ku Yehova Ungombo wetu Wavelapo?

⁸ Yehova o pondolavo oku teyuila omanu vaye lunene walua okuti o va tata ciwa. Embimbiliya li tukula ovina vimue vi lombolola olohuminyo via Yehova viatiamẽla koku tu teyuila. Omo liaco, tu tangi ulandu u sangiwa kelivulu lia Isaya 40:11. Kelivulu lilo, Yehova o lisokisa eye muẽle lungombo una o tata ciwa omanu vaye. Kelivulu liaco tu tangako ndoco: “[Yehova] o lisa ocunda caye ndungombo, ongolola otumeme vovoko aye, o tu ambatela ponete. O songuila levando evi vi kasi lomãla.” Ove hẽ, o pondola oku limbuka elomboloko liocinimbu eci?

⁹ Olomeme vi kasi ndovinyama vimue okuti ka vi kuete u o vi teyuila. Kosimbu, ungombo wa sukilile oku kuata utõi poku teyuila olomeme viaye kovimbungu, ko ursu kuenda kolohosi. (1 Samuele 17:​34-36; Yoano 10:​10-13) Pole, kua enda oku kala otembo yimue okuti omeme ya sukilile oku yi tata vali ciwa. Nda okuti omeme yimue ya citila ocipãla locunda, ndamupi ungombo a sukilile oku lava ciwa okamõla kaco oco ka kaka kuatiwe lovinyama vikuavo? Ungombo wa sukilile oku ambatela “ponete” yaye okamõla kaco komeme vokuenda kuoloneke vina okuti kaka tẽla oku enda okuti, oka kutila ponete yaye lonanga. Ndamupi okameme kaco ka pondola oku pitĩla toke “ponete” yungombo? Okameme ka sukilile oku amẽla ponẽle yungombo okuti u lamba vovipindi viaye. Pole, ungombo eye wa sukilile oku petamako toke eci a tikula okameme kaco kuenje oka kapa ciwa ponete yaye. Eci ocindekaise cimue ca velapo ci lekisa okuti, Ungombo Wavelapo, o kuete onjongole yocili yoku tu teyuila locisola!

10. Eliangiliyo lipi Yehova a linga lioku tu teyuila koloneke vilo? Kuenda momo lie oku tu teyuila kuaco ku kuetele esilivilo lia velapo?

¹⁰ Yehova wa siata oku linga ovina vialua okuti ohuminyo yoku tu teyuila yi sule. Kosimbu, eye wa lingaile ovikomo vialua vioku lekisa okuti eye o kuete epondolo lioku ‘popela kovitangi omanu vana vo sumba.’ (2 Petulu 2:⁠9) Nye ci popiwa catiamẽla koloneke vilo? Ca tu lomboloka ciwa okuti, Yehova o kuete unene wa velapo, pole eye ka tu teyuila kovitangi viosi. Eye, o tu ĩha ekuatiso lia velapo lioku tu teyuila kespiritu. Suku yetu ukuacisola, o tu teyuila kovina viosi vi kapa kohele ekalo lietu kespiritu poku tu ĩha cosi tu sukila oco tu pandikise kovitangi okuti ukamba wetu laye ka u nyõleha. Elivulu lia Luka 11:13 li popia ndoco: “Nda ene wa tuwi ale oku linga cĩvi, wa kũlĩhi oku eca oviali viwa komãla vene, Isiene ukuailu hẽ, ka velipo oku avela espiritu sandu kuava vo pinga?” Unene waco wespiritu u pondolavo oku tu kuatisa oco tu tẽle oku yula ovitangi viosi tu liyaka lavio. (2 Va Korindo 4:⁠7) Yehova wa lingavo eliangiliyo lioku tu teyuila oco omuenyo wetu ka uka kale lika otembo yitito pole u kala otembo ka yi pui. Omo liohuminyo yaco, tu pondola oku tenda ovitangi viosi tu liyaka lavio voluali lulo okuti, ‘viokatembo kamue katito.’ (2 Va Korindo 4:17) Eci hẽ ka ci tu vetiya oku kuata ukamba wocili la Suku una okuti locisola calua o tu teyuila lunene waye oco tu kuatisiwe?

“Yehova o Sole Esunga”

11, 12. (a) Momo lie esunga lia Yehova li tu vetiyila oku kuata ukamba wocili laye? (b) Nye Daviti a limbuka catiamẽla kesunga lia Yehova? Kuenda ndamupi tu pondola oku kuatisiwa lolondaka evi?

¹¹ Yehova ukuesunga kuenda olonjanja viosi esunga liaye ka siatele oku lilekisa lolonepele. Yehova ka lekisa esunga liaye lonjila yimue ka ya sungulukile oco tu tinduke kokuaye, pole eye o lekisa esunga liaye lovituwa vimue via sunguluka vina vi tu vetiya oku kuata ukamba wocili laye. Embimbiliya li lombolola eci catiamẽla kovituwa viaco via sunguluka. Omo liaco, tu konomuisi olonepa vitatu vi situlula ndomo Yehova a siata oku lekisa esunga liaye.

¹² Catete ceci okuti, Yehova esunga liaye olio liu vetiya oku lekisa ekolelo kuenda esunguluko komanu vaye. Ukualosamo Daviti, wa limbukile esunga lia Yehova. Elomboloko lipi Daviti eya oku kuata omo lieci a mõla kuenda eci a lilongisa catiamẽla kesunga lia Yehova lioku tetulula lesunguluko? Eye wa popia hati: “Yehova o sole esunga, ka yanduluka olosandu viaye. Vakuesunga va tatiwa oloneke viosi.” (Osamo 37:28) Helembelekokuolio li tunda kolondaka evi! Suku yetu lalimue eteke aka yanduluka omanu vaye vo kolela. Omo liaco, tu pondola oku kolela okuti eye oka kala letu otembo yosi loku tu tata locisola. Esunga liaye olio uvangi u lekisa okuti, oka tẽlisa olohuminyo viaye.​—⁠Olosapo 2:​7, 8.

13. Uvangi upi u lekisa okuti Yehova ka kuete ocame?

¹³ Cavali ceci okuti, esunga lia Suku, liu vetiya oku kuatela ohenda omanu vana va kasi oku tala ohali. Esakalalo lia Suku lava va sukila ekuatiso, li limbukiwila Vocihandeleko ca eciwile ku va Isareli. Ocihandeleko ca kuatele olonumbi viatiamẽla koku tata ciwa olosiwe lovimbumba. (Esinumuĩlo 24:​17-21) Omo okuti Yehova wa kũlĩhĩle ohali yolosiwe lovimbumba, eye wa linga isiavo haeye Onganji kuenda Upopeli wavo. (Esinumuĩlo 10:​17, 18) Eye wa lunguile va Isareli hati, nda ovo va talisa ohali akãi lomãla vana okuti ka va kuete oñuatisi, eye o pondola oku va ĩha ekuatiso. Kelivulu Lietundilo 22:​22-24, Yehova wa popia hati: “Onyeño yange yi wenguka.” Ndaño okuti onyeño hacituwa cimueko ca viala Yehova, pole onyeño yaye yi wenguka lovilinga vimue ka via sungulukile, ca piãla enene eci omanu vana va sunguluka haivo ka va kuete eteyuilo va talisiwa ohali.​—⁠Osamo 103:⁠6.

14. Uvangi upi u lekisa okuti Yehova ka kuete ocame?

¹⁴ Onepa yatatu yi sangiwa kelivulu Liesinumuĩlo 10:​17, kuna Embimbiliya li tu sapuila okuti, Yehova ‘ka kuete ocame, kuenda ka tambula ovitukiko.’ Ca litepa lomanu va lua va kemãla ceci okuti, Yehova ka amẽla omunu omo liukuasi a kuete, ale omo a kemãla pokati ka vakuavo. Eye ka kuete ocame. Uvangi wa velapo u lekisa okuti Yehova ka kuete ocame wowu wokuti: Esumũlũho lioku kala afendeli vaye vocili lelavoko liomuenyo ko pui, eye ka liecele lika kocimunga comanu vamue. Elivulu Liovilinga 10:​34,35 li lombolola okuti: “Suku ka kuete ocame, puãi, volofeka viosi [omunu] wosi u sumbila loku linga esunga, u sungulukila.” Elavoko liaco eli lia yuluiwila omanu vosi, ci kale olohuasi ale olohukũi, kuenda omanu vakuakova osi okuti va sangiwa kolofeka viosi. Ove hẽ ku tava okuti eli olio esunga limue lia velapo? Ocili okuti, nda tua kuata elomboloko liasuapo liatiamẽla kesunga lia Yehova, tuka vetiyiwa oku kuata ukamba wocili laye!

“Via Longa Nye! ... Olondunge Via Suku!”

15. Olondunge vi lomboloka nye kuenda ndamupi Yehova a siata oku vi lekisa?

¹⁵ Upostolo Paulu wa vetiyiwa oku popia olondaka tu tanga kelivulu lia Va Roma 11:33 hati: “Wa longa nye! Ukuasi lolondunge lukũlĩhiso wa Suku!” Osimbu tu amamako oku sokolola ovina vialua viatiamẽla kolondunge via Yehova, tu komõhavo calua. Ndamupi tu pondola oku lombolola ovituwa viaco? Olondunge vi nena ukũlĩhĩso, lepondolo lioku konomuisa ovina, oku kuata elomboloko liovina viosi kuenda oku vi kapako komuenyo. Ukũlĩhĩso wasuapo wa Yehova kuenda elomboloko liaye lia longa, owo wa siata oku u kuatisa oku nõla eci a yongola oku linga okuti o cendisa lonjila yimue ya sunguluka.

16, 17. Ndamupi ovina Yehova a lulika vi lekisa olondunge viaye ka vi sokisiwa? Ci lombolola.

¹⁶ Ovovangi api a lekisa eci catiamẽla kolondunge via Yehova ka vi sulila? Elivulu Liosamo 104:​24, li lombolola hati: ‘A Yehova, ovopange ove a lua cimue. Ovina viosi wa vi lulika lolondunge. Oluali lue yuka ovilulikilo viove.’ Omo liaco, osimbu tu amamako oku lilongisa vali calua catiamẽla kovina Yehova a lulika, tu pondola oku komõha calua olondunge viaye. Ocili okuti olonoño via siatavo oku lilongisa calua kueci catiamẽla kovina Yehova a lulika! Kuli onepa yimue yuloño umue u tukuiwa hati, biomimética, welilongiso lioku setukula oku panga ovina viosi vi sangiwa voluali Yehova a lulika.

¹⁷ Ci tava okuti, pamue ove wa komõhele calua eci wa mõla oku fina kutele wa kawovi. Ocili, okuti, utele wa kawovi, upange umue u komohĩsa. Ndaño okuti utele waco u molẽha soketi wa leñela, pole wa pama calua okuti utale ci sule, kuenda oku pama kuaco ka ku sokisiwa luwalo una woku liteyuila kolosolo. Oco hẽ ndamupi oku pama kuaco ku kasi? Sokolola ndeci nda utele waco wa kawovi wa sanjavalele calua ndowanda woku kuata olõsi. Utele waco nda u pondola oku kuata ombalão yi kasi loku enda! Ocili okuti, Yehova wa lulika ovina viosi ‘lolondunge’ vimue ka vi sokisiwa.

18. Ndamupi olondunge via Yehova vi limbukiwila poku nõla omanu oco va sonehe Ondaka yaye yi sangiwa Vembimbiliya?

¹⁸ Uvangi wa velapo watiamẽla kolondunge via Yehova, u sangiwa Vembimbiliya okuti olio Ondaka yaye. Alungulo ocili a sangiwa Vembimbiliya, a tu lekisa onjila ya sunguluka tu sukila oku kuama komuenyo wetu. (Isaya 48:17) Pole, olondunge via Yehova vina ka vi sokisiwa, vi limbukiwilavo konjila eye a kuama poku sonehiwa Kuembimbiliya. Ndamupi? Yehova lolondunge viaye, wa nõla omanu vamue oco va sonehe Ondaka yaye. Nda okuti eye wa nõlele ovangelo oco va sonehe Embimbiliya, anga hẽ Vembimbiliya nda mu sangiwa alungulo a komohĩsa calua? Ocili okuti, ovangelo nda va lombolola lika ekalo lina lia velapo lia Yehova kuenda esumũlũho liavo lioku kala olondingupange viaye. Anga hẽ etu nda tua tẽla oku limbuka okuti tua litepa lovangelo vana va lipua okuti ukũlĩhĩso wavo kuenda ongusu yavo ka yi sokisiwa leyi yetu?​—⁠Va Heveru 2:​6, 7.

19. Ovolandu api a lekisa okuti omanu ka va lipuile va soneha Embimbiliya va vetiyiwa luloño umue u komohĩsa calua?

¹⁹ Omo okuti Yehova wa nõla omanu oco va sonehe Embimbiliya, eci ca siata oku tu vetiya calua. Alume va soneha Embimbiliya va kuata ovisimĩlo ndevi vietu. Omo okuti va kalavo omanu vamue ka va lipuile, ovo va liyakavo lovitangi vimuamue ndevi tu kasi oku liyaka lavio koloneke vilo. Olonjanja vimue ovo va vetiyiwa oku soneha eci catiamẽla kovitangi vina ovo va enda oku liyaka lavio. (2 Va Korindo 12:​7-10) Omo liaco, ovo va soneha olondaka vina okuti ovangelo nda ka va tẽlele oku vi tukula. Tu konomuisi olondaka via Daviti vi sangiwa kelivulu Liosamo 51. Olondaka Viosamo eyi, Daviti wa vi soneha noke yoku wila vakandu anene. Eye wa likekembela lutima waye wosi, poku tukula esumuo a kala lalio kuenda wa pinga ongecelo ku Suku. Kocinimbu 2 kuenda 3, tu tangako ndoco: “Sukule ciwa . . . evĩho liange. Njelise ekandu liange. Momo nda kũlĩha okulueya kuange. Ekandu liange li kasi ño-o kovaso ange.” Kũlĩhĩsa kocinimbu 5 ku popia hati: “Ocili [okuti], nda citiwila kohole. Mai weminila kakandu.” Ocinimbu 17 ci vokiyako olondaka viokuti: “Ovilumba vi sanjuisa Suku utima wa teka. A Suku, ove ku timi utima wa teka, haiwo wa samba.” Ove hẽ o pondola oku limbuka evalo usonehi waco a yeva kutima waye? Omunu upi wa lipua nda wa tẽla oku lombolola olondaka evi? Ocili okuti, olondaka viaco vi lomboluiwa lika lomunu una kalipuile.

20, 21. (a) Momo lie ci popiwila okuti ndaño omanu ka va lipuile ovo va soneha Embimbiliya, pole olio li kuete olondunge via Yehova? (b) Nye tuka lilongisa vocipama ci kuãimo?

²⁰ Poku nõla kuaye omanu vana ka va lipuile oco va sonehe Embimbiliya, Yehova wa tẽla oku tu ĩha eci tu sukila okuti ulandu ‘wondaka yaye yi kola,’ ndaño okuti mu sangiwa oku liyeya kuomanu. (2 Timoteo 3:16) Alume vosi va soneha Embimbiliya va kuatisiwa lespiritu sandu. Ovo, ka va sonehele ovisimĩlo viavo muẽle, pole va soneha lika eci catiamẽla kolondunge via Yehova. Olondunge viaco via koleliwa calua. Olondunge vietu, ka vi sokisiwa levi via Suku una o tu vetiya locisola hati: “Kolela Yehova lutima wove wosi. Ku ka tiamẽle kolondunge viove muẽle. U sumbila kolongenda viove viosi, kuenje eye o suñamisa olonjila viove.” (Olosapo 3:​5, 6) Nda tua yevelela lutate kelungulo eli liolondunge, tuka kuata ukamba wocili la Suku, una ukualondunge via velapo.

²¹ Ocisola, oco ca velapo pokati kovituwa viosi via Yehova. Vocipama ci kuãimo, tuka lilongisa ndomo Yehova a siata oku lekisa ocisola.

Handi Ocivaluka?

• Nye Yehova a linga oco a ecelele okuti tu kuata ukamba wocili laye?

• Ovolandu api a lekisa unene wa Yehova woku lulika kuenda unene waye woku teyuila?

• Ndamupi Yehova a siata oku lekisa esunga liaye?

• Ndamupi olondunge via Yehova via siata oku limbukiwila kovina viosi eye a lulika kuenda Vembimbiliya?

[Elitalatu kemẽla 10]

Ndeci ungombo ambatela okameme ponete yaye, haico Yehova a tata olomeme Viaye

[Elitalatu kemẽla 13]

Olondunge via Yehova vi limbukiwila kuloño eye a kuata poku sonehiwa Kuembimbiliya