Apulilo Valingiwa Lavakuakutanga

Kelivulu lia 2 Va  Korindo 6:​14, velie Paulu a tukula hati, “ka va tavele” ku Suku?

Kelivulu oku tu tangako hati: “Ko ka kutiwili kokanga ka ya lisokele kumosi lava ka va tavele [ku Suku].” Nda tua konomuisa ulandu waco wosi, tu limbuka okuti upostolo Paulu wa tukula vana ka va kasi vekongelo Liakristão. Elomboloko liaco lilitava lolondaka upostolo Paulu a tukula kovinimbu vikuavo Viembimbiliya, kuna a popia hati, “ka va tavele” ale “havakuetavoko.”

Paulu wa pisa Akristão vamue va kuatele ocituwa coku tuala vamanjavo koku sombisiwa lomanu vana okuti “havakuetavoko.” (1 Va  Korindo 6:⁠6) Omanu va tukuiwa ndeti palo, vana va kala vakuakusombisa ko Korindo. Upostolo Paulu vukanda waye wavali wa popia hati, Satana ‘wa tekavĩsa ovitima viava ka va tavele.’ Ovaso avo ‘a sitikiwa’ okuti ka va tẽla oku limbuka olondaka viwa. Omanu vaco ka va yongola oku vumba Yehova. Momo Paulu wa popia hati: ‘Eci omunu a pongolokela ku Yehova, oku sitikiwa kuaco ku u piwa.’​—⁠2 Va  Korindo 3:16; 4:⁠4.

Omanu vamue ka va tavele ku Suku, va siata oku fendela oviteka. (2 Va  Korindo 6:​15, 16) Pole, kuli vamue okuti va sole omanu va Yehova. Vamue pokati kavo va sole ocili. Vakuavo va kuela Olombangi via Yehova. Kuenda va sanjukila olohuela viavo. (1 Va  Korindo 7:​12-14; 10:27; 14:​22-25; 1 Petulu 3:​1, 2) Vovinimbu viosi evi, ondaka “ka va tavele,” Paulu wa yi tiamisila komanu vana ka vatiamẽlele vekongelo Liakristão. Momo ava vatiamẽla vekongelo Liakristão wa va tukula hati, “va tava ku Ñala.”​—⁠Ovilinga 2:41; 5:14; 8:​12, 13.

Olonumbi vi sangiwa kelivulu lia 2 Va  Korindo 6:​14, vitiamisiwila kolonepa viosi viomuenyo Wakristão. Pole via siata oku tukuiwa vali enene poku kuatisa Akristão vana va yongola oku kuela. (Mateo 19:​4-6) Omunu wosi wa litumbika ku Yehova kuenje wa papatisiwa, o sukila oku yuvula oku kuela una ka tavele ku Suku. Momo ovisimĩlo viomunu waco via litepa levi Viukristão wocili.

Ci tava hẽ okuti Ukristão o kuela umue vekongelo okuti o kasi ño handi oku lilongisa Embimbiliya? Vekongelo muli akundi vamue okuti ka va papatisiwile handi. Oco hẽ omanu vaco va tukuiwavo hati ka va tavele ku Suku? Sio ka vatukuiwa. Omanu vosi va tava kolondaka viwa okuti va kasi oku amamako oco va papatisiwe ka va tukuiwa hati ka va tavele ku Suku. (Va Roma 10:10; 2 Va  Korindo 4:​13) Korneliu eci ka papatisiwile handi vo tukuile hati, ‘omunu wa sunguluka. Momo wa sumbile Suku.’​—⁠Ovilinga 10:⁠2.

Eci ci lekisa okuti akundi vana ka va papatisiwile ka va kongeliwile velungulo lia Paulu li sangiwa kelivulu lia 2 Va  Korindo 6:14. Oco hẽ ca sunguluka okuti Ukristão wa papatisiwa o namulãla ale o kuela ukundi umue ka papatisiwile? Sio ka ca sungulukile. Momo lie? Momo Paulu wa lungula Akristão ovimbumba hati: “Ukãi wa pandekiwa osimbu veyaye a kasi lomuenyo. Nda puãi veyaye wa fa, ukãi o panduluiwa okuti ci tava oku kueliwa lu a yongola, puãi te oku kueliwa vu Ñala.” (1 Va  Korindo 7:​39) Elungulo eli li lekisa okuti, omanu vana va litumbika ku Yehova, va sukila oku kuela lika vana va kasi “vu Ñala.”

Olondaka “vu Ñala” kuenda ‘vu Kristu’ vi lomboloka nye? Kelivulu lia Va Roma 16:​8-10 kuenda lia Va Kolosai 4:​7, Paulu wa tukula omanu vana va kala ‘vu Ñala’ ale ‘vu Kristu.’ Nda tua tanga ovinimbu viaco, tuka limbuka okuti, omanu vaco va tukuiwa hati: ‘Vakuetu kupange,’ ‘vakuakristu,’ ‘vamanjetu va soliwa,’ ‘oloñuatisi via koleliwa,’ kuenda ‘vamanjetu va kasi pamosi kupange woku vumba Suku.’

Otembo yipi omunu a fetika ‘oku vumba Ñala’? Eye o ci linga eci a lieca olumue ndupika koku vumba Ñala. Yesu wa popia hati: “Umue nda o yongola oku ñuama, ka ka litende vali eye muẽle, a tikule [uti waye kuenje], a ñuame.” (Mateo 16:​24) Omunu o fetika oku kuama Kristu kuenda o lieca olumue koku linga ocipango ca Suku eci a litumbika ku Yehova. Okupisa opo, eye o lieca koku papatisiwa. Noke o linga ondingupange ya Yehova Suku.a Omo liaco, ‘oku kuelela vu Ñala’ ci lomboloka oku kuela una wa lekisa vomuenyo waye okuti ‘ukuenje wa Suku kuenda wa Ñala Yesu Kristu.’​—⁠Tiago 1:⁠1.

Omunu wosi o kasi oku lilongisa Embimbiliya Lolombangi via Yehova, okuti o kasi oku amamako ciwa, o sukila okupandiyiwa. Pole eye ka litumbikile handi ku Yehova oco a linge upange waye. Eye o sukila handi oku siapo ovituwa vimue viosimbu. Kuenda oku litumbika loku papatisiwa oco ci tava noke oku kuela.

Kuli Akristão vamue va siata oku namulãla la vana ka va papatisiwile handi. Momo va siata oku sima hati omunu waco oka papatisiwa eci va panda kolohuela. Anga hẽ ca sunguluka oku kuama onjila eyi? Sio ka ca sungulukile. Ukristão pamue o namulãla la umue okuti ka papatisiwile handi. Noke omunu waco o yayulako loku papatisiwa oco va kuele. Pole eye ka kuata elomboloko liepapatiso.

Ndomo ca siata, eci omunu a linga ukundi ka papatisiwile, eye o kala ño otembo yimue noke o papatisiwa. Omo liaco, elungulo lioku kuelela lika vu Ñala, lia sunguluka. Vekongelo pamue muli umue okuti wa kulila vepata Liakristão. Kuenda o kuete utunga woku kuela, haiye okuti o kuete ombili vekongelo kuenda o kasimo ale anyamo alua. Pole ka papatisiwile handi. Ci tava hẽ okuti Ukristão o kuela omunu waco? Nye co tateka oku papatisiwa? O kuete hẽ atatahãi vo tateka oku papatisiwa? Ndaño okuti ka ci tava oku tukula omunu waco hati ‘ka tavele,’ lopo ka ci tava oku popia hati wa tava ‘ku Ñala.’

Paulu wa eca elungulo liatiamẽla kolohuela oco li tu kuatise. (Isaya 48:​17) Nda ava va namulãla kavali kavo va papatisiwa, olohuela viavo vika enda ciwa. Momo va kuete ovisimĩlo vimuamue. Kuenda vonjo yavo muka kala esanju. Handi vali, Ukristão ‘oku kuelela lika vu Ñala’ o lekisa epokolo ku Yehova kuenje Yehova u sumũlũisa. Momo “ku vakuahenda [Yehova] o lilekisa okuti ukuahenda.”​—⁠Osamo 18:⁠25.

[Atosi pombuelo yamẽla]