Apulilo a Lingiwa la Vakuakutanga
Nye ca lombolokele unyamo Weyovo wa tukuiwa kelivulu Liovisila kocipama 25?
Ocihandeleko ca eciwile ku Mose ca lekisile okuti, “kunyamo wepanduvali, esambata lioku puyuisa osi.” Catiamẽla kunyamo waco, va Isareli va handelekiwa ndoco: “Ka citava oku lima ovapia ene ale oku sonja ocumbo cene cayuva. Ko ka unguli ovina via litundila, vina vi kulila vepia noke yoku ungula, ndaño oku ungula ayuva oviti viene vina okuti ka via sonjiwile. Osi yi kuate unyamo wepuyuko.” (Ovisila 25:4, 5) Omo liaco, unyamo wepanduvali wa kala Esambata lioku puyuisa osi. Kunyamo 50 noke liunyamo wepanduvali Wesambata, u kala unyamo Weyovo. Ovina vipi via enda oku pita kunyamo waco?
Yehova wa sapuilile va Isareli pocakati ca Mose hati: “Vu kolisa unyamo 50 loku sambiliya eyovo liofeka kolonungi viosi. Unyamo waco, u linga Unyamo Weyovo kokuene kuenda omunu lomunu pokati kene o tiukila kocipiñalo caye kuenda kepata liaye. Unyamo 50 u linga Unyamo Weyovo kokuene. Ka citava okuti vu lima ale oku ungula ovina via litundila, vina vi kulila vepia noke yoku ungula, pamue oku ungula ayuva vocumbo cayuva ka ca sonjiwile.” (Ovisila 25:10, 11) Unyamo Weyovo, wa lombolokele unyamo wavali Wesambata wa likuama vofeka. Pole kolonungi ca lombolokele eyovo. Va Yudea vana va landisiwile kupika, va sukilile oku eciwa. Ocipiñalo cina omunu umue a kisikiwile oku landisa, ca sukilile oku ci tiuwa kepata. Unyamo Weyovo, wa sukilile oku kala unyamo umue wetumbuluilo kuenda eyovo ku va Isareli. Nye ci lomboloka Kakristão?
Esino liulume watete okuti Adama, lia koka okuti omanu va kala apika vekandu. Eliangiliyo Suku a linga lioku yovola omanu kekandu, ocilumba ca eciwa la Yesu Kristu.a (Mateo 20:28; Yoano 3:16; 1 Yoano 2:1, 2) Otembo yipi Akristão va yovuiwa kocihandeleko cekandu? Poku vangula Lakristão olombuavekua upostolo Paulu wa popia hati: “Momo ocihandeleko cespiritu cina ceca omuenyo vomunga kumue la Kristu Yesu, ca ku yovola kocihandeleko cekandu kuenda coku fa.” (Va Roma 8:2) Vana va kuete elavoko lioku ka kala kilu, va tambula eyovo liaco eci va wavekiwa lespiritu sandu. Ndaño okuti va kuete etimba liositu kuenda ka va lipuile, Suku o va tenda ndavakuesunga kuenda va linga omãla vaye. (Va Roma 3:24; 8:16, 17) Kolombuavekua, Unyamo Weyovo wa fetika ko Pendekoste yunyamo 33 K.K.
Nye ci popiwa catiamẽla ‘kolomeme vikuavo’ vi kuete elavoko lioku kala palo posi otembo ka yi pui? (Yoano 10:16) Komanu vaco, Uviali Wolohulukãi Yanyamo wa Kristu u ka kala otembo yimue yetumbuluilo kuenda yeyovo. Vokuenda Kunyamo waco Weyovo Wolohulukãi Yanyamo, Yesu o ka sumũlũisa omanu vakuepokolo kuenda o ka malako ovitangi via kokiwa lekandu. (Esituluilo 21:3, 4) Kesulilo Liuviali wa Kristu Wolohulukãi Yanyamo, omanu va ka lipua kuenda ka va ka kuata vali ekandu loku fa. (Va Roma 8:21) Omo liaco, Unyamo Weyovo Liakristão u ka pitĩla kesulilo.
[Etosi pombuelo yemẽla]
a Yesu wa tumiwa oco a “kundile eyovo kolomandekua.” (Isaya 61:1-7; Luka 4:16-21) Eye wa kunda eyovo limue konepa yespiritu.
[Ociluvialuvia kemẽla 26]
Unyamo Weyovo Wolohulukãi Yanyamo, u ka kala otembo wetumbuluilo kuenda eyovo ‘kolomeme vikuavo’