Tu Sivayi Suku ‘Lutima Umuamue’

“Lomela umuamue, vu sivaya Suku haeye Isia ya Ñala yetu Yesu Kristu.”​—⁠VA ROMA 15:⁠6.

1. Elungulo lipi upostolo Paulu a eca lioku tetulula ovisimĩlo via litepa pokati ka vamanji?

AKRISTÃO vosi va kuete olonjongole via litepa. Pole, vosi yavo va pondola oku kuata utima umuamue poku endela vonjila yi tuala komuenyo ko pui. Ndamupi ci tẽliwa? Ci tẽliwa lika nda tua yuvula oku kapako ovina vimue ka vi kuete esilivilo. Upostolo Paulu wa lomboluila ondaka eyi Kakristão vocili kocita catete. Ndamupi eye a lombolola etosi eli? Kuenda ndamupi tu pondola oku kapako elungulo liaye koloneke vilo?

Esilivilo Lioku li Kuata Omunga

2. Upostolo Paulu wa vetiya ndati esilivilo lioku likuata omunga?

² Paulu wa kũlĩhĩle okuti, oku likuata omunga pokati Kakristão ci kuete esilivilo. Kuenje wa eca elungulo li pondola oku kuatisa Akristão oku li sola pokati. (Va Efeso 4:​1-3; Va Kolosai 3:​12-​14) Paulu noke lioku tumbika akongelo alua, wa kala eci ci pitahãla akũi avali kanyamo loku pasuisa vamanji. Eye wa kũlĩhĩle okuti, ka ca lelukile kokuavo oku li kuata omunga. (1 Va  Korindo 1:​11-13; Va Galatia 2:​11-​14) Omo liaco, wa vetiya vamanji vana va kala ko Roma hati: “Suku yepandi, haeye ukuakukolisa, a tave . . . okuti lutima umuamue, lomela umuamue, vu sivaya Suku haeye Isia ya Ñala yetu Yesu Kristu.” (Va Roma 15:​5, 6) Koloneke vilo, etu tumanu vaye, tu sukilavo oku sivaya Yehova ‘lutima umuamue.’ Ndamupi tu pondola oku ci linga?

3, 4. (a) Oku litepa kupi kua kala pokati Kakristão ko Roma? (b) Pole, ndamupi ovo va tẽla oku vumba Yehova ‘lutima umuamue’?

³ Kofeka yo Roma kua kala Akristão valua va kala akamba va Paulu. (Va Roma 16:​3-​16) Omo okuti ovo va tunda kapata alua, va kala lovituwa via litepa. Pole vosi yavo Paulu wa va tukuile hati vamanjaye “va soliwa la Suku.” Eye wa popia hati: “Ndu panduli omo ekolelo liene lia yevala koluali luosi. Yesu Kristu o pitiya olopandu viange ku Suku.” Vamanji vo ko Roma va lekisile ongangu yiwa kovina via litepa. (Va Roma 1:​7, 8; 15:​14) Pole vamue pokati kavo va kala lovisimĩlo via litepa kovihandeleko vimue. Akristão koloneke vilo va tundavo kapata osi. Kuenda va kuetevo ovituwa via litepa. Omo liaco, elungulo lia Paulu li pondolavo oku va kuatisa oku vumba Yehova ‘lutima umuamue.’

⁴ Kofeka yo Roma kua kala vamanji vamue va Yudea. Kuenda vamue okuti tete va kala Vakualofeka. (Va Roma 4:1; 11:​13) Akristão vamue va Yudea ka va yonguile oku siapo ovituwa vimue Viocihandeleko ca Mose. Pole, va kũlĩhĩle okuti ovituwa viaco ka vi tuala omanu kepopelo. Handi vali, vakuavo va tavele kocilumba ca Kristu. Momo va kũlĩhĩle okuti va yovoka kovihandeleko vimue va pokuile eci ka va lingile handi Akristão. Kuenje ca va kuatisa oku siapo ovituwa vimue viosimbu. (Va Galatia 4:​8-​11) Vosi yavo ‘va soliwile la Suku’ ndomo Paulu a ci popia. Pole, va sukilile oku kapako vakuavo oco vamameko oku vumba Suku ‘lutima umuamue.’ Koloneke vilo, tu kuetevo ovisimĩlo via litepa viatiamẽla kovina vimue. Omo liaco, tu sukila oku kũlĩha ndomo upostolo Paulu a lombolola olonumbi vimue via velapo.​—⁠Va Roma 15:⁠4.

Tu ‘li Tambuli Pokati’

5, 6. Momo lie Akristão ko Roma va kuatela ovisimĩlo via litepa?

⁵ Vukanda upostolo Paulu a sonehela Akristão vo ko Roma, wa tukula ovisimĩlo via litepa. Eye wa popia hati: “Osimbu umue a sima hati, nela oku lia cosi, kuli ukuavo wa hongua ketavo o lia lika olombi.” Ocitangi caco ca pita ndati? Vocihandeleko ca Mose omanu va kisikiwile oku yuvula okulia ositu yongulu. (Va Roma 14:2; Ovisila 11:⁠7) Pole, eci Yesu a fa, Ocihandeleko caco ka ca kuatele vali esilivilo. (Va Efeso 2:​15) Noke lianyamo atatu lolosãi epandu, ungelo umue weya oku sapuila Petulu hati, ondaka ya Suku yi lekisa okuti ovikulia viosi ci tava oku vilia. (Ovilinga 11:​7-​12) Omo liaco, Akristão vamue va Yudea, veya oku fetika okulia ositu yongulu. Kuenda veya oku tava okulia ovina vimue okuti Vocihandeleko ca Mose ka ca tavele oku vilia.

⁶ Pole, Akristão vamue va Yudea, va simĩle hati, ka ca sungulukile okulia eci ca vĩha. Kuenje veya oku sumua calua poku mõla vamanjavo va kala okulia eci ca vĩha. Kua kalavo Akristão vamue vakualofeka okuti ketavo liavo liosimbu ka kua kaile ocihandeleko coku yuvula ovikulia vimue. Ovo veya oku sumuavo eci va mõla ovisimĩlo via litepa via kala pokati ka va Yudea omo liovikulia. Pole, omunu wosi o yuvula okulia ovikulia viaco, ka lingi ekandu. Kuenda eye ka ci tava okuti o kisika ukuavo oco a yuvulevo ovikulia viaco. Momo ovina viaco havioko vi tuala kepopelo. Ovisimĩlo viaco via litepa vieya oku nena atatamiso vekongelo. Omo liaco, Akristão vo ko Roma va sukilile oku lunguka oco ovitangi viaco ka vika va tateke oku vumba Suku ‘lutima umuamue.’

7. Ovisimĩlo vipi via litepa Akristão va kuata kosimbu viatiamẽla koku lava eteke Liesambata?

⁷ Paulu wa lekisa etosi likuavo hati: “U hati, Oloneke via litepa, ukuavo hati, Oloneke viosi via lisoka.” (Va Roma 14:5a) Vocihandeleko ca Mose omanu va sukilile oku yuvula oku linga upange veteke Liesambata. Kuenda va yuvuilevo oku linga ungende veteke liaco. (Etundilo 20:​8-10; Mateo 24:20; Ovilinga 1:​12) Eci Ocihandeleko caco ca imuha, ovina viosi via handelekiwile, ka via kuatele vali esilivilo. Pole, Akristão vamue va Yudea va kala handi lovisimĩlo viosimbu viokuti, veteke Liesambata ka ci tava oku talavaya. Kuenda ka ci tavavo oku linga ungende. Ovo veya oku nõla eteke liepanduvali hati, olio eteke lioku fendela Suku. Pole, va kũlĩhĩle okuti ocihandeleko ceteke Liesambata ka ci kuete vali esilivilo. Anga hẽ va kala oku linga eci ka ca sungulukile? Sio, va kala loku linga eci ca sunguluka. Momo noke veya oku limbuka okuti, Suku ka kisika vali oku lava eteke Liesambata. Omo okuti Paulu wa sumbilile ovisimĩlo via vamanjaye, covetiya oku popia hati: “Omunu omunu a kolisue vutima waye muele.”​—⁠Va Roma 14:5b.

8. Akristão vo ko Roma va sukilile oku kapako ovisimĩlo via vakuavo. Pole nye va sukilile oku yuvula?

⁸ Paulu wa vetiya vamanji oco va kuate epandi la vana va kala oku lava Ocihandeleko ca Mose. Pole, wa pisa Akristão va kala loku kisika vakuavo oku lava ocihandeleko caco. Momo ka ci tuala kepopelo. Kunyamo wo 61, Paulu wa soneha elivulu lia Va Heveru mu sangiwa ukanda a tuma Kakristão va Yudea. Ukanda waco wa popia hati, Akristão ka va sukila vali oku lava Ocihandeleko ca Mose. Momo va kuete elavoko lia velapo omo liocilumba cocisembi ca Yesu.​—⁠Va Galatia 5:​1-12; Tito 1:​10, 11; Va Heveru 10:​1-17.

9, 10. Nye Akristão va sukila oku yuvula? Ci lombolola.

⁹ Paulu wa popia hati, Akristão va kuete ovisimĩlo via litepa viatiamẽla kovina vimue. Pole ovisimĩlo viaco ka ci tava okuti vi nyõla ekalo liwa vekongelo. Momo ka kuli olonumbi Viembimbiliya vi pisa ovisimĩlo viaco. Omo liaco, eye wa pula Akristão vakuavitima via leñela hati: ‘Nye u pisila va manjene?’ Kua kalavo Akristão vamue vakuavitima via pama. Ovo va enda okulia ovina via pisiwile Vocihandeleko ca Mose. Kuenda oku linga upange veteke Liesambata. Upostolo Paulu wa sapuila Akristão vaco hati: ‘Nye u pembuila va manjene?’ (Va Roma 14:​10) Ndomo Paulu a ci lombolola, Akristão vosi vakuavitima via leñela va sukilile oku yuvula oku pisa vamanjavo. Handi vali, Akristão vana vakuavitima via pama, va sukililevo oku yuvula oku pembula vakuavo kovina viaco. Kuenje vosi yavo va sukilile oku sumbila ovisimĩlo via vakuavo. Kuenda oku yuvula oku ‘lisokolola lika ovo muẽle.’​—⁠Va Roma 12:​3, 18.

¹⁰ Paulu wa eca onumbi yimue ya sunguluka yoku potolola ovisimĩlo viaco. Eye wa popia hati: “U o lia ka ka pembule u ka li, lu ka li ka ka pise u o lia, momo Suku wo tambula.” Noke wamisako hati: ‘Kristu wo tambuli, okuti Suku o muisua ulamba.’ Ci kale omanu vana vakuavitima via pama ale vava va hongua, ci tava okuti va taviwa la Suku kuenda la Yesu. Omo liaco, tu sukila oku lekisa ocituwa cimuamue coku “li tambula pokati.” (Va Roma 14:3; 15:⁠7) Helie ka tava kondaka eyi?

Ocisola ci Nena Ukamba

11. Ovitangi vipi via kala kotembo ya Paulu?

¹¹ Vukanda Paulu a sonehela Akristão vo ko Roma, wa tukula ondaka yimue yi kuete esilivilo. Otembo yaco, Yehova wa imũla ale ocisila cosimbu kuenda wa tumbika cokaliye. Akristão vamue ka ca va lelukilile oku pokola kocisila cokaliye. Koloneke vilo, ocitangi caco ka ci kasiko vali. Pole, ci tava okuti vamue va kuata ovisimĩlo viaco.

12, 13. Ovitangi vipi vi pondola oku pita cilo okuti Akristão va sukila oku sumbila ovisimĩlo via vakuavo?

¹² Ci tava okuti manji umue ukãi wa kala ketavo lina okuti ka ci tava oku wala ovina vioku li posuisa. Eci a fetika oku lilongisa Embimbiliya, pamue o sanga ocitangi coku pongolola ovituwa viaye oco a fetike oku wala ovina viaco. Kuenda, o limbuka okuti oku wala ovina vioku li posuisa hekanduko. Etu tua kũlĩha okuti, Vembimbiliya ka muli ocihandeleko ci pisa ovisimĩlo viaye. Omo liaco, ka ca sungulukile okuti umue vekongelo u vetiya oco a pongolole utima waye. Kuenda eye ka ci tava okuti o vetela evelo vamanji vana okuti utima wavo u va ecelela oku wala ovina viaco.

¹³ Tu konomuisi vali ocindekaise cikuavo. Ci tava okuti manji umue ulume wa kulila pocitumãlo cimue okuti ka va ecelela oku nyua. Eci a iñila vocisoko ca Yehova, o lilongisa Vembimbiliya okuti, ovinyu ombanjaile ya tunda ku Suku. Kuenda ci tava oku yi nyua lolondunge. (Osamo 104:​15) Eye o tava konumbi yaco. Pole, omo okuti pocitumãlo a kulila vo longisa hati ka ci tava oku nyua ovinyu, eye o nõlapo oku li kandangiya. Omo liaco, ka citava okuti eye o pisa vamanji vana va nyua ovinyu lolondunge. Momo o pokola kelungulo lia Paulu wa popia hati: “Tu kuami ovina vi koka ombembua haivio vi koka utima woku likuatisa pokati.”​—⁠Va Roma 14:⁠19.

14. Kovina vipi Akristão va sukila oku pokola kelungulo Paulu a eca ku va Roma?

¹⁴ Kuli ovitangi vikuavo okuti oku vi tetulula ci sukila oku pokola kelungulo upostolo Paulu a ecele Kakristão vo ko Roma. Ocili okuti, vamanji vekongelo va kuete ovisimĩlo via litepa. Ci tava okuti ka va kuata ovisimĩlo vimuamue viatiamẽla koku wala loku li posuisa. Pole, Embimbiliya lieca olonumbi vi pondola oku kuatisa Akristão vosi. Etu Tuakristão, tu sukila oku yuvula oku wala uwalo una ka wa sungulukile. Kuenda poku posuisa esinga lietu, tu sukilavo oku yuvula ovituwa violuali. (1 Yoano 2:​15-​17) Akristão va sukila oku ivaluka okuti ovo olondingupange via Yehova. Omo liaco, ndaño va kasi kapuluvi epuyuko, va sukila oku wala uwalo wa sunguluka. (Isaya 43:10; Yoano 17:16; 1 Timoteo 2:​9, 10) Kovitumãlo vimue, kuli ovina vialua okuti Akristão va pondola oku vi linga.a

Tu Yuvuli Oku Lueyisa Vakuetu

15. Ovina vipi Ukristão a sukila oku yuvula oco a kuatise vakuavo?

¹⁵ Eci Paulu a eca elungulo liaye Kakristão vo ko Roma, wa tukulavo etosi likuavo li kuete esilivilo. Ukristão una ukualondunge via pindisiwa, citava okuti o likandangiya oku linga ocina cimue okuti kokuaye ca sunguluka. Momo lie? Momo wa kũlĩha okuti nda wa ci linga, ci kokela vakuavo ocilondokua. Nye tu sukila oku linga nda tu kasi locitangi caco? Upostolo Paulu wa popia hati: “Oku likala oku lia ositu, pamue oku nyua ovinyu, pamue oku linga cimue cikuavo ci kapela manjove ocilondokua pamue cu leñelisa ketavo, oco esunga.” (Va Roma 14:​14, 20, 21) Eye wamisako lolondaka viaye hati: “Etu tua pama [kespiritu], ca tu sesamela oku ambatisako ava va hongua okuleñela kuavo, haku lisokololako etu muele. Etu vosi omunu omunu a sokoluile ukuavo eci ciwa coku u kolisa.” (Va Roma 15:​1, 2) Olonjanja vimue tu limbuka okuti tu kasi oku linga cimue ci kapela vakuetu ocilondokua. Omo liaco, ocisola tu kuetele vamanjetu, ci ka tu vetiya oku yuvula oku ci linga. Tu konomuisi ondaka yatiamẽla koku nyua evi vi koluisa. Ukristão citava oku nyua lolondunge. Pole, nda eye wa limbuka okuti oku nyua kuaco ku lingila vakuavo ocilondokua, ka ci tava okuti o tamalãla loku yi nyua.

16. Tu pondola ndati oku lekisa esumbilo komanu va kasi vocikanjo cetu?

¹⁶ Onumbi eyi oyo tu sukilavo oku kuama poku kala lomanu ka va lilongisa Embimbiliya. Ci tava okuti tu kasi pocitumãlo comanu vana okuti ketavo liavo va longisiwa oku lava eteke Liesambata. Etu ka tu yongola oku kapela ocilondokua omanu vaco. Kuenda ka tu yongola okuti upange wetu woku kunda u tatekiwa. Omo liaco, tu sukila oku yuvula oku linga upange umue veteke liaco liowusa. Kuli ocitangi cimue cikuavo. Citava okuti Ukristão ilukila kocitumãlo cimue cikuavo oco amiseko upange waye woku kunda. Pole, kocitumãlo caco omanu vaco olohukũi. Omo liaco eye o sukila oku wala uwalo una wa sunguluka oco a lekise esumbilo komanu vaco. Kuenda o sukilavo oku ambata omuenyo umue wa sungulukila pocitumãlo caco.

17. Momo lie tu sukilila oku kapako vakuetu poku nõla eci tu yongola oku linga?

¹⁷ Anga hẽ ka ca sungulukile okuti vamanji ‘va pama’ kespiritu va linga apongoloko? Sokolola handi ocindekaise eci: Osimbu tu kasi loku endisa ekãlu lietu tua limbuka okuti kovaso kuli omãla vamue. Anga hẽ tu amamako lolupesi omo okuti tu kuete omoko yaco? Sio, hacoko tu linga. Etu tu tepulula olupesi oco ka tuka ponde omãla va kasi kovaso yetu. Olonjanja vimue haico tu sukila oku linga la vamanji. Pamue tu yongola oku linga cimue okuti tu kuete omoko yaco. Kuenda tua kũlĩha okuti, ka tu kasi loku lueya onumbi yimue Yembimbiliya. Pole, oku ci linga, ci kapela ocilondokua vamanji vana vakuavitima via leñela. Omo liaco, ocisola tu va kuetele, cika tu vetiya oku yuvula oku linga ocina caco. (Va Roma 14:​13, 15) Oku kuata ocisola la vamanji loku pitisa kovaso upange wa Yehova, oco ocina ca velapo.

18, 19. (a) Poku lekisa esumbilo ku vakuetu ndamupi tu kuama ongangu ya Yesu? (b) Momo lie tu sukilila oku kuata utima umuamue kovina tu linga? Kuenda nye tuka lilongisa vocipama cikuãimo?

¹⁸ Nda tua lekisa esunguluko kueci tu yongola oku linga, tuka kuama ongangu ya Paulu. Eye wa popia hati: “Kristu ka lisokoluile eye muele, puãi, ndeci ca sonehiwa okuti, Efuki liava va ku fũkĩlisa lia mbuila.” Yesu wa lieca kolofa omo lietu. Omo liaco, tu sukila oku yuvula oku linga ovina vimue oco tu kuatise vana okuti ‘ovitima viavo via leñela.’ Nda tua ci linga tuka ecela kumue lavo esivayo ku Yehova. Kuenda tuka lekisa ‘ovituwa ndevi via Kristu.’​—⁠Va Roma 15:​1-5.

¹⁹ Kuli ovituwa vimue okuti ka vi kuete olonumbi Viembimbiliya. Pole, nda vovituwa viaco mua kongela upange tu lingila Yehova, tu sukila oku kuata utima umuamue. (1 Va  Korindo 1:​10) Ukamba waco u limbukiwila kovituwa viwa tu lekisa ku vana ka va sole efendelo liocili. Ondaka ya Suku yi lombolola ekalo liovanyãli vaco. Kuenda yi tu lungula oco tu lunguke ‘londaka yangombo vesanda.’ (Yoano 10:⁠5) Ndamupi tu pondola oku limbuka angombo vaco? Kuenda ndamupi tu pondola oku kala lavo? Apulilo a lingiwa ndeti, aka tambuluiwa vocipama cikuãimo.

[Etosi pombuelo yemẽla]

O Tambulula Ndati?

• Momo lie ovisimĩlo via litepa via vamanji ka ci tava okuti vi kapa kohele elitokeko liavo?

• Momo lie etu Tuakristão tu sukilila oku li sola pokati?

• Koloneke vilo tu pondola ndati oku pokola kelungulo lia Paulu lioku kuata utima umuamue? Kuenda nye cika tu vetiya oku ci linga?

[Elitalatu kemẽla 24]

Elungulo lia Paulu lioku kuata utima umuamue lia kuatisa vekongelo

[Elitalatu kemẽla 25]

Akristão vocili va kuete utima umuamue, ndaño va tunda kapata a litepa