“Uvangi Kolofeka Viosi”
‘Vu linga olombangi viange toke kolonepa viosi viokilu lieve.’—OVILINGA 1:8.
1. Otembo yipi olondonge via Yesu via yeva onjanja yatete ocitumasuku ca Mateo 24:14? Olondaka viaco va vi yevela pi?
OLONDAKA vielivulu lia Mateo 24:14, tua vi kũlĩha ciwa. Ocitumasuku eci ci kuete esilivilo lia velapo. Sokolola eci olondonge via kala oku sima eci via yeva olondaka evi onjanja yatete. Ca kala kunyamo wa 33. Otembo yaco, pa pitile ale anyamo atatu tunde eci olondonge via kala la Yesu. Kuenje va kala oku enda laye ko Yerusalãi. Ovo va muile ovikomo viaye kuenda wa va longisa ovina vialua. Ndaño okuti va solele ovina viaco, va kũlĩhĩle okuti vaka suvukiwa lomanu. Momo Yesu wa kuatele ovanyali valua.
2. Ovitangi vipi olondonge via Yesu via kala oku lavoka?
2 Eci Yesu a kala Komunda yo Olivera, olondonge viaye vikuãla via tumãlele kumue laye oku u yevelela. Eye wa va sapuila ovina va kala oku lavoka kuenda ovitangi vaka liyaka lavio. Otembo yimue, Yesu wa va sapuilile okuti, oka pondiwa. (Mateo 16:21) Omo liaco, wa va lomboluila okuti, vaka liyakavo lelambalalo. Eye wa popia hati: “Vo pakuili kohali kuenje vo wipayi. Vu suvukilua onduko yange lolofeka viosi.” Wa lombololavo okuti, ku keya ovaprofeto vesanda kuenje vaka kemba omanu valua. Vakuavo vaka konyõha loku lisuvuka pokati. Noke wa popia hati, ‘omanu valua’ vaka tepulula ocisola cavo ku Yehova. Kuenje ka vaka kuata vali ombili Londaka ya Suku.—Mateo 24:9-12.
3. Momo lie olondaka via Yesu vi sangiwa kelivulu lia Mateo 24:14, vi komohĩsila?
3 Eci Yesu a mãla oku lomboluila olondonge viaye ovitangi va kala oku lavoka, wa va sapuila olondaka vimue via va komohĩsa. Eye wa popia hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” (Mateo 24:14) Ocili okuti, upange woku kunda Yesu a fetika ko Isareli, wa sukilile oku lingiwa voluali luosi. (Yoano 18:37) Ocitumasuku eci ci komohĩsa calua. Ka ca lelukile oku linga upange waco ‘kolofeka viosi.’ Momo olondonge via kala oku lavoka oku ‘suvukiwa lomanu vosi.’ Oku tẽlisiwa kupange waco, ka kueci lika esivayo ku Yehova. Pole, kuecavo esivayo kunene waye, kocisola caye, kohenda, kuenda epandi liaye. Handi vali, kuecavo komanu vaye epuluvi lioku lekisa ekolelo liavo kokuaye kuenda onjongole yavo yoku linga upange Waye.
4. Velie va tambuile ocikele coku kunda olondaka viwa? Olondaka vipi vielembeleko Yesu a va sapuila?
4 Yesu wa eca kolondonge viaye ocikele cupange umue u komohĩsa. Osimbu ka endele kilu, wa va sapuila hati: ‘Eci espiritu sandu liuwili, vu kuata unene. Kuenje u linga olombangi viange vo Yerusalãi, lo vo Yudea yosi, lo vo Samaria, kuenda toke kolonepa viosi viokilu lieve.’ (Ovilinga 1:8) Noke, omanu vakuavo veya oku likongela lovapostolo kupange woku kunda. Pole, etendelo liavo lia kala litito. Ovo va sanjukile calua eci va yeva okuti espiritu sandu lia Yehova lika va kuatisa oco va tẽlise upange wavo.
5. Nye olondonge via Yesu ka via kũlĩhĩle catiamẽla kupange woku kunda?
5 Olondonge, via kũlĩhĩle okuti vi kuete ocikele coku kundila olondaka viwa kolofeka viosi ‘loku longisa omanu oco va linge olondonge.’ (Mateo 28:19, 20) Pole, ka va kuatele elomboloko ndomo upange waco uka lingiwa. Kuenda ka va kũlĩhĩle otembo yesulilo lioluali. Etu ka tua kũlĩhĩlevo eteke liesulilo. Yehova eye lika wa kũlĩha eteke liaco. (Mateo 24:36) Eci onjongole yaye yika tẽlisiwa, oka nena esulilo lioluali lulo. Noke, Akristão vaka limbuka okuti, upange woku kunda wa tẽlisiwa ndomo Yehova a yonguile. Kocita catete, olondonge ka via kũlĩhĩle ndomo upange waco uka lingiwa koloneke via sulako.
Upange Woku Kunda Kocita Catete
6. Nye ca pita keteke lio Pendekoste kunyamo wa 33 kuenda noke?
6 Kocita catete, upange woku kunda loku longisa omanu oco va linge olondonge, wa eca onima yiwa. Keteke lio Pendekoste yunyamo wa 33, cisoka 120 kolondonge, via kala ko Yerusalãi vohondo yimue kosapalalo. Noke, espiritu sandu lia Yehova lia va lokila. Kuenje upostolo Petulu vohundo yaye, wa tukula elomboloko liocikomo caco. Noke, ci soka 3.000 komanu va tava kondaka ya Suku, kuenje, va papatisiwa. Ovina evi via kala ño efetikilo. Ndaño okuti, asongui vatavo va yonguile oku imula upange woku kunda, ‘Yehova wamamako oku vokiya kongongela yolondonge ava va popeliwa.’ Kuenje ‘owiñi walume weya oku tẽla cisoka olohulukãi vitãlo.’ Noke, ‘kua vokiya owiñi walua walume lakãi va tava ku Yesu.’—Ovilinga 2:1-4, 8, 14, 41, 47; 4:4; 5:14.
7. Eci Korneliu a tava kondaka ya Suku, ca eca epuluvi lie?
7 Kunyamo wa 36 kua pita ulandu ukuavo u komohĩsa. Korneliu, ulume umue ukualofeka, wa tava kondaka ya Suku, kuenje wa papatisiwa. Yehova eye wa tuma upostolo Petulu oku kundila ulume waco ukualofeka. Poku ci linga, wa lekisa okuti, ocikundi ca Yesu coku ‘kundila omanu kolofeka viosi oco va linge olondonge,’ ka ci sulila lika ku va Yudea. (Ovilinga 10:44, 45) Vamanji vana va kala oku songuila upange woku kunda kotembo yaco, va kuata ovisimĩlo vie? Eci ovapostolo kumue lakulu voko Yudea va limbuka okuti va kualofeka va sukilavo oku yeva olondaka viusoma, va eca esivayo ku Suku. (Ovilinga 11:1, 18) Noke, upange woku kunda wamamako oku eca apako awa pokati ka va Yudea. Kunyamo wa 58, ketendelo lia Vakualofeka vana va tava, kua vokiya ‘olohuluwa vialua via va Yudea’ va tava kondaka ya Suku.—Ovilinga 21:20.
8. Olondaka viwa via siata oku pongolola ndati omuenyo womanu?
8 Oku livokiya Kuakristão kocita catete, kua kala ocindekaise covina vi kasi oku pita koloneke vilo. Esapulo Liembimbiliya va yeva, lia kuata unene wa piãla. (Va Heveru 4:12) Omanu vana va tava Kondaka ya Suku, va pongolola omuenyo wavo. Ovituwa viokaliye, via va kuatisa oku ambata omuenyo umue uwa. Kuenje va linga afendeli va Yehova. (Va Efeso 4:22, 23) Cimuamue haico ci kasi oku pita koloneke vilo. Omanu vosi va tava kolondaka viwa, va kuete elavoko lioku kala palo posi otembo ka yi pui.—Yoano 3:16.
Olondingupange Via Suku
9. Akristão vo kocita catete va limbukile okuti va kuete ocikele cipi?
9 Akristão vo kocita catete, ka va kuatele ovisimĩlo viokuti, upange woku kunda va kala oku u linga lunene wavo. Ovo va kũlĩhĩle okuti va kasi oku kuatisiwa ‘lunene wespiritu sandu.’ (Va Roma 15:13, 19) Yehova eye wa ecelela okuti, upange waco wamamako. Handi vali, ovo va kũlĩhĩlevo okuti, va kuete esumũlũho lioku kala ‘olondingupange via Suku.’ (1 Va Korindo 3:6-9) Omo lioku pokola kelungulo lia Yesu, va likolisilako oku tẽlisa ocikele cupange va tambuile.—Luka 13:24.
10. Nye Akristão vamue va linga kocita catete oco va kundile kolofeka viosi?
10 Omo okuti Paulu wa kala ‘ndupostolo wa vakualofeka,’ wa linga ovongende alua. Eye wa tumbika akongelo alua kalupale amue oko Asia kuenda ko Helasi. (Va Roma 11:13) Noke, wa endelevo ko Roma kuenda ko Espanya. Upostolo Petulu wa tambuilevo ocikele coku ‘kundila olondaka viwa komanu vana va seviwa evamba.’ Omo liaco, wa endelevo ko Bavulono okuti kotembo yaco, oko kua kala ono yetavo lia va Yudea. (Va Galatia 2:7-9; 1 Petulu 5:13) Pokati komanu va talavaya kupange woku kunda, pa kala Trufaina la Trufosa. Ovo va kalavo lukãi ukuavo o tukuiwa hati Persi. Ukãi waco, ‘wa linga upange walua watiamẽla ku Ñala.’—Va Roma 16:12.
11. Yehova wa sumũlũisa ndati upange wolondonge via Yesu?
11 Yehova wa sumũlũisa upange womanu vaye. Eci papita 30 kanyamo tunde eci Yesu a popele hati olondaka viwa vika kundiwila kolofeka viosi, Paulu wa popia hati, ‘olondaka viwa via kundiwila kolonepa vialua viokilu lieve.’ (Va Kolosai 1:23) Anga hẽ noke kueya esulilo? Ocili okuti, esulilo lieyile ño ku va Yudea. Ulandu waco wa pita kunyamo wa 70 eci olohoka via va Roma via nyola o Yerusalãi lonembele yaco. Koloneke vilo, Yehova o yongola okuti, osimbu ka nenele handi esulilo lioluali lulo lua Satana, olondaka viwa vi kundiwa kolofeka viosi.
Upange Woku Kunda Koloneke Vilo
12. Olombangi via Yehova via kuata ndati elomboloko liocikundi cupange woku kunda?
12 Eci papita 1.800 kanyamo noke yoku molẽha Kuakristão vesanda, kua tumbuluiwa efendelo liocili. Olombangi via Yehova, via kuata elomboloko liocikele coku longisa omanu vo kolofeka viosi oco va linge olondonge. (Mateo 28:19, 20) Kunyamo wo 1914, voluali luosi mua kala eci ci soka 5.100 Kolombangi via Yehova. Kotembo yaco, via kala oku kundila kueci ci soka 68 kolofeka. Pole, ka via kuatele elomboloko lia suapo liolondaka vielivulu lia Mateo 24:14. Kesulilo liocita cekũi lecea, va fetika oku sandeka Embimbiliya valimi alua. Kuenje, Ambimbiliya aco, va fetika oku va eca kolonepa viosi violuali. Eci papita anyamo amue, Olombangi via Yehova, via simĩle okuti upange woku kundila omanu kolofeka viosi wa tẽlisiwa.
13, 14. Elomboloko lipi liocipango ca Suku lia situluiwa Vutala Wondavululi wunyamo wo 1928?
13 Vokuenda kuotembo, Yehova wa eca komanu vaye elomboloko liocipango caye. (Olosapo 4:18) Utala Wondavululi 1 wosãi ya Cembanima wunyamo wo 1928, wa popia hati: ‘Anga hẽ tu pondola oku popia okuti, oku sandekiwa Kuambimbiliya kua tẽlisa evanjeliu lia lomboluile upange woku kunda? Sio hacoko. Omanu va Yehova va kuete handi upange walua woku sandeka alivulu a lombolola ovina viatiamẽla kocipango ca Suku oco a eciwe kuava va lekisa onjongole kesapulo liusoma. Momo nda ka ca lingiwile omanu ka va kuata elomboloko liokuti, Usoma wa Mesiya wa tumbikiwa ale koloneke vilo.’
14 Utala waco Wondavululi wamisako hati: ‘Kunyamo wo 1920, Olombangi via Yehova via kuata elomboloko liwa liocitumasuku ca Ñala yetu ci sangiwa kelivulu lia Mateo 24:14. Ovo va limbuka okuti, evanjeliu lioku kundila olondaka viwa voluali luosi oco li linge uvangi kolofeka viosi, ka li lomboloka evanjeliu liusoma u laika oku iya. Pole, li lomboloka evanjeliu lioku eca uvangi wokuti, Usoma wa Mesiya wa fetika ale oku viala voluali luosi.’
15. Upange woku kunda wa livokiya ndati tunde kunyamo wo 1920?
15 Etendelo liakundi vusoma, ka lia sulilile lika kunyamo wo 1920. Vokuenda kuotembo, kua limbukiwa ‘owiñi wakahandangala wolomeme vikuavo.’ Kuenje, wa kongeliwa ketendelo liavo. (Esituluilo 7:9; Yoano 10:16) Koloneke vilo, voluali luosi muli eci ci soka 6.613.829 kakundi volondaka Viusoma. Ovo va kasi oku kundila kueci ci soka 235 kolofeka. Ocitumasuku eci ci kasi oku tẽlisiwa. Olondaka viwa viusoma, vi kasi oku kundiwa kolofeka viosi okuti, kosimbu ci sule. Kuenda Olombangi via Yehova vi kasi oku livokiya calua voluali luosi.
16. Upange upi wa lingiwa unyamo wa pita? (Tala ulandu wupange kemẽla 23 toke 26.)
16 Olombangi via Yehova, via linga upange walua vokuenda kunyamo wo 2005. Ovo va pesela olohuluwa violowola kupange woku kunda olondaka viwa kueci ci soka 235 kolofeka. Va linga olohuluwa viapasu komanu vana va lekisa onjongole kesapulo liusoma. Kuenda va songola alilongiso Embimbiliya kolohuluwa viomanu. Upange waco, wa lingiwa Lolombangi via Yehova via sokiya otembo yavo kuenda va eca ovokuasi avo oco va kuatise omanu Londaka ya Suku. (Mateo 10:8) Lekuatiso liespiritu sandu liaye, Yehova o kasi oku kuatisa omanu vaye oco vamameko oku tẽlise ocipango caye.—Sakariya 4:6.
Ombili Kupange Woku Kunda
17. Omanu va Yehova va kasi oku pokola ndati kocikundi ca Yesu coku kunda olondaka viwa?
17 Tunde eci Yesu a popia hati, olondaka viwa vi kundiwa kolofeka viosi, papita ale olohulukãi vivali vianyamo. Pole, omanu va Yehova, ka va tepuluile ombili yavo kupange waco. Etu tua kũlĩha okuti, nda tua pandikisa loku linga eci ciwa, tuka lekisa ovituwa via Yehova ndeci: Ocisola, ohenda, kuenda epandi. Etu tu kuama ongangu ya Yehova. Momo ka tu yongola okuti umue o nyoliwa. Pole, tu yongola okuti, omanu vosi va likekembela oco va kuate ukamba la Yehova. (2 Va Korindo 5:18-20; 2 Petulu 3:9) Lekuatiso liespiritu sandu, Olombangi via Yehova vi kasi oku amamako oku kundila olondaka viwa voluali luosi. (Va Roma 12:11) Omo liaco, omanu vo kolonepa viosi violuali, va kasi oku tava kesapulo liusoma. Kuenda va kasi oku pokola kolonumbi via Yehova. Tu konomuisi ovolandu amue.
18, 19. Lombolola ovolandu a lekisa ndomo omanu vamue va tava kolondaka viwa.
18 Ulume umue o tukuiwa hati Carlos, wo kofeka yo Kenia, wa kala ongunja yoku lima akaya. Kunyamo wo 1988, wa landisa eci ci soka 8.000 kolokilu viakaya. Kuenje, wa tambula ukanda wuvangi wokuti eye Ongunja ya Velapo Koku Lima Akaya vofeka. Kunyamo waco, wa fetika oku lilongisa Embimbiliya. Noke, wa limbuka okuti, omunu wosi o lima akaya, o kasi oku tomba ocihandeleko ca Yesu catiamẽla koku sola vakuetu. (Mateo 22:39) Eci a limbuka okuti wa kala oku nyõla uhayele womanu, wa nyõla epia liaco liakaya lovihemba. Eye wa linga apongoloko alua komuenyo waye toke eci a litumbika ku Yehova, kuenje wa papatisiwa. Cilo, wa iñila kupange wakundi vavelapo kuenda oñuatisi yakulu vekongelo.
19 Yehova o kasi oku tuñunya olofeka lolondaka viwa vi kasi oku kundiwa voluali luosi. Kuenje, o kasi oku nena vocisoko caye omanu va sunguluka. (Hagai 2:7) Umalẽhe umue o tukuiwa hati Petulu kofeka Yoputu, eci a kuata 13 kanyamo, wa iñila kosiminaliu oco a linge omisionaliu. Eye wa yonguile oku linga omisionaliu oco a longise Embimbiliya komanu. Eci papita otembo yimue, wa siapo osikola yaco. Momo wa limbuka okuti, ka va kaile oku kapako Embimbiliya. Noke lianyamo epandu wa iñila kosikola ya velapo yuloño woku lilongisa ovisimĩlo viomanu volupale luo Lisboa. Eye wa kala la manjaye ufeko okuti, Ombangi ya Yehova. Kuenje wo vetiya oku lilongisa Embimbiliya. Pole, otembo yaco Petulu ka kuatele ekolelo liokuti, kuli Suku. Omo liaco, wa kala oku sokolola nda o lilongisa Embimbiliya ale sio. Noke wa sapuilako ulongisi waye wo kosikola catiamẽla koku nola onjila yaco. Ulongisi wo lomboluila okuti, vocipama cimue culoño woku lilongisa ovisimĩlo viomanu, tua lilongisa okuti, omanu vana ka va tẽla oku nola onjila yimue komuenyo wavo, va linyõla ovo muẽle. Olondaka evi via vetiya Petulu oku lilongisa Embimbiliya. Noke wa papatisiwa, kuenje cilo o kasi oku kuatisa omanu valua lelilongiso Liembimbiliya.
20. Momo lie tu sanjukila poku kũlĩha okuti olondaka viwa vi kasi oku kundiwila kolofeka viosi?
20 Toke cilo, ka tua kũlĩhĩle eteke Yehova aka popia hati, kaliye upange woku kunda wa tẽlisiwa. Kuenda ka tua kũlĩhĩlevo eteke aka nena esulilo lioluali lulo. Tua kũlĩha lika okuti, esulilo lioluali li kasi ocipepi. Tua sanjuka calua omo lioku kũlĩha okuti olondaka viwa viusoma vi kasi oku kundiwa voluali luosi. Kuenda, upange waco weca uvangi wokuti, otembo yuviali wa Yehova yi kasi ocipepi. Noke, uka piñala olombiali viosi violuali lulo. (Daniele 2:44) Unyamo lunyamo, Olombangi via Yehova via siata oku kundila omanu valua oco va kuate epuluvi lioku eca esivayo ku Yehova. Omo liaco, tu amamiko lekolelo kumue la vamanji voluali luosi loku kundila omanu vo kolofeka viosi. Nda tua ci linga, tuka lipopela etu muẽle, kuenda tuka popelavo vana va tu yevelela.—1 Timoteo 4:16.
Ivaluka Eci Tua Lilongisa?
• Momo lie ocitumasuku celivulu lia Mateo 24:14, ci kuetele esilivilo?
• Alikolisilo api Akristão vatete va linga oco va kunde esapulo liusoma kuenda nye ceyililako?
• Olombangi via Yehova via kuata ndati elomboloko liupange woku kundila kolofeka viosi?
• Eci ove wa konomuisa ulandu wupange Wolombangi via Yehova wa lingiwa kunyamo wa pita, nye ca ku komohĩsa?
[Elitalatu kemẽla 20]
Yehova wa songuila Petulu oco a kundile Korneliu lepata liaye
[Elitalatu kemẽla 21]
Paulu wa linga ovongende kolofeka vialua omo lioku kunda esapulo liusoma