Eliangiliyo Lia Yehova Lioku Tẽlisa Ocipango Caye
“Suku o suisapo ovina viosi ndeci ca soka locipango caye.”—VA EFESO 1:11.
1. Momo lie akongelo vaka liongoluila keteke liekũi lavali kosãi ya Kupupu yunyamo wo 2006?
KETEKE, liekũi lavali kosãi ya Kupupu yunyamo wo 2006 Votatu, ci soka ekũi lepandu kolohuluwa viomanu, vaka linga ocipito Conjivaluko yolofa via Yesu. Kohongele yaco, kuka kala omesa yombolo ka yi kuete etumbisa kuenda ovinyu. Ombolo yaco, yi lomboloka etimba lia Yesu. Ovinyu, yi lomboloka osonde yaye. Kesulilo liohundo yika situlula elomboloko liocipito Conjivaluko yaco, ombolo lovinyu vika pitisiwa komanu vosi. Pole, vakongelo Olombangi via Yehova, ka muli omanu valua valia kombolo yaco lovinyu. Oco hẽ, momo lie Akristão vana va kuete elavoko lioku enda kilu ovo lika valia kombolo yaco lovinyu?
2, 3. (a) Yehova wa lulika ndati ovina locipango caye? (b) Cipi ca kala ocipango ca Yehova eci a lulika oluali lomanu?
2 Yehova eye Suku ukuakutẽlisa ocipango caye. Eye ‘o suisapo ovina viosi ndeci a panga.’ (Va Efeso 1:11) Eye tete wa lulika Omõlaye wongunga. (Yoano 1:1, 14; Esituluilo 3:14) Noke lekuatiso Liomõlaco, wa lulika ovangelo, ilu, ongongo, kuenda omanu.—Yovi 38:4, 7; Osamo 103:19-21; Yoano 1:2, 3; Va Kolosai 1:15, 16.
3 Yehova ka lulikile oluali ndocitumãlo coku seteka omanu oco va ende kilu ndeci Atavo esanda a siata oku longisa. Pole, wa lulika oluali oco ‘mu kale omanu.’ (Isaya 45:18) Suku ka lulikile oluali oco lu kale upolokoso. (Osamo 115:16) Eye wa yonguile okuti, oluali lu kala ocumbo celau. Kuenda mu kala omanu vakuesunga okuti va ci lima kuenda va citata. Omo liaco, ka lulikile omanu oco va kuate elavoko lioku enda kilu.—Efetikilo 1:26-28; 2:7, 8, 15.
Ocipango ca Yehova ca Setekiwa
4. Onjila yuviali wa Yehova ya kapiwa ndati vatatahãi tunde kosimbu?
4 Umue pokati komãla va Yehova kilu wa lekisa esino. Kuenje wa kapa vatatahãi ocipango ca Yehova loku lavisa ombanjaile yelianjo a tambuile kokuaye. Satana wa nyõla ombembua yomanu yina yi tunda koku pokola kuviali wa Yehova. Eye wa cilinga poku vetiya Adama la Heva oku nõla onjila yoku litumĩla ovo muẽle. (Efetikilo 3:1-6) Satana wa kũlĩhĩle okuti, Yehova eye ukuonenewosi. Pole, wa kapa vatatahãi unene Waye woku viala loku lekisa okuti, ka kuete omoko yaco. Eci omanu va lulikiwa, ocitangi cuviali wa Yehova, ca fetika oku molẽha palo posi.
5. Ocitangi cipi Satana a votola, kuenda helie wa kongelele vocitangi caco?
5 Koloneke via Yovi, Satana wa katula ocitangi cikuavo catiamẽla kuviali wa Yehova. Eye wa tatãla onjongole yomanu yoku pokola ku Yehova loku u vumba. Noke wa lekisa okuti, omanu va vumba lika Yehova omo liovina viwa va tambula kokuaye. Pole, nda va kapiwa voseteko, va liwekapo oku u vumba. (Yovi 1:7-11; 2:4, 5) Ndaño okuti, olondaka viaco via popiwa komanu, pole, mua kongelele ovangelo kuenda Omõlaye wongunga.
6. Yehova wa lekisa ndati okuti, o tẽlisa ocipango caye loku kemãlisa onduko yaye?
6 Yehova poku tẽlisa ocipango caye loku eca elomboloko lionduko yaye, wa linga Upopeli womanu lovangelo.a Eye wa sapuila Satana hati: “Ñapa ukuse pokati [kove] lukãi, lo pokati kombuto yove lombuto yaye. Eye o sasõla utue wove, kuenje ove u lumana kocisendemãhi.” (Efetikilo 3:15) Yehova wa likuminyile oku eca etambululo ku Satana lekuatiso Liombuto yukãi okuti, ocisoko caye cokilu. Kuenje wa eca elavoko lioku yovola ombuto ya Adama loku va ĩha omuenyo ko pui.—Va Roma 5:21; Va Galatia 4:26, 31.
‘Elumbu li Kola Liocipango ca Yehova’
7. Ocipango cipi Yehova a situlula vonduko yupostolo Paulu?
7 Paulu vukanda a sonehela Akristão voko Efeso, wa lombolola ndomo Yehova a tẽlisa ocipango caye. Eye wa popia hati: ‘Suku wa tu lumbuluila elumbu liocipango caye ca sunguluka ndeci a panga ale. Ocipango caco ceci: Wa panga okuti, eci otembo yaco yiya, ovina viosi, viokilu levi vioposi, vi kongeliwa kuenje vi lingiwa vu Kristu.’ (Va Efeso 1:9, 10) Yehova o kuete onjongole yoku kongela ovina a lulika okuti, vi kala vomunga yimosi loku pokola kuviali waye. (Esituluilo 4:11) Eye oyongola okuti, onduko yaye yi sumbiwa loku situlula uhembi wa Satana kuenda oku tẽlisa ocipango caye ‘ndeci ci kasi oku lingiwa kilu.’—Mateo 6:10.
8. Ondaka Paulu a tukula vukanda waye, yi lomboloka nye?
8 Yehova wa sokiyile okuti, ocipango caye cika tẽlisiwa loku kuama onjila yimue ya sunguluka. Paulu poku lombolola onjila yaco, wa tukula ondaka yimue yi kuete elomboloko lioku endisa ovopange ovonjo. Pole, ondaka yaco ka yi lomboloka Usoma wa Mesiya. Oyo yi tiamisiwila keliangiliyo lia Yehova lioku tẽlisa ocipango caye.b Veliangiliyo liaco mua kongelele “elumbu likola” lina a situlula vokuenda kuotembo.—Va Efeso 1:10; 3:9.
9. Yehova wa situlula ndati elumbu li kola liocipango caye?
9 Yehova lekuatiso liovisila, wa situlula ndomo ocipango caye cika tẽlisiwa catiamẽla Kombuto a likuminyile Vocumbo Cedene. Eci a linga ocisila la Avirahama, wa lekisa okuti, Ombuto yaco yika tunda kepata liaye. Kuenje, ‘olofeka viosi viokilu lieve,’ vika sumũlũhila kokuaye. Handi vali, ocisila caco ca lekisilevo okuti, kuka kala omanu vakuavo vaka kongeliwa konepa yatete Yombuto yaco. (Efetikilo 22:17, 18) Ocisila Cocihandeleko Yehova a lingile la va Isareli kosimbu, ka ca tẽlisile ocipango caye coku tumbika ‘usoma wovitunda.’ (Etundilo 19:5, 6) Omo liaco, vokuenda kuotembo wa linga ocisila cikuavo la Soma Daviti. Ocisila caco ca lekisile okuti, Ombuto ya tukuiwa Vocumbo Cedene, yika kala Mitavaso Yusoma umue ka u pui. (2 Samuele 7:12, 13; Osamo 89:3, 4) Eci ocisila Cocihandeleko ca tuala va Yudea ku Mesiya, Yehova wa situlula ovina vikuavo vi lekisa ndomo aka tẽlisa ocipango caye. (Va Galatia 3:19, 24) Omanu vana va kongeliwa konepa yatete yombuto, vaka sokiya ‘usoma wovitunda’ loku tiamẽla ‘kocisila cokaliye.’ kuenje vaka linga ‘va Isareli ya Suku.’—Yeremiya 31:31-34; Va Heveru 8:7-9.c
10, 11. (a) Yehova wa situlula ndati Ombuto ya tukuiwa vocumbo Cedene? (b) Momo lie Omõla wongunga wa Suku a sukilile oku iya palo posi?
10 Vokuenda kuotembo, Ombuto ya tukuiwa vocumbo Cedene ya molẽha voluali oco yi tẽlise ocipango ca Suku. Yehova wa tuma ungelo Gabriel oco a sapuile Maria okuti, oka cita omõla ulume, kuenje u luka hati Yesu. Ungelo wo sapuila hati: “Eye o linga unene, o tukuiwa Mõla a Tõlo, kuenje Yehova Suku u wiha ocalo ca isiaye Daviti. O viala ño hũ epata lia Yakoba, kuenje usoma waye ko sulila.” (Luka 1:32, 33) Vokuenda kuotembo Ombuto yaco ya situluiwa ciwa.—Va Galatia 3:16; 4:4.
11 Omõla wongunga wa Yehova, wa sukilile oku iya palo posi oco a setekiwe toke kolofa. Momo eye oka eca etambululo ku Satana. Anga hẽ nda wa pokola muẽle ku Isiaye? Vondaka eyi mua kongelele elumbu li kola. Upostolo Paulu poku lombolola ocikele ca Yesu, wa popia hati: “Oku longa kuondaka yi kola [yina] yi koka oku tuwa nda Suku, ku komohisa. Eye wa tukuluisua letimba. Wa tetuluiwa lespiritu okuti ukuesunga. Wa muiwa lovangelo. Wa sapuiwa ku vakualofeka. Wa taviwa kilu lieve. Wa tambuiwa kilu kulamba.” (1 Timoteo 3:16) Yesu omo lioku pandikisa toke kolofa, wa eca etambululo kuhembi wa Satana. Pole, ovina vikuavo viatiamẽlele velumbu li kola, viamamako oku sitikiwa.
“Elumbo li Kola Liusoma wa Suku”
12, 13. (a) ‘Onepa yipi yatiamẽlele velumbu li kola liusoma wa Suku’? (b) Voku nõliwa kuomanu vamue oco va ende kilu, mua kongelele nye?
12 Otembo yimue eci Yesu a kundila ko Galilea, wa lombolola okuti, elumbu li kola lia tiamẽlele Kusoma waye. Eye wa sapuila olondonge viaye hati: “Ene wa ihiwi oku kũlĩha alumbu usoma wokilu [okuti usoma wa Suku, Marko 4:11].” (Mateo 13:11) Velumbu liaco, mua kongelele oku nõla ‘okacunda katito’ oco katiamẽle konepa yatete Yombuto. Etendelo liomanu vaco, lia soka ocita lakũi akuãla la vikuãla kolohulukãi. Ovo, vaka viala Lomõlaye vusoma wokilu.—Luka 12:32; Esituluilo 14:1, 4.
13 Yehova omo okuti ka lulikile omanu oco va ende kilu, ava va noliwa oku enda kilu va tukuiwa hati, ‘oviluvo viokaliye.’ (2 Va Korindo 5:17) Upostolo Petulu una wa noliwa oku enda kilu, wa popia hati: “Suku, Isia ya Ñala yetu Yesu Kristu, a sivayiwe. Tua citiwa evali lohenda yaye ya lua, kuenje, omo Yesu Kristu a pinduiwa kuava va fa, oco tu kuete elavoko li kasi lomuenyo. Tua citiwila ocipiñalo ka ci taki, haico ca pua atondelo, kuenje ka ci kunguka. Ocipiñalo caco co solekiwili kilu.”—1 Petulu 1:3, 4.
14. (a) Omanu vana ka vatiamẽlele ku va Yudea, va kongeliwile ndati ‘velumbu li kola liusoma wa Suku’? (b) Momo lie tu kuetele elomboloko ‘liovina via longa viondaka ya Suku’?
14 Velumbu li kola Liusoma wa Suku, mua kongelelevo ocipango caye coku nõla omanu vamue va Yudea oco vaka viale la Yesu kilu. Paulu poku lombolola eliangiliyo lia Yehova lioku tẽlisa ocipango caye, wa popia hati: “Elumbu liaco ka lia situluiwile komãla vomanu vakuavitumbulukila vikuavo, ndeci koloneke vilo lia situluiwa lespiritu kovapostolo va kola lo kovaprofeto. Elumbu liaco, lieli, omo ondaka yiwa yeya, oco cilo vakualofeka va lingavo vakapiñala vu Kristu Yesu, haivo ovimatamata vietimba liaco limuamue, kuenje ohuminyo . . . ya va tukulavo.” (Va Efeso 3:5, 6) Elomboloko lielumbu liaco, lia situluiwa lika ‘kovapostolo.’ Cimuamue haico ci kasi oku pita koloneke vilo. Espiritu sandu lia Yehova olio lia siata oku tu kuatisa oku kuata elomboloko ‘liovina via longa viondaka Yaye.’—1 Va Korindo 2:10; 4:1; Va Kolosai 1:26, 27.
15, 16. Momo lie Yehova a nolela palo posi omanu vamue vaka viala kilu la Kristu?
15 Etendelo ‘liocita lakũi akuãla lavikuãla kolohulukãi violombuavekua vana va tãi la Kameme Komunda Siono,’ va lomboluiwa okuti, ‘va landiwa palo posi.’ Ovo ‘va yovuiwa pokati komanu’ kuenje va linga apako atete a eciwa ku Suku la Kameme.’ (Esituluilo 14:1-4) Yehova wa nõla umue pokati komãla vaye oco a linge onepa yatete Yombuto ya tukuiwa vocumbo Cedene. Oco hẽ, momo lie a nõlela omanu oco va likongele la Yesu Kristu? Upostolo Paulu wa lombolola okuti, omanu vaco ‘va nõliwa ndeci ca soka locipango Caye.’—Va Roma 8:17, 28-30; Va Efeso 1:5, 11; 2 Timoteo 1:9.
16 Yehova o kuete onjongole yoku kemãlisa onduko yaye yi kola kuenda uviali waye wa velapo. Omo liolondunge viaye via longa, wa tuma Omõlaye voluali kuenje wa setekiwa toke kolofa. Yehova wa lingavo eliangiliyo liokuti, vuviali wa Mesiya, mu kongela omanu va lekisa epokolo kuviali Waye toke kolofa.—Va Efeso 1:8-12; Esituluilo 2:10, 11.
17. Momo lie tu sanjukila poku kũlĩha okuti, Yesu Kristu lomanu vaka viala laye va liyaka lovitangi ndevi vietu?
17 Yehova wa lekisa ocisola caye kombuto ya Adama poku tuma Omõlaye voluali oco a nõle omanu vamue vaka viala laye Vusoma wokilu. Oco hẽ, omanu vana va lekisa ekolelo ku Yehova tunde ku Havele, va kuatisiwa ndati? Omanu vaco omo okuti va piñala ekandu lolofa, va sukilile oku sakuiwa konepa yespiritu kuenda ketimba okuti, va lipua. Eci oco ca kala ocipango ca Yehova tunde kefetikilo. (Va Roma 5:12) Omanu vana va lavoka oku kuata omuenyo ko pui palo posi, va sanjuka calua. Momo va kũlĩha okuti, Soma yavo oka lekisa ocisola lohenda kokuavo ndeci a linga lolondonge viaye eci a kala palo posi. (Mateo 11:28, 29; Va Heveru 2:17, 18; 4:15; 7:25, 26) Handi vali, va sanjukavo poku kũlĩha okuti, ava vaka viala la Yesu va liyakavo lovitangi ndevi viavo.—Va Roma 7:21-25.
Yehova o Tẽlisa Ocipango Caye
18, 19. Momo lie olondaka via Paulu vi sangiwa kelivulu lia Va Efeso 1:8-11, vi kuetele esilivilo kokuetu? Nye tuka lilongisa vocipama cikuãimo.
18 Cilo tu kuete elomboloko liolondaka vi sangiwa kelivulu lia Va Efeso 1:8-11, Paulu a sonehela Akristão olombuavekua. Eye wa lombolola okuti, Yehova wa va ‘situluila elumbu liocipango caye.’ Kuenje wa va nõla oco va viale la Kristu okuti, “o suisapo ovina viosi ndeci ca soka locipango caye.” Tua kũlĩha okuti, olondaka viaco vi lekisa eliangiliyo lia Yehova lioku tẽlisa ocipango caye. Ulandu waco u tu kuatisavo oku kũlĩha esunga lieci etendelo liomanu vamue valila kombolo lovinyu Yonjivaluko Yolofa via Yesu.
19 Vocipama cikuãimo tuka lilongisa eci ci lomboloka Onjivaluko yolofa via Yesu komanu vana va kuete elavoko lioku enda kilu. Tuka lilongisavo esunga lieci omanu vana va kuete elavoko lioku kala palo posi va sukilila oku enda kohongele Yocipito Conjivaluko yaco.
[Atosi pombuelo yamẽla]
a Onduko Yehova, yi lomboloka okuti, “o Tẽlisa Ocipango Caye.” Eye o linga ovina viosi vi sukiliwa oco a tẽlise ocipango caco.—Etundilo 3:14.
b Olondaka via Paulu vi lekisa okuti, eliangiliyo lia Yehova lioku tẽlisa ocipango caye, lia fetika kocita catete. Pole, Embimbiliya li lekisa okuti, Usoma wa Mesiya wa tumbikiwa lika kunyamo wo 1914.
c Oco o kuate elomboloko likuavo liatiamẽla kovisila via Yehova ndomo via tẽlisa ocipango caye, tanga Utala Wondavululi 1 ya Kayovo yunyamo wo 1989, kemẽla 10 toke 15, kelimi Lioputu.
Oku Pitulula Atosi Tua Lilongisa
• Momo lie Yehova a lulikila oluali loku kapamo omanu?
• Momo lie Omõla wongunga wa Yehova eyilila palo posi oco a setekiwe toke kolofa?
• Momo lie Yehova a nolela omanu vamue oco vaka viale la Kristu kilu?