Olomapalo Vimue Vi Nena esanju
“Ndaño wu lia, ndaño wu nyua, cosi wu linga ci lingili ulamba wa Suku.” —1 VA KORINDO 10:31.
1, 2. Momo lie olomapalo vi sanjuisa utima via lingila ‘ombanjaile ya tunda ku Suku’? Embimbiliya lieca elungulo lipi?
CA sunguluka oku linga olomapalo vimue vi nena esanju. Yehova Suku yetu ukuesanju, o yongola okuti, tu sanjuka. Eye, wa tu ĩha ovina viosi viecelela oku kuata esanju komuenyo. (1 Timoteo 1:11; 6:17) Soma Salomone wa popia hati: “Nda kũlĩha okuti, [komunu] ka kuli ocina ca velapo okuti oku sanjuka loku kala ciwa. . . . ci sule. Nda kũlĩhavo okuti, nda omunu o lialia kuenda o nyuanyua . . . loku sanjukila upange waye wosi, cosi eci ocali ca tunda ku Suku.”—Ukundi 3:12, 13.
2 Oku sokolola esumũlũho li tunda kovopange etu, ci nena esanju. Capiãla enene eci tu kala pamosi lepata kuenda akamba vetu. Esanju liaco, ‘ombanjaile yimue ya tunda ku Suku.’ Pole, ombanjaile yaco, ka yi tu ĩha omoko yoku linga olomapalo vina ka via sungulukile. Embimbiliya li tu lungula oku yuvula uholua lukahonga. Olio li popia okuti, ava va lingainga ovina viaco “ka va piñala usoma wa Suku.”—1 Va Korindo 6:9, 10; Olosapo 23:20, 21; 1 Petulu 4:1-4.
3. Nye ci tu kuatisa oku pamisa ekalo lietu kespiritu loku ivaluka eteke linene lia Yehova?
3 Koloneke vilo via sulako, Akristão va siata oku liyaka lovitangi vioku yuvula ovituwa violuali. (Yoano 17:15, 16) Ndomo Embimbiliya lia ci popele, koloneke vilo omanu “va linga vakuakusola calua esanju okuti Suku ci sule.” Kuenda ka va lete ondimbukiso yohali yapiãla’ tu kasi oku lavoka. (2 Timoteo 3:4, 5; Mateo 24:21, 37-39) Yesu wa lungula olondonge viaye hati: “Lilavi sanga ovitima viene vi vulua [lovina vioku lia,] luholua kuenda ovikele viomuenyo wokilu lieve, kuenje eteke liaco liu wili ocipikipiki ndulivi.” (Luka 21:34, 35) Etu tumanu va Yehova, tua nõlapo oku pokola kelungulo lia Yesu. Tua litepa lomanu vana ka va pokola ku Suku. Momo tua kũlĩha okuti, eteke lia Yehova li kasi ocipepi. Omo liaco, tu likolisilako oku pamisa ekalo lietu kespiritu loku ivaluka eteke linene lia Yehova.—Sofoniya 3:8; Luka 21:36.
4. (a) Momo lie ka ca lelukile oku nola olomapalo via sunguluka? (b) Elungulo lipi tu sanga kelivulu lia Va Efeso 5:15, 16, okuti olio tu sukila oku kuama?
4 Oku yuvula ovituwa violuali ka calelukile. Momo Satana wa siata oku posuisa ovina viaco okuti vi vetiya utima kuenda wa leluisa onjila yoku vi sanga. Capiãla enene ovina viatiamẽla kolomapalo. Kuli olomapalo vialua vi kasi voluali, vi vetiya lika ‘oloñeyi vietimba.’ (1 Petulu 2:11) Olomapalo vina ka via sungulukile, vi sangiwa kovitumãlo viowiñi. Pole, citava okuti vitualiwa volonjo vietu lekuatiso lialivulu, kuenda otelevisão. Omo liaco, Embimbiliya li lungula Akristão hati: “Endaendi lutate nda vakualondunge. Kolisiko oku yukisa oloneke viene leci cesunga, momo oloneke vilo via vĩha.” (Va Efeso 5:15, 16) Nda tua pokola kelungulo eli, tuka tẽla oku yuvula olomapalo vina vi pesela otembo haivio vi nyola ukamba wetu la Yehova.—Tiago 1:14, 15.
5. Nye ci tu ĩha esanju liavelapo?
5 Ocili okuti, Akristão va kuete asakalalo alua komuenyo. Pole, va kũlĩha okuti, va sukila oku sokiya otembo yoku linga olomapalo. Elivulu Liukundi 3:4, li popia hati: ‘Kuli eteke lioku yola kuenda eteke lioku piluka.’ Embimbiliya ka li lombolola okuti, otembo yolomapalo ka yi kuete esilivilo. Pole, tu sukila oku linga olomapalo vina vi nena esanju okuti ka vi nyõli ekalo lietu kespiritu kuenda ka vi tateka upange wa Yehova. Akristão va loñoloha, va kũlĩha okuti, esanju lia piãla li tunda koku kuatisa vakuetu. Ovo va pitisa kovaso ocipango ca Yehova kuenje, omo lioku likapa okanga ya Yesu‘va sanga ekavuluko komuenyo wavo’.—Mateo 11:29, 30; Ovilinga 20:35.
Oku Nõla Olomapalo Via Sunguluka
6, 7. Nye ci ku kuatisa oku kũlĩha olomapalo via sunguluka levi vĩvi?
6 Akristão va tẽla ndati oku limbuka olomapalo via sunguluka? Olonjali, vi kuete ocikele coku kuatisa omãla vavo oco va nõle olomapalo via sunguluka. Akulu vekongelo va sukilavo oku eca ekuatiso. Ka tu sukila lika oku kevelela kuvakuetu oco va tu sapuile ovina ka via sungulukile ndeci: alivulu, olosinema, olomiluko kuenda ovisikilo. Paulu wa popia hati, ‘omanu vana va loñoloha kespiritu, va kuete olondunge vioku tepisa pokati keci ciwa leci cĩvi. Momo olondunge viavo via pindisua.’ (Va Heveru 5:14; 1 Va Korindo 14:20) Embimbiliya li kuete olonumbi vi pondola oku tu kuatisa. Omo liaco, olondunge viove via pindisiwa Londaka ya Suku, vi ku kuatisa oku linga eci ca sunguluka.—1 Timoteo 1:19.
7 Yesu wa popia hati: “Uti u limbukiwila kepako liawo.” (Mateo 12:33) Tu sukila oku yuvula olomapalo vina mu iñila ungangala, ukahonga kuenda umbanda. Tu sukilavo oku yuvula olomapalo vi kapa kohele omuenyo wa vakuetu ale uhayele wavo. Handi vali, tu sukilavo oku yuvula olomapalo vina vi pesela olombongo ale oku kapela vakuetu ocilondokua. Upostolo Paulu wa tu lungula okuti, nda tua kapela vakuetu ocilondokua, tu linga ekandu. Eye wa, popia hati: “[Eci wu] lingila vamanji akandu, loku valula ovitima viavo ka via kolele, wu lingila Kristu ekandu. Nda oku lia ositu ku konyuisa manjange, sili vali ositu oloneke viosi, sanga ñonyuisa manjange.”—1 Va Korindo 8:12, 13.
8. Ohele yipi yi kasi koku tala olomapalo vina ka via sungulukile?
8 Kovitanda ku sangiwa ovina vialua violomapalo. Vimue pokati kavio via sunguluka kuenda vi nena esanju. Pole, vikuavo, vi lekisa lika ovina ka via sungulukile haivio vi pisiwa Lembimbiliya. Tu sukila oku yuvula olomapalo viosi vi vetiya oku lilemẽha, loku liponda, kuenda ukahonga. Yehova ‘onyale omanu va sole ungangala.’ (Osamo 11:5; Olosapo 3:31; Va Kolosai 3:5, 6) Omo liaco, nda wa limbuka okuti, olomapalo viove vi vetiya oku kala ukuacipululu, lungangala, ale vi pesela otembo, yuvula ovina viaco. Momo vi pondola oku nyõla ekalo liove kespiritu.—Mateo 18:8, 9.
Linga Olomapalo Via Sunguluka
9, 10. Nye ci kuatisa omunu oku nõla olomapalo viwa?
9 Olonjanja vimue Ukristão o sukila oku li pulisa ndoco: ‘Olomapalo vipi via sunguluka? Oluali lueyuka olomapalo vialua vi vetiya oku tomba olonumbi via Suku.’ Omo liaco, ka ca lelukile oku sanga olomapalo via sunguluka. Pole, olonjali vi sukila oku linga eliangiliyo liwa. Capiãla enene konepa yolomapalo. Valua va siata oku kuata esanju poku lingila kumosi olomapalo lepata liavo kuenda la vamanji vekongelo. Okulia kumosi lavakuetu osimbu tu lombolola ovolandu etu ale ovolandu amue Embimbiliya, ci pamisa ekolelo lietu. Olonjali vimue via siata oku enda lomãla vavo kovisenge via posoka ale kolomunda. Ovo va tunga ovilombo loku ambata okulia kuavo. Olomapalo viaco, via siata oku nena esanju kepata.
10 Ukulu umue wekongelo lukãi waye okuti va kuete omãla vatatu, wa popia hati: ‘Omãla vetu tunde vutila wavo, tua siata oku va ĩha epuluvi lioku nõla oku va yongola oku enda kotembo yetu yepuyuko kovopange. Olonjanja vimue, tu va ecelela oku nola akamba vawa va yongola okuti tu enda lavo kolomapalo. Ovo va ivaluka ovipito vimue viwa tua siata oku linga. Momo olonjanja vimue tu laleka vangandietu, lakamba vamue vekongelo okuti veya konjo yetu. Kuenje tulila kumosi lavo loku linga olomapalo. Olonjanja vimue tu enda kolomunda. Kuenje apuluvi aco a siata oku tu longisa ovina vialua viatiamẽla kovopange a Yehova.’
11, 12. (a) Nye o sukila oku linga oco volomapalo viove o kongelemo vakuene? (b) Olomapalo vipi via siata oku lingiwa okuti vamanji va vivaluka olonjanja viosi?
11 Eci o sokiya oku linga olomapalo lepata, citava okuti o kongelamo vamanji vamue vekongelo ndeci: Ovimbumba, vana ka va kuelele, kuenda vana va kasi oku tekula omãla likaliavo. Momo va sukila ekoliso. (Luka 14:12-14) Handi vali, o pondolavo oku kongelamo vana va fetika ndopo oku lilongisa Embimbiliya. Pole, o sukila oku lunguka okuti vakuene ku va kapi vukamba umue ka wa sungulukile. (2 Timoteo 2:20, 21) Nda vekongelo muli vamanji vamue va vela okuti ka va tẽla oku enda, citava okuti o va nenela okulia konjo yavo.—Va Heveru 13:1, 2.
12 Okulia la vamanji loku yevelela ovolandu avo ndomo va linga Akristão, leci ci kasi oku va kuatisa oku pandikisa kupange wa Yehova, ca siata oku pamisa vamanji valua. Kapuluvi aco poku sapela, citava okuti tu tukulavo ovinimbu vimue Viembimbiliya loku kongelamo omãla vombangulo yaco. Nda tua ci linga, tu pamisa ekolelo liavo okuti lomue o sumua.
13. Yesu la Paulu va lekisa ndati ongangu yoku yekisa akombe? Kuenda va lekisa ndati ongangu yoku tava oku yekisiwa?
13 Yesu wa sia ongangu yiwa yoku yekisa akombe kuenda oku tava oku yekisiwa. Vapuluvi aco, wa enda loku kuata otembo yoku longisa ovina viespiritu ku vakuavo. (Luka 5:27-39; 10:42; 19:1-10; 24:28-32) Olondonge viaye, via kuamelevo ongangu yaco. (Ovilinga 2:46, 47) Paulu wa popia hati: “Ndi livela oku u moli okuti ndu muisi ocali cimue cespiritu coku vu kolisa. Ca lomboloka okuti, oku sanga evelo lioku likolisa pokati, okuti ekolelo liene li ñuatisa ame, kuenda ekolelo liange liu kuatisi ene.” (Va Roma 1:11, 12) Eci tu linga olomapalo, tu sukila oku lombolola ovolandu ovina viespiritu kuenda oku livetiya pokati la vamanji.—Va Roma 12:13; 15:1, 2.
Olonumbi Vimue tu Sukila Oku Ivaluka
14. Momo lie tu sukilila oku yuvula oku laleka vamanji valua poku linga olomapalo?
14 Poku sokiya olomapalo, tu sukila oku yuvula oku laleka omanu valua. Momo ka ca lelukile oku va songuila. Olonjali citava okuti, vi sokiya olomapalo kapuluvi a sunguluka okuti, ka vi tateka ovina viespiritu. Kuenda olomapalo viaco ka vi vetiya oku livelisapo. Nda poku linga olomapalo tua lalekavo akulu vekongelo kumue loloñuatisi viavo, kuenda vamanji vana va loñoloha kespiritu, ovina viaco vienda ciwa. Kuenje vosi va kasi polomapalo viaco, va kuata esanju lia piãla.
15. Momo lie tu sukilila oku lavulula poku laleka vakuetu konjo yetu?
15 Vamanji vana va linga eliangiliyo liolomapalo, va sukila oku lavulula lutate. Ndaño okuti, ove wa lekisa ocali poku laleka vakuene, citava okuti o sumua. Momo pamue o yeva ondaka yokuti, ovina vimue via lingiwa konjo yove via kokela manji umue ocilondokua. Tu konomuisi onumbi ya tukuiwa kelivulu Liesinumuĩlo 22:8. Kotembo ya va Isareli, nda umue pokati kavo wa tunga onjo, wa sukilile oku kapa okacimbaka kilu lionjo yaco. Momo lie? Momo nda umue o londako kuenje o kupuka, ‘o vetisa onjo yaye eko liosonde.’ Cimuamue haico o sukila oku linga poku laleka akombe. Yuvula oku tumbika ovihandeleko viatĩla ku vakuene. Pole, lekisa esumbilo kokuavo kuenda oku teyuila ekalo liavo kespiritu.
16. Nye tu sukila oku linga nda poku laleka vakuetu tua sokiya oku eca ovina vioku nyua vi koluisa?
16 Nda poku laleka vakuetu tua sokiya oku eca ovina vioku nyua vi koluisa, tu sukila oku kũlĩha ndomo tu vieca kokuavo. Akristão vamue va siata lika oku eca kakombe evi vi koluisa nda va kuete epondolo lioku lavulula ndomo va nyua. Omo liaco, tu sukila oku yuvula oku kapela vakuetu ocilondokua ale oku pitãhala vonjongo. (Va Efeso 5:18, 19) Kuli akombe vamue okuti pamue ka va yongola oku nyua ovina vikoluisa omo liovitangi vimue. Kolofeka vimue kuli ocihandeleko ci lekisa anyamo omunu a sesamela oku fetika oku nyua evi vi koluisa. Olonjanja vimue ka ca lelukile oku pokola kocihandeleko caco. Pole, Ukristão o sukila oku likolisilako oku pokola ocihandeleko caco.—Va Roma 13:5.
17. (a) Nda poku linga olomapalo lavakuetu, tua sokiya ovisikilo, momo lie ci kuetele esilivilo oku nõla lutate? (b) Nda vamanji va yongola oku piluka, va pondola ndati oku lekisa esunguluko?
17 Omanu vana va lalekiwa, va sukila oku kũlĩha ovisikilo, lolomiluko, kuenda olomapalo vina ka via sungulukile Kakristão. Ocili okuti, omunu lomunu o kuete ovisikilo a sole. Kuenda, kuli ovisikilo vialua via litepa. Pole, koloneke vilo ovisikilo vialua via siata voluali, vi vetiya lika esino, lukahonga kuenda ungangala. Omo liaco, Akristão va sukila oku kũlĩha ovisikilo via sunguluka. Ovisikilo viwa, ka vi lomboloka lika vina vi sikiwa levando. Ovio, vi limbukiwila kolondaka viaco okuti, ka vi vetiya evĩho kuenda ka vi siki lombuanja. Omo liaco, yuvula oku eca ocikele coku nõla ovisikilo komunu una ka kuete elomboloko liolonumbi Viembimbiliya. Kuenda kuka ece ocikele caco komunu una ka kũlĩhĩle oku sika levando. Akristão va sukila oku yuvula olomiluko vina ka via sungulukile.—1 Timoteo 2:8-10.
18. Olonjali vi tẽla ndati oku teyuila omãla vavo poku lavulula olomapalo viavo?
18 Nda omãla va lalekiwa kocipito cimue, olonjali vi sukila oku kũlĩhĩsa ocipito caco. Handi vali, olonjanja vimue vi sukilavo oku enda lavo. Pole, olonjali vimue via siata oku ecelela omãla vavo oku enda kovipito vina ka vi kuete usongui umue wa sunguluka. Kuenje va siata oku wila vukahonga kuenda vovina vikuavo vĩvi. (Va Efeso 6:1-4) Ndaño okuti amalẽhe va kuete ale olondunge, va sukila ekuatiso oco va yuvule “oloñeyi viamalẽhe.”—2 Timoteo 2:22.
19. Nye ci tu kuatisa oku pitisa kovaso ovina viespiritu?
19 Oku linga olomapalo viwa, ci sanjuisa utima. Yehova ka tu tateka oku kuata esanju. Pole tu sukila oku ivaluka okuti, olomapalo ka vi tu kuatisa oku seleka ukuasi wespiritu kilu. (Mateo 6:19-21) Yesu wa vetiya olondonge viaye oku kuata elomboloko lioku pitisa kovaso ‘usoma wa Yehova kuenda esunga liaye.’ Momo oyo onjila yavelapo komuenyo. Pole, va sukila oku yuvula oku sakalala lovina vioku lia levi vioku nyua kuenda uwalo. Momo “ovina viaco ovio vakualofeka va sakalala ño lavio oku vi sanda.”—Mateo 6:31-34.
20. Akristão vocili, va pondola oku sanjukila nye ci tunda kocali ca Yehova?
20 ‘Ndaño tu lia, ale tu nyua, cosi tu linga, tu ci lingili ulamba wa Yehova.’ Momo Eye wa siata oku tu ĩha ovina viosi vi nena esanju komuenyo. (1 Va Korindo 10:31) Voluali luokaliye, omanu vosi va sandiliya esunga, vaka kuata epuluvi lioku sanjukila ovina vialua vi tunda kocali ca Yehova.—Osamo 145:16; Isaya 25:6; 2 Va Korindo 7:1.
Ivaluka Eci Tua Lilongisa?
• Koloneke vilo momo lie ka ca lelukile Ukristão oku nola olomapalo via sunguluka?
• Olomapalo vipi via siata oku nena esanju Kakristão?
• Eci tu linga olomapalo la vakuetu, olonumbi vipi tu sukila oku ivaluka?
[Elitalatu kemẽla 24]
Nõla olomapalo via sunguluka
[Elitalatu kemẽla 25]
Olomapalo vipi Ukristão a sukila oku yuvula?