Olombuavekua Vimue Via Vokiyiwa Kosungu Yolombangi via Yehova
KETEKE lia 24 kosãi Yenyenye yunyamo wo 2005 Votatu komẽle, kofeka yo Estados Unidos kuenda ko Kanada, epata Liombetele lia yeva esapulo limue liwa lia lekisiwa Votelevisão yavo. Esapulo liaco, lia lekisa okuti, kosãi Yenyenye Linene yunyamo wo 2005, kocisoko Cosungu Yolombangi via Yehova, kua vokiyiwa vamanji vamue vavali olombuavekua. Olonduko viavo vievi: Manji Geoffrey. W. Jackson kuenda Anthony Morris III.
Manji Jackson wa fetika upange wakundi votembo yosi kunyamo wo 1971 kosãi ya Kayovo kofeka yo Austrália kocifuka co Tasmania. Kunyamo wo 1974 kosãi Yevambi, wa kuela manji umue o tukuiwa hati, Jeanette. Noke, va tambula ocikele coku talavaya kupange wakundi va likasi. Tunde kunyamo wo 1979 toke wa 2003, va talavaya kupange wumisionariu kofeka yo Pasifiku Sul, kovifuka vimue ndeci: Ko Tuvalu, ko Samoa, kuenda ko Fiji. Eci manji Jackson lukãi waye va kala kovifuka viaco, va kuatisa calua kupange woku pongolola alivulu vukuenje wa lunguka valimi akuavo. Kunyamo wo 1992, manji Jackson wa talavaya Kocisoko Cakulu voseketa Yolombangi via Yehova kocifuka co Samoa. Kunyamo wo 1996, wa tambula ocikele coku talavaya Kocisoko Cakulu voseketa Yolombangi via Yehova kocifuka co Fiji. Noke kunyamo wo 2003 kosãi ya Kupupu, eye lukãi waye, va tambula ocikele coku tiamẽla kepata Liombetele kofeka yo Estados Unidos. Kuenje va fetika oku talavaya Voseketa Yupange woku pongolola alivulu valimi akuavo. Eci papita otembo yimue, manji Jackson wa noliwa oco a linge oñuatisi Yosungu Yolombangi via Yehova Kocisoko Celongiso.
Manji Morris wa iñila kupange wakundi votembo yosi kunyamo wo 1971 kofeka yo Estados Unidos. Kosãi ya Cembanima yunyamo waco, wa kuela manji umue o tukuiwa hati, Susan. Ovo vamamako lupange wavo vokuenda kuanyamo akuãla toke eci va cita omõlavo watete o tukuiwa hati, Jesse. Eci papita otembo yimue va cita omõla ukuavo o tukuiwa hati, Paul. Kuenje va liwekapo kupange wavo wakundi votembo yosi. Kunyamo wo 1979, manji Morris wa lisonehisa kupange wakundi va velapo. Eci omãla va fetika oku tanga kosikola, ukãi waye wa iñilavo kupange waco. Noke va lieca kupange woku kuatisa kovikanjo ku sukila ekuatiso lialua. Kuenje va talavaya kocifuka co Rhode Isaland kuenda konepa Yonano yolupale luo Karolina, kofeka yo Estados Unidos. Eci va kala kofeka yaco, manji Morris wa talavaya ndoñuatisi yi nyula akongelo vimbo. Omãla vavo va talavaya kupange wakundi va velapo. Eci omõlavo Jesse kuenda Paul, va tẽlisa 19 kanyamo, va iñila kupange wo Kombetele. Eci papita otembo yimue, manji Morris wa tambula ocikele coku nyula akongelo vimbo. Kunyamo wo 2002, eye kumue lukãi waye, va tambula elaleko lioku talavaya Kombetele. Ovo va fetika upange waco keteke liatete kosãi Yenyenye. Manji Morris wa talavaya Voseketa Yupange ko Patterson. Noke, wa noliwa oco a linge oñuatisi Yosungu Yolombangi via Yehova Kocisoko Cupange.
Vamanji tua tukula ndeti, va vokiyiwa Kocisoko Cosungu Yolombangi via Yehova. Cilo vamanji vatiamẽla kocisoko caco vava: C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane kuenda D. Sydlik. Vosi yavo va tiamẽla kocisoko Cakristão olombuavekua.