Ove Hẽ Wa Liangiliya Oco O popeliwe?
“Iñila vocimbaluku, ove lonjo yove yosi, momo nda mõla okuti vocitumbulukila cilo ove wukuesunga kokuange.”—EFETIKILO 7:1.
1. Eliangiliyo lipi lioku popela omanu Yehova a lingile kotembo ya Noha?
KOTEMBO ya Noha, Yehova wa ‘nenele etande komanu vosi va tomba ovihandeleko viaye.’ Pole, wa linga eliangiliyo lioku popela vana va pokola kokuaye. (2 Petulu 2:5) Yehova wa ecele ku Noha olonumbi vioku tunga ocimbaluku oco omanu va popeliwe ketande va kala oku lavoka. (Efetikilo 6:14-16) Ndomo tua ci kũlĩha, Noha wa kala omunu umue ukuesunga. Kuenje ‘wa linga cosi Suku o sapuila.’ Omo liepokolo liaye, cilo tu kasi lomuenyo.—Efetikilo 6:22.
2, 3. (a) Omanu vo kotembo ya Noha va tendele ndati upange waye? (b) Noha wa kuatele ekolelo lie eci a iñila vocimbaluku?
2 Ka ca lelukile ku Noha oku tunga ocimbaluku. Omanu va komohẽle calua upange Noha a kala oku linga kumue lepata liaye. Pole, upange waco ka wa va vetiyile oku tava okuti, va sukilile oku iñila vocimbaluku oco va popeliwe. Kuenje, epandi Yehova a kuatela omanu vaco, lia sulila.—Efetikilo 6:3; 1 Petulu 3:20.
3 Noha lepata liaye, va pita anyamo alua oku tunga ocimbaluku. Noke, Yehova wa sapuila Noha hati: “Iñila vocimbaluku, ove lonjo yove yosi, momo nda mõla okuti vocitumbulukila cilo ove wukuesunga kokuange.” Omo lioku pokola kondaka ya Yehova, “Noha wa iñila vocimbaluku kumue lomãla vaye valume, lukãi waye, [kuenda] akãi vomãla vaye.” Noke, Yehova wa yika epito liocimbaluku oco a popele omanu vaye. Eci Etande lieya, omanu va kala vocimbaluku ovo lika va popeliwa.—Efetikilo 7:1, 7, 10, 16.
Tu Kasi Kotembo Ndeyi ya Noha
4, 5. (a) Yesu okuiya kuaye wa ku sokisa la nye? (b) Omanu vo kotembo ya Noha va kuata ovituwa vipi okuti vi letiwevo koloneke vilo?
4 Embimbiliya li popia hati: “Ndeci ca kala koloneke via Noha haico ci kala eci Mõlomanu a tukuluka.” (Mateo 24:37) Lolondaka evi, Yesu wa lekisa okuti, okuiya kuaye ku sokisiwa loloneke via Noha. Tunde kunyamo wo 1919, Olombangi via Yehova vi kasi oku eca esapulo lioku lungula omanu kolofeka viosi ndeci Noha a lingile. Ndeci ca kala kotembo ya Noha haico ci kasi oku pita koloneke vilo. Momo onepa yalua yomanu, ka va tava oku yeva kesapulo Liusoma.
5 Omo liungangala wa kala voluali, Yehova wa ‘nyõla omanu’ Letande. (Efetikilo 6:13) Kotembo yaco, omanu va mola okuti, Noha kumue lepata liaye va yuvula oku kuata onepa kungangala. Kuenje va litumbikile lika kupange woku tunga ocimbaluku. Cimuamue haico ci kasi oku pita koloneke vilo. Omanu vana vakuavitima via sunguluka, va siata oku ‘kũlĩha oku tepisa pokati keci ciwa leci cĩvi, loku tepisa ava va vumba Suku lava ka vovumbi.’ (Malakiya 3:18) Ovituwa Violombangi via Yehova ndeci: Esunguluko, ohenda, ombembua kuenda ombili yavo, via siata oku muiwa lomanu valua. Kuenda vieca uvangi woku litepa kuavo loluali. Olombangi via Yehova, vi yuvula ungangala kuenda viecelela oku songuiwa lespiritu lia Yehova. Eli olio esunga lieci va kuetele ombembua kuenda va kuama lika onjila ya sunguluka.—Isaya 60:17.
6, 7. (a) Omanu vo kotembo ya Noha ka va kapeleko nye? Kuenda nye ca siata oku muiwa koloneke vilo? (b) Ovolandu api a lekisa okuti omanu va siata oku limbuka okuti Olombangi via Yehova via litepa latavo akuavo?
6 Omanu vo kotembo ya Noha, ka va limbukile okuti Noha wa kala oku kuatisiwa la Yehova. Kuenda wa kala oku pokola kolonumbi viaye. Ovo ka va pokuile kesapulo lielungulo Noha a kala oku va kundila. Kuenda ka va simĩle okuti li kuete esilivilo. Koloneke vilo, omanu va siata oku tenda ndati Olombangi via Yehova kuenda esapulo va siata oku kunda? Vamue ndaño okuti, va komoha upange Wolombangi via Yehova kuenda ovituwa viavo viwa, pole, ka va tava kolondaka viwa. Kuenda ka va tava kelungulo Liembimbiliya. Citava okuti omanu vo posongo yetu, akamba vetu kupange, kuenda vakuepata lietu, va tu pandiya omo liovituwa vietu viwa. Pole, ka va tu sole omo lioku kala Olombangi via Yehova. Ovo va siata oku limbuka ovituwa vietu viwa ndeci: Ocisola, ombembua, epandi, umbombe kuenda esuluviko. Momo Yehova eye o kasi oku tu songuila lespiritu liaye. (Va Galatia 5:22-25) Ovituwa viaco ovio vi vetiya omanu oku tava kesapulo Liusoma.
7 Kofeka yo Rusia, otembo yimue Olombangi via Yehova via kala oku tunga Onjango Yusoma. Ulume umue wa kala oku pita onjila, wa vangula la manji umue wa kala kupange waco hati: ‘Upange wene u komõhisa calua. Momo pokati kene lomue o sipa, kuenda lomue o popia lãvi ukuavo. Vosi yene wa sunguluki. Anga hẽ Ulombangi via Yehova? Manji wo tambulula hati: Nda nda ku sapuila okuti, Simbangiko ya Yehova, o tava kondaka yange? Eye wa tambulula hati: Sio, sitava.’ Volupale lukuavo kofeka yo Rusia, usongui umue wa komoha calua eci a limbuka okuti Olombangi via Yehova via tunga Onjango yavo Yusoma. Eye wa lombolola hati, nda simile okuti atavo osi a kuete ovituwa vimuamue. Noke lioku mola ovituwa Violombangi via Yehova lombili yavo kupange, wa siapo ovisimĩlo viaco vĩvi. Ovolandu ava, a lekisa okuti, Olombangi via Yehova via litepa lomanu vana ka va pokola kolonumbi Viembimbiliya.
8. Nye tu sukila oku linga oco tu popeliwe kesulilo lioluali lulo?
8 Osimbu handi Etande ka lieyile Noha wa kunda ondaka ya Suku lekolelo. (2 Petulu 2:5) Koloneke vilo via sulako, Olombangi via Yehova vi kasivo oku sapula komanu olonumbi via Yehova viesunga. Kuenda va kasi oku va kundila olondaka viwa oco va popeliwe okuti va iñila voluali luokaliye. (2 Petulu 3:9-13) Noha lepata liaye va popeliwa omo lioku iñila vocimbaluku. Cimuamue haico cika pita keteke lia Yehova. Oco omanu va popeliwe, va sukila oku kuata ekolelo kuenda oku tiamẽla kocisoko caye ca palo posi.
Oco tu Popeliwe tu Sukila Oku Kuata Ekolelo
9, 10. Momo lie tu sukilila oku kuata ekolelo nda tu Yongola oku popeliwa kesulilo lioluali lulo lua Satana?
9 Nye omunu a sukila vali oku linga oco a popeliwe kesulilo lioluali lulo lu kasi peka lia Satana? (1 Yoano 5:19) Eye o sesamẽla oku kuata elomboloko liovina vi sukiliwa kuenda oku pokola kolonumbi viaco. Omanu vo kotembo ya Noha, va litumbikile lika kovopange avo. Kuenje ka va limbukile ocilunga ca kala okuiya. Momo ka va kuatele ekolelo ku Suku.
10 Noha kumue lepata liaye, va limbukile eci va sukilile oku linga oco va puluke Ketande. Ovo va kuatele ekolelo ku Yehova Ombiali Yoluali Luosi. Paulu wa popia hati: “Oku sunguluka ku Suku ka ku tẽliwa te lekolelo. Momo wosi o yongola oku kolela ku Suku, co sesamẽla oku kolela okuti kuli Suku, kuenda okuti Suku eca onima kuava vo sanda.” Noke wamisako hati: “Noha, omo a kala lekolelo, eci a lunguiwila ovina ka via molehele handi, wa kuata ohele, yu wa angiliya ocimbaluku coku popela onjo yaye, oco wa pisa oluali kuenje wa linga kapiñala kesunga lina liya lekolelo.”—Va Heveru 11:6, 7.
11. Nye tu lilongisa keliangiliyo Yehova a lingile kosimbu lioku popela omanu vaye?
11 Oco tu popeliwe kesulilo lioluali lulo, ka tu sukila lika oku tava okuti oluali lulo luka nyolẽha. Tu sukilavo oku kuata ekolelo poku kapako eliangiliyo lia Yehova liatiamẽla koku popeliwa. Handi vali, tu sukilavo oku kuata ekolelo kocilumba cocisembi ca Yesu Kristu. (Yoano 3:16, 36) Tu sukila oku ivaluka okuti, koloneke via Noha omanu va kala vocimbaluku, ovo lika va puluka Ketande. Cimuamue haico ca pita kotembo ya va Isareli. Ovo va kuatele alupale amue okuti, nda omunu umue wa ponda ukuavo pole, ka ci lingile ocipango, omo a tilila oco a popele omuenyo waye. Kuenje o kala volupale luaco toke poku fa kuocitunda cinene. (Atendelo 35:11-32) Koloneke via Mose volupale luo Egito mua pitile afengi alua. Efengi liekũi lia ponda olonuñulu viosi viomãla valume va Egito. Pole, olonuñulu via va Isareli via popeliwa. Momo lie? Momo Yehova wa sapuilile Mose hati: “[Va Isareli va] nyañule osonde yimue [yokameme ko Paskua], va yi nyile kovikuli vivali lokovipamba violonjo omu va [lila o Paskoa yaco]. . . . Pokati kene lomue ka ka pite vuvelo wonjo yaye toke komẽle.” (Etundilo 12:7, 22) Ocili okuti va Isareli va kuatele olonuñulu vialua. Anga hẽ ovo nda va tomba olonumbi via Yehova poku tundila posamua yonjo ya kapiwa ondimbukiso yosonde kovikuli?
12. Apulilo api omunu lomunu a sukila oku linga kuenda momo lie?
12 Etu tu sukilavo oku sokolola ekalo lietu. Tu kasi hẽ veliangiliyo lia Yehova lioku popeliwa? Eci ohali ya piãla yikeya, omanu vosi va sandiliya ekuatiso lia Yehova, vaka kuata asuẽlela esanju. Kuenda vaka eca olopandu ku Yehova. Pole, vakuavo vaka lila omo liesino liavo.
Apongoloko a tu Kuatisa Oku Liangiliya
13. (a) Momo lie Yehova a siatela oku linga apongoloko vocisoko caye ca palo posi? (b) Lombolola apongoloko amue a lingiwa vokuenda kuotembo.
13 Yehova wa siata oku linga apongoloko alua konepa yespiritu vocisoko caye palo posi. Apongoloko aco a siata oku pamisa eliangiliyo liaye lioku tu teyuila konepa yespiritu. Okupisa kunyamo wo 1870 toke wo 1932, vakongelo Olombangi via Yehova, akulu vekongelo kuenda oloñuatisi viavo, va enda oku nõliwa loku linga ocela vekongelo. Kunyamo wo 1932 akulu vekongelo va nõliwile locela, va piñanyiwa locisoko cakulu vekongelo olomitavaso viupange. Ovo va kuata ocikele coku kuatisa ukulu wekongelo mitavaso. Okupisa kunyamo wo 1938, Olombangi via Yehova via liwekapo oku linga ocela coku nõla akulu vekongelo loloñuatisi viavo. Tunde kunyamo wo 1972, akulu vekongelo loloñuatisi viavo, va siata oku nõliwa lekuatiso liolonumbi Viembimbiliya kuenda Viocisoko cakulu Volombangi via Yehova. Nda Oseketa ya tava oku nõliwa kuomanu vaco, akongelo va tambula ovikanda viaco. Vokuenda kuanyamo, upange Wocisoko Cosungu Yolombangi via Yehova wa siata oku livokiya. Kuenje apongoloko aco a siata oku leluisa upange wavo.
14. Esokiyo lipi liepindiso lia lingiwa okupisa kunyamo wo 1959?
14 Okupisa kunyamo wo 1950, noke yoku konomuisa ciwa Osamo 45:16, kua lingiwa eliangiliyo lioku pindisa vamanji. Osamo yaco yi popia hati: “Polosekulu viove pa piñala omãla vove. Va linga olombuale volofeka viosi violuali.” Koloneke vilo, akulu vekongelo, va kasi oku pindisiwa oco va tẽlise ovikele viavo cilo, kuenda noke yo Harmagedo. (Esituluilo 16:14, 16) Osikola Yupange Wusoma, ya fetika kunyamo wo 1959. Kotembo yaco, osikola yaco ya enda oku eciwa lika kakulu vekongelo olomitavaso. Oyo ya enda oku pita osãi yimosi. Pole, cilo ya siata oku eciwa kakulu vosi vekongelo kuenda oloñuatisi viavo. Vamanji vana va pita vosikola yaco, va siatavo oku pindisa vakuavo va sangiwa vakongelo. Omo liaco, omanu vosi va Yehova va siata oku kuatisiwa oco va loñolohe kupange woku kunda olondaka viwa Viusoma.—Marko 13:10.
15. Olonjila vipi vivali vioku teyuila ekongelo?
15 Omanu vosi va yongola oku tiamẽla vocisoko ca Yehova, va sukila oku pokola kolonumbi viaye. Kotembo ya Noha, omanu vana va tombele ondaka ya Suku ka va kuatele epuluvi lioku iñila vocimbaluku. Cimuamue haico ci kasi oku pita koloneke vilo. Omanu vana va tomba ondaka ya Yehova, ka va kala vocisoko Caye. (2 Petulu 3:3-7) Tunde kunyamo wo 1952, va manji va siata oku tambula ekuatiso lioku teyuila ekongelo poku tundisa vana va lueya okuti, ka va yongola oku likekembela. Pole, vana va likekembela, va kuatisiwa oco va pokole kolonumbi via Yehova.—Va Heveru 12:12, 13; Olosapo 28:13; Va Galatia 6:1.
16. Omanu va Yehova va kasi ndati konepa yespiritu?
16 Ekalo liwa liomanu va Yehova konepa yespiritu, ka lieyile ño olio muẽle. Vonduko yuprofeto Isaya Yehova wa popele hati: “Tala, akuenje vange va lia, ene puãi vu kala lonjala. Tala, akuenje vange va nyua, ene puãi vu kala lenyona. Tala, akuenje vange va sanjuka, ene puãi vu kutisua osõi. Tala akuenje vange, omo ovitima viavo via sanjuka, va imba ovisungo, ene puãi, omo ovitima [viene] via sumua, vu lila, kuenje, omo ovitima vi kasi loku teka, vu liyula.” (Isaya 65:13, 14) Yehova o kasi oku tu ĩha okulia kualua kuespiritu ku pamisa ekolelo lietu kokuaye.—Mateo 24:45.
Liangiliya Oco o Popeliwe
17. Nye cika tu kuatisa oku li pongiya oco tu popeliwe?
17 Yilo oyo otembo yoku ‘sokolola ndomo tu tẽla oku livetiya pokati loku kala locisola lovilinga viwa. Ka tuka liwekipo oku ongoloka ndomo vamue va siata oku ci linga. Pole, tu li kuatisi pokati lalungulo.’ (Va Heveru 10:23-25) Nda tua li kongela ku vamanji va sangiwa kueci ci pitahãla 98.000 kakongelo voluali luosi, cika tu kuatisa oku liangiliya oco tu popeliwe kesulilo lioluali lulo. Ovo vaka tu kuatisa oku amamako oku lekisa ovituwa viokaliye. Kuenje, tuka vetiyiwa oku longisa vakuetu olonumbi via Yehova oco va popeliwe.—Va Efeso 4:22-24; Va Kolosai 3:9, 10; 1 Timoteo 4:16.
18. Momo lie wa nõlelapo oku endela vocisoko ca Yehova?
18 Satana kumue lolondele viaye, o yongola oku tu yapula vocisoko ca Yehova. Pole, tu pondola oku pandikisa loku amamako vocisoko caye kuenda oku kuata elavoko lioku puluka kesulilo lioluali lulo. Ocisola tu kuetele Yehova, lolopandu tu eca kokuaye omo liovina a siata oku tu lingila, ci tu vetiya oku tamalãla la Satana. Nda tua sokolola asumũlũho tua siata oku tambula, tuka amamako oku linga ocipango ca Yehova. Vocipama cikuãimo, tuka konomuisa asumũlũho aco.
O Tambulula Ndati Eci Tua Lilongisa?
• Ekalo lio kotembo ya Noha, li sokisiwa ndati leli lia cilo?
• Ovituwa vipi tu sukila oku kuata oco tu popeliwe kesulilo lioluali?
• Apongoloko api Yehova a siata oku linga vocisoko caye oco a tu teyuile?
• Nye omunu lomunu a sukila oku linga oco a popeliwe kesulilo lioluali lulo?
[Elitalatu kemẽla 8]
Koloneke via Noha, omanu ka va pokuile kelungulo
[Elitalatu kemẽla 9]
Tu sukila oku pokola kelungulo lia Yehova
[Elitalatu kemẽla 10]
Olosikola Viocisoko ca Yehova vi kuete esilivilo lie?
[Elitalatu kemẽla 11]
Yilo oyo otembo yoku amamako vocisoko ca Yehova