Apulilo Valingiwa Lavakuakutanga

Tua kũlĩha ndati okuti, omunu wa tukuiwa kelivulu Liolosapo 8:​22-31, o lomboloka Yesu osimbu handi keyile palo posi?

Elivulu Liolosapo poku lombolola catiamẽla komunu waco, li popia hati: “Yehova wa ndulika kefetikilo liupange waye. Ame tete kovopange aye onahũlũlua. . . . Cina olomunda ka via kapiwile handi, kuenda oviwulu kaviko, oco nda citiwa. . . . Eci a sovola ovailu ame haiko nda kala, . . . nda kala laye ndomesele. Oloneke viosi eye wa sanjukila. Lame nda sanjuka kovaso aye otembo yosi. . . . nda sanjukilavo omãla vomanu.”

Olondaka evi ka citava okuti, tu vi tiamisila komunu ukuavo wa Suku okuti ka kũlĩhĩwile. Momo lie? Momo omunu wa tukuiwa ndeti, wa ‘lulikiwa’ kefetikilo liovopange osi a Yehova. Yehova o kasi tunde konahũlulua, kuenda olondunge viaye, vi kasi tunde osimbu. (Osamo 90:​1, 2) Olondunge via Yehova, ka vi kuete efetikilo. Momo eye ka vi tambuile komunu umue. Handi vali, Yehova ka kuete efetikilo. Ukualondunge wa tukuiwa ndeti kelivulu Liolosapo, wa lomboluiwa okuti, o kasi oku kovonga.​—⁠Olosapo 8:⁠1.

Elivulu Liolosapo li lombolola okuti, omunu waco tunde kefetikilo wa kala “ndomesele” ya Yehova Ululiki wovina viosi. Olondaka evi vi tiamisiwila lika ku Yesu. Momo eye lika wa kala ndomesele ya Yehova kefetikilo. Osimbu handi keyile palo posi, wa talavaya kumosi Laye. Embimbiliya li popia hati: [“Yesu] eye tete kovina viosi, kuenje ovina viosi via tokekisua vokuaye.”​—⁠Va Kolosai 1:17; Esituluilo 3:⁠14.

Omo liaco, ca sunguluka oku tukula Omõla a Suku okuti, ukualondunge. Momo eye lika wa situlula ocipango ca Yehova lovisila viaye. Yesu osimbu keyile palo posi, wa kala Ndaka ya Suku ale Kapitiya kondaka yaye. (Yoano 1:⁠1) Eye wa lomboluiwa okuti, “eye unene wa Suku, haeye olondunge via Suku.” (1 Va  Korindo 1:​24, 30) Olondaka evi via sunguluka oku vi tiamisila Komõla a Suku. Omo liocisola a kuatela omanu, wa eca omuenyo waye ndocisembi coku va yovola.​—⁠Yoano 3:16